Aeblania 7 - UPANGANO UPYA

Yesu na Melkisedeki

¹ Kuno Melkisedeki wiyo umwene wa ku Salemu, kapela wi Leesa wa mwiyulu, wino wakomengine na Ablahamu, pano wawelanga ukufuma ukwisumo, lino wumanga ayene yao, wampepelela.

² Wino Ablaamu wampile isempu li kumi um-ifintu fyoshi, uku kusenula isina lyaakwe, intangulo: umwene wa chumi, kaili: umwene wa Salemu, ukuli kuti: umwene wa utekano.

³ Asi nisi nanti nyina, asi nu mpanda, asi ni ntangulo ya manda yaakwe nanti ukusila kwa upuma wakwe, leelo wakolenkanyiwa nu Mwana wi Leesa, wene wamwikala ukapela manda ti.

⁴ Ali lolini fino untu wiyo wali unkulu, wino Ablaamu tata-kulu, wapile sempu likumi ilya vipokwa.

⁵ Nu njana yi Lefi nayo yalye yano yakutupiwa ukapela, yali na maka ukutola sempu likumi uku antu yao, alikuti uku yanina, ukuyana ni Ntambi, nanti fino yafumile um-mpanda wi Ablahamu.

⁶ Leelo wino um-mpanda waakwe utafumilile kuli yao, watozile sempu likumi kuli Ablahamu, wampepelela wino ali nulanyo ulye.

⁷ Kuno chitakanike nanti uche, ukuti unnono apepelelwa nu nkulu.

⁸ Na pao antu yano yakufwa yakutola sempu likumi, leelo kuo wino alwimikilwa fino atalufwa.

⁹ Kaili chingavwangwa fino uku nsila yi Ablahamu, Lefi kwene, wino akulupokelela sempu likumi, nawe wafimile sempu likumi.

¹⁰ Kuno wali un-nsana wisi pao pano Melkisedeki wakomengine nawe.

Yesu alusile Aloni

¹¹ Ichino ngu ntu wa mpomvu walipo uku ukapela wi Levi—kuno antu yalye yapilwe Intambi kuli uwo—kwasitanga chani kaili ukuwa na kapela unji, akatuke ukuwa ndi fino Melkisedeki wali, asi ndi fino Aloni?

¹² Kuno ukapela ulye ngi wasenululwa, chiile ni Niambi kwene zisenulwe.

¹³ Kuno wino wafwangilwe fiyo, wali untu wa luko lunji, luno kusi untu wa luko luo wino waombelanga apa altale.

¹⁴ Kuno chili apatiswe fino uMwene witu wafumile muli Yuda, uluko luno Mose atafwansile iswi limwi pali lwenelo, um-ifintu vya ukapela.

¹⁵ Kaili yao yano tuluvwanga yali apatiswe nkani, ngi wakatuka kapela unji ndi kuti Melkisedeki,

¹⁶ wino asi kapela uku ntambi yisimde lya mwili, leelo uku maka ya upuma imo ususila.

¹⁷ Kuno wimikilwa, ukuti: Wewe uli kapela manda ti, ndi fino Melkisedeki wali.

¹⁸ Kuno kuli ukononwa kwisunde lino lyakolesile, uku nnandu wa utonte wi lyenelyo na kuno litaile.

¹⁹ Kuno Masunde yalye yatalesile ifya mpomvu, Leelo kasalaka tuli ni nsila ya utailo uno wasipa nkani, uno kuli weneo tulupalamila Leesa.

²⁰ Apa kuombeka ifintu vi kwali ichilapo, kuno anji yalye yapasile ukapela nanti chilapo,

²¹ leelo Wene ponga ni chilapo, kuli wino wannenile, ati: uMwene walapa atalulapuluka; Wewe uli kapela manda ti.

²² Ichino ukuyana na fiyo, Yesu wawa umwimilisi wa ulanyo unsipe nkani.

²³ Kaili yalye yachisilwe ukapela ainji, kuno infwa yayalesenkanyanga ukwikala manda ti.

²⁴ Leelo Wene alwikala manda ti, ali nu kapela waakwe uno ususila.

²⁵ Nawe ichino angafyusya yoshi swe, yano yaluila Leesa kuli wenewe. Kuno umpuma manda yoshi, kuti ayalombele.

²⁶ Kuno chatuile sweswe tuwe na Kapela-nkulu ndi kuti wi, wino unswefu asi nuipe nanti lyala limwi, wino wapalulwa na amaifyo, wino wali umwiyulu nkani nu kuluta.

²⁷ Wino, asi wi yakapela anina akulu, yano yakulufima vipelo chila wanda, apa ntangulo ku nnandu wa maifyo yao akola, nga ni chisila ku imandu wa maifyo ya antu yanji. Kuno wene wachisile fiyo lyonga mpela, pano waifimile unkola.

²⁸ Kuno Ntambi iluwika antu yano yatakwite maka, yawe ayakapela-akulu, leelo iswi liyo ilya chilapo, chino chisile ichisila cha ntambi, lyawika uMwana uwa kapanga, manda ti.