2 Kolinto 2 - UPANGANO UPYA

¹ Leelo um-mweso wane nawine fino ntachigisha uku mwino angi nsusuwile.

² Kuno ndi namususuwalika, uwini wino anganchimfya umweso nga si wino ntisusuwalika?

³ Nga naandike amaswi ya kwene, kuti pano nacha nisa, ntache nsusuwale kuli yano ngachimbila. Kuno namutaila mwensi, kuno ukuchimba kwane, ukuchimba kwino mwensi kwene.

⁴ Kuno un-kusamala kwingi na machulo tupu aya mweso, namwandikile na monsosi, asi kuti mususuwale, leelo kuti mumanye, fino ulukundo lwane lwafula kuli mwemwe.

Kwelela

⁵ Leelo ndi umwi wasusuwalika, atansusuwalike nene sile, leelo mbalinga—kuti ntamunwamila nkani—watamususuwalika mwensi.

⁶ Untu ndi wiyo aine na malipisi yano wapiwa na ali inji.

⁷ Na pa kuchita fiyo, mule mumwelele nu kumteka umweso, kuti untu ndi wiyo atise afite mweso uku kususuwala nkani.

⁸ Ichino namulailila mulange ulukundo lwino kunali.

⁹ Kuno ichino naandike ukuti imanye kulondela kwino, ngi muchindike um-ifintu fyoshi.

¹⁰ Leelo ngi wino mwelela chimwi angi nene kwene ntimwelela; kuno nene kwene ngi namwelela untu chimwi, —kuno ngi ndini cha kwelela—ningelela pali Klisto ku nnandu wino.

¹¹ Kuti Shetani atatupota; kuno tutangituule ukumanya amelenguzi yaakwe.

¹² Nga pano nishile uku Tloa uku nnandu wiswi-siipe ilyi Klisto, nayulilwe unnyango ku maka ya Mwene.

¹³ Ntawine utekano um-mweso. wane, kuno ntawine Tito uwachane. Leelo nalambalikine nayo, impita ukuya uku Masedonia.

¹⁴ Leelo Leesa asamalisiwe, wino akulutupa ukupota muli Klisto, nu kulanga unnunko wa kummanya uliwe, poshi um-milimo itu.

¹⁵ Kuno swe unnunko usepe wi Klisto pali Leesa, kuli yano yalufyusiwa, na kuli yano yalulowa;

¹⁶ kuli yao aya uwili, unnunko wa nfwa uno ululeta infwa; kuli yao aya ntangulo unnunko wa upuma, uno ululeta upuma. Uwini wino angatulula fiyo?

¹⁷ Kuno swemwi tusi wa inji yano yakuluchulusha iswi lyi Leesa, leelo uku uswepe wa mweso ndi fino ukufuma kuli Leesa, apa maaso yi Leesa, tuluvwanga muli Klisto.