2 Kolinto 4 - UPANGANO UPYA

Fyuma vya Mweso um-fifya fi ifu

¹ Ichino fino twapiwa uomvi uo, twakumbukilwa na Leesa, neswe tutalutonta.

² Leelo twati tukana ifintu fyoshi fya nsoni ififisime, kuno tutalupita um-uchenjesu nanti ukuminkanya iswi li Leesa nufi, leelo fino tululanda ivya chumi apatiswe, myeso ya antu yoshi yamanye, fino tuli apa maaso yi Leesa.

³ Leelo ngiswi-siipe litu lyafisama, lifisime kuli yano yalulowa,

⁴ yano lesa wansi ii wapofusha amelengusi yao yano yatasumile, kuti yatachilola umwengelela wiswi-siipe ilya ukulu wi Klisto, wino ali ichata chi Leesa.

⁵ Kuno tutaluusunda swe yakola, leelo fino Klisto Yesu uMwene, neswe kwene fino swe yaomfi yino uku nndandu wi Yesu.

⁶ Kuno Leesa wino waatile: “Umwengelela ulochelesha ukufuma un-chanda,” uli wino wochelishe um-myenzo itu, atupe umwengelela wa kumanya ukulu wi Leesa apa maaso yi Klisto.

⁷ Leelo insao i tuli nayo um-fifya fifu, kuti amaka makulu yano yalusile fyoshi, yamanyike fino ayi Leesa, nga asi kufuma kuno tuli

⁸ Twatutanikwa konsi konsi, leelo tutalufyenenkesiwa; tuluchusiwa, leelo tutaluchusika.

⁹ Twasunywa, leelo tutatilwe; tusumbwa pansi, leelo tutafwa.

¹⁰ Manda yoshi uku mwili tuseshile ukufwa kwi Yesu, ukuti upuma wi Yesu uloleke um-myili itu.

¹¹ Kuno swe yapuma, manda yoshi tulufimwa tufwe uku nnandu wi Yesu, ukuti upuma wi Yesu nao uloleke um-myili itu, ino ikululemeka ninfwa.

¹² Ichaleka infwa yawa na maka muli sweswe, leelo upuma muli mwemwe.

¹³ Leelo fino tuli nu Mweso uu kwene uwa usumilo, ndi fino chaandikwe: “Nasumile, ichino nafwashile;” neswe kwene tusumile, ichino tulufwanga.

¹⁴ Angi tumanyile, fino wino watutulwile uMwene Yesu, alutututulula neswe kwene ponga na Yesu, nu kututeka ponga nemwe.

¹⁵ Kuno ifintu fyoshi filuwa uku nnandu wino, ukutu inkumbu shiyo shifulishe nkani, kuli yao afusile nsamalisho sifulishe na Leesa atensiwe.

Kwikala nu kufwa um-usumilo

¹⁶ Ichino tutatonsile, nanti fino uuntu witu uwa kunsi Ukulukulupa. leelo uuntu witu uwa nkasi uluomba upya chila wanda.

¹⁷ Kuno uchusi witu uwa manda mache, uno ulusila suwa, ulutuchitila ukulu wa manda yoshi uno ulufulisha.

¹⁸ Tutachi filolekesha fino filuloleka, leelo fino fitaluloleka. Kuno fino filuloleka ifya manda mache sile, leelo fino fitaluloleka ifya manda yoshi.