Aeblania 8 - UPANGANO UPYA

Kapela-nkulu wa Upangano Upya

¹ Ichino muli fiyo fino tulufwanga, ichintu ichikulu ichi: Tuli na Kapela-nkulu ndi kuti wi, wino wikala ikasa lya kwilunji ilya chisumbi cha wene umwiyulu.

² Umuofi wa paswefu nu wi Hema lilye ilya chumi, lino lyawisilwe nu Mwene nga asi ntu.

³ Kuno Kapela-nkulu wensi akuwikwa ukuti afime amawila ni vipelo. Ichino chilungime na Wi kwene awe ni chintu chakufima.

⁴ Ngi wali awikale un-nsi, atali awe ikapela, kuno yaliko yano yalufima amawila ndi fino amasunde yatasile.

⁵ Yano yaluomba ukukolenkanya ni chisau cha ifintu vya mwiyulu, ndi fino Mose Wanenilwe na Leesa, pano wateinye ukukula iHema lilye. Kuno afwansile, ukuti: ‘Lola, ukachite ifintu fyoshi fikolane na fino walangililwe uku mwamba.”

⁶ Leelo li kwene li wawa nuomvi uno wasipe nkani, lamo ali Kapulikanya wa upangano uno uli ningo kuluta, uno wachitwa apa malanyo masipe.

⁷ Kuno lilye uwa ntangulo ngi wasifile, uwasa utali usitwe kuli uwa uwili.

⁸ Pano wayasunsile, ati: “Lolini, amanda yalwisa, alufwanga uMwene, ati: Nene nanjachitila Upangano upya aya ng'anda ya Islaeli ni ng'anda yi Yuda.

⁹ Utaluwa ndi kuti Upangano ulye uno napangine na yaisi, apa wanda ulye uno nayalemile amakasa yao, njafumye un-nsi ya Misili. Kuno yaatikasile um-upangano wane, nene nasusile, uMwene alutaka.

¹⁰ Kuno alau uli Upangano uno nampangana ni ng'anda ya Islaeli: Ichisila cha manda yalye, uMwene ati: Nanjapa amasunde yane unkusita kwao, nu myeso yao nanjaandika. Nene namwa Leesa kuno yali, nayo yamwa antu yane.

¹¹ Nayo yatalusambilishana chila ntu nu wa mwipamba lyaakwe, na chila ntu nu nnina, ukuti: ‘Umanye Mwene,’ kuno yoshi yalummanya, fuma unnono pali yeneyo fika nunkulu wao.

¹² Kuno nduyelela uipe wao. Na maifyo yao ntaluyelengula kaili.”

¹³ Apa kutaka ukuti: Upangano upya, wauchisile ulye uwa ntangulo ukulupe; leelo ichintu chino chatalika ukukulupa nti kukota, chili upipi nu kusila.