2 Timoteo 3 - UPANGANO UPYA

Iviipe fino viluuloleka

¹ Leelo umanye iswi li, fino um-manda ya mpelelekezyo kuluwa amakati yano yatala.

² Kuno antu yaluwa akuikunda akola, akunda impia, aluutensya, achilumba, antusi, atachindika avyazi yao, atakusamalizya, asi aswepe,

³ atakunda akumwao, atalamane, yakaifikizya, asuusunga, akalipe, atakasi ivizipe.

⁴ Yakasongelela, apotenkanya, akaivuna, yano akunde ivya munsi ukuluta Leesa.

⁵ Yano ungati yali ni chopo-kuli-Lesa, leelo yalukana amaka yakwe; nayo kwene utane nayo.

⁶ Kuno muli yeneyo yalimo akulusokelela un-ng'anda zya antu, nu kulema anachi viwila, yano anwamilwa ni visendo vya maifyo, yano yasendwa ni nyengwa tupu tupu.

⁷ Angi yalusambilila amanda yoshi, leelo yatezya ukumanya nanti kache chimwi cha chumi.

⁸ Ndi fino Yane na Yamble yakatukile Mose, ifino na yao kwene yalukatukila ichumi chio; antu yano yononeka amano yao, yakanwa uku ifintu vya usumilo.

⁹ Leelo yataluzimba nkani, kuno uwele-wele wao ulumanyika apatiswe na antu yoshi, ndi fino nu wele-wele wi yao wamanyika apatiswe.

¹⁰ Leelo wemwi walondela amasambilizyo yane, ni miele yane, nu kusita kwane, nusumilo ni chelelezi.

¹¹ Nu lukundo nu nte; nu kuzunywa kwane nu chuzi, ifintu fino vyanzanile uku Antiokia, uku Ikonio nu ku Listela. Un-zunyo onsi uno nachulanga, uMwene wantuzile muli fiyo vyonsi.

¹² Endi, na yoshi yano yakasi ukwikala un-chopo muli Klisto Yesu yaluzunyiwa.

¹³ Leelo antu yaipe aya mazosyo yaluwapo nu kuipisya, angi yalulovya nu kulowana.

Unzano wa Maandiko mazipe

¹⁴ Leelo wemwi uwikale um-ifintu fino wasambilile nu kuloka, kuno wamanya fino ayani yano yakusambilizye.

¹⁵ Na fino ukufuma uwanche umanyile amaandiko mazipe, yano yangakupa amano ku kupata ufyusi, uku usumilo uno uli muli Klisto Yesu.

¹⁶ Ilyandiko lyonsi ilipiwa na Leesa liile uku masambilizyo nu kukusunda antu ukonona kwao, nu kuyalolola nu kuyateka un-chumi.

¹⁷ Ukuti untu wi Leesa awe wa kapanga, wayana kuti aombe imilimo yoshi imisipe.