3 Yoane 1 - UPANGANO UPYA

¹ 1 Nene unkombe, nakwandikila Gayo mkundikwa, wino nakunda un-chumi.

uKutailwa kwi Gayo

² Mkundikwa, ndulomba uwe ni nkata kuli vyonsi nu kuwa nupuma wako, ndi fino numweeso wako kwene utenzi ningo.

³ Kuno nachimvile nkani, pano aachitu yisile nu kwimikila ichumi chako, ndi fino alondile ichumi.

⁴ Ntakwite ukuchimba kuno kulusile pa, ukupulika ana yane yalupita un-chumi.

⁵ Mkundikwa, uli wa kutailwa unnnimo uno uluombela achitu yao na aeni kwene,

⁶ yano yakwimikila apikongani fino wayakunda; uluchita ningo ndi kwacha wayasindikila ndi fino chiyile tun-milimo yi Leesa,

⁷ Kuno uku nndandu wishina liyo yafumile, nga yatakasi kupiwa chimwi ukufuma uku antu yakulukuwa.

⁸ Ichino swemwi chituyile ukupokelela antu ndi yao, ukuti twaswane ukuomba imilimo ya chumi.

Diotlefe na Demetlio

⁹ Naandikile ikongani chimwi; leelo Diotlefe, wino alusita ukuukolezya pali yeneyo, atalutupokelela.

¹⁰ Ichino ndi kwacha niza, ndwizukizya imilimo yakwe ino aluomba, fino akutuvwangila maswi maipe; nga atakusazya pao kwene, leelo imkola kwene atakupokelela achitu, na yano yakasi ukuyapokelela, akuyalesya nu kuyawinga mnwikongani.

¹¹ Mkundikwa, utasampula uipe, leelo uzipe. Wino aluchita ivizipe uwi Leesa; leelo wino aluchita iviipe atachili alole Leesa.

¹² Demetlio antu yoshi yalumtakila ifisipe, ni chumi kwene ichikola. Neswe kwene twimikila, newe umanyile fino usyuta witu uwa chumi.

Amaswi ya kumalila

¹³ Indi ni ifintu tupu ivya kukwandikila, leelo ntakasime ukukwandikila uku wino ni kalamu.

¹⁴ Leelo ntaile ukukulola suwa, neswe tuluvwanga apa manso.

¹⁵ Uwelesho uwe kunuli. Yakatitu yalukulaula. Ulaule yakatitu chila untu mwizina lyaakwe.