2 Tesalonike 2 - UPANGANO UPYA

Umwana wa ononi

¹ Yachitu tulumulomba uku nnandu wa kwisa kwa Mwene witu Yesu Klisto, na fino tulukongana panali,

² fino mutachisima apalinji mute ni nsila, nanti ukwiswi limwi lya mweso, nanti ukwiswi, nanti ku mbaluwa imwi, ino palumwi mungati iyitu, ukuti uwanda wa Mwene waati wisa.

³ Umwi atamusosha nanti uku nsila imwi, kuno utalwisa fika na lino kutane kutangule ukuloleka, aloleke untu wa kutanduka, umwana wa ononi.

⁴ Untu wa kupingula, wino aluukusha apa lwakwe uku ifintu fyoshi fino filwitwa iLeesa nanti ukufukamilwa; nunkola kwene alwikala un-ng'anda-nkulu-iyi-Leesa nu kuulanga apa lwakwe unkola, kunti ali Leesa.

⁵ Chene! mutelengwile fino pano nali ponga nemwe, namunenile ifintu fi?

⁶ Na chino channesenkanya li kwene muchimanyile; ukuti aloleke apa wanda wakwe.

⁷ Kuno ukutanduka kwa kufisama li kwene kuluomba imilimo; leelo li kwene kuli wino wannesenkanya, kufika lino waatisiwa.

⁸ Apano aluswelulwa untalamanu, wino uMwene Yesu alumola uku mpu wa un-nnomo wakwe, nu kumonona apa kusweluka kwa kwisa kwakwe.

⁹ Wiyo wino ukwisa kwakwe kukoline nukuomba kwi Shetani uku maka tupu, ni filangisho ni fipesha-mano fya ufi,

¹⁰ nu kuusanye wonsi uipe kuli yano yalulowa, kuno yatapokelile ulukundo lwa chumi, kuti yafyusiwe.

¹¹ Ichino fiyo Leesa aluyaletela ichakuti chiyalofye icha maka, yasumile ufi.

¹² Kuti yoshi yaputwilwe imilandu, yano yatasumile ichumi, leelo yachimbanga um-viipe.

¹³ Leelo chituile ukusamalisha Leesa manda yoshi uku nnandu wino, yachitu akundikwa nu Mwene, kuno Leesa wamusolola fuma intangulo, mufyusiwe, un-kuswefiwa nu Mweso nu kuzumila ichumi.

¹⁴ Ichino wamwitile mwemwe ukwi iswi-sipe litu, kuti muwe nukulu wa Mwene witu Yesu Klisto.

¹⁵ Ichino yachitu, syansyini, mulemasye amasambilisho yano twamusambilishe, nanti uku maswi itu, nanti uku mbaluwa itu.

¹⁶ Nu Mwene witu Yesu Klisto unkola, na Leesa Tata witu, wino watukunda nu kututeka imyeso manda ti nutailo nsipe uku nkumbu,

¹⁷ amuteke imyeso ino nu kumukoya uku nnimo onsi unsipe niswi lyonsi kwene.