Aeblania 4 - UPANGANO UPYA

Kupusa kwa antu yi Leesa

¹ Ichino, ngi uchili ulipo ulanyo wa kwingila un-kupusa kwakwe, tulole umwi pali mwemwe atise aloleke fino wililwa.

² Kuno umwenemo, neswe kwene twasundwa iswi-sipe wi yao. Leelo iswi lilye lino lyapulikikwe, litayaombile chimwi. Kuno lituminkine nusumilo muli yeneyo.

³ Kuno swemwi yano twasumila tulwingila un-kupusa kulye, ndifino wafwansile, waati: “Ndi fino nalafile uku chilakali chane: Yatalwingila un-kupusa kwane.” Nanti fino imilimo yaakwe yamalilike fuma ukuwika ifiimbili vya nsi.

⁴ Kuno wafwansile kumwi pa wanda wa saba, ati: “Leesa wapusile uwanda wa saba, wata imilimo yaakwe yoshi.”

⁵ Na po kwene: “Yatalwingila un-kupusa kwane.”

⁶ Ichino fino iswi liyo lyasyalila ukuti yaliko antu yano yalwingila mwenemo, na yalye yano yasunsilwe iswi lilye kali, yaatingile uku imandu wa kutanduka kwao,

⁷ wawika kaili uwanda umwi, avwanga muli Daudi ichisila cha manda tupu, ndikuti ya: “Ilelo.” ndi fino chavwansilwe fuma kali: “Ilelo ngi mwapulika iswi lyaakwe, mutachikomya imyeso ino.”

⁸ Kuno Yoswa ngi wala yape ukupufa, atali avwanga ifya pa wanda unnina kaili.

⁹ Ichino, chasyalila uwanda wi Leesa uwa kupusa uku yantu yi Leesa.

¹⁰ Kuno wino wingila un-kupusa kwakwe, watapusa unkola kwene ku milimo yaakwe, ndi fino Leesa wapusile ku milimo yaakwe.

¹¹ Ichino tuchite unte ukwingila un-kupusa kuo, ukuti untu wensi atisa apone, akolane na yano yatandwike.

¹² Kuno iswi lyi Leesa ilya upuma: kaili lili na maka, na kaili lyakalipa ukuluta ulupanga lungawa lonsi, luno lwakalipa kuwili; kaili lilutota nu kupalukanya upuma nu mweso, ni vyai na mafuta yano yali mwenemo, kaili lyangupala ukumanya melengusi nu kusita kwa mweso.

¹³ Nga kusi ichilengwa chimwi chino chifisime apa maaso yaakwe, leelo ifintu fyoshi vila patiswe nu kuloleka apa maaso yaakwe unkola, wino sweswe swensi chitulungime ukulanda milimo itu.

Yesu Kapela-nkulu

¹⁴ Ichino kuno tuli-nawe Kapela-nkulu wino wingile umwiyulu, Yesu Mwana wi Leesa, tulemasye nkani usyuta witu.

¹⁵ Kuno tutali na Kapela-nkulu wino atachusile ponga neswe ku nnandu wa kuula-maka kwitu, leelo wenewe wesiwe ichili chonga neswe um-ifintu fyoshi, nanti kuchita iifyo.

¹⁶ Ichino tupalamile ichisumbi-cha-nkumbu uku chiposye, ukuti tukumbukilwe nu kulolelwa inkumbu sha kutwaswa pa kusita.