1 Yoane 4 - UPANGANO UPYA

uKwesha imyenzo

¹ Yakundikwa, mutazumila imyenzo yoshi, leelo mwezye imyenzo iyo, ngifumile kuli Leesa; kuno yakalauzya ainji aya ufi yatunka kuno ukunzi.

² Uku ifintu vi mumanyile uMweeso wi Leesa: umweso onsi uno ulwimikila fino Yesu Klisto watiza uku mwili, ufumile kuli Leesa.

³ Na chilamweeso uno utalwimikila Yesu, utafumile kuli Leesa. Nao ulimweeso wi klisto-wa-ufi, uno mwapulika fino ulwisa, na li kwene ulipo un-nsi.

⁴ Mwe yana yanono, mwafumile kuli Leesa, nemwe mwayapota; kuno wino ali muno muli unkulu alusile wino ali un-nsi.

⁵ Wene yao aya kuno ukunzi; ichino yaluvwanga ivya kuno ukunzi, ninsi iluyapulika.

⁶ Swemwi tufumile kuli Leesa. Wino amanyile Leesa, alutupulika; wino atafumile kuli Leesa, atalutupulika. Uku ifintu vi tumanyile uMweeso wa chumi numweeso wa ufi.

Leesa lukundo

⁷ Yakundikwa, tukundane, kuno ulukundo lufumile kuli Leesa; na wensi wino wakunda, wavyalwa na Leesa, nawe ammanyile Leesa.

⁸ Wino atakunda atammanyile Leesa, kuno Leesa ulukundo.

⁹ Uku chintu chi ulukundo lwi Leesa lwaloleka kuno tuli, fino Leesa watumile umwanakwe ali wenga kuno ukunzi, ukuti tupiwe upuma kuli wenewe.

¹⁰ Alalu uli lukundo, asi kuti sweswe twalile twakunda Leesa, leelo fino unkola u wino watukunda sweswe, nga watuma umwanakwe ukuwa Kapulikanya uku maifyo itu.

¹¹ Yakundikwa, ndi Leesa walile watukunda sweswe vi, chituile neswe kwene ukukundana.

¹² Kusi untu nanti wenga wino watana walola Leesa, nanti limwi. Ngi twakundana, Leesa alwikala muno tuli, nu lukundo lwakwe luwa lonsi muno tuli.

¹³ Uku chintu chi tumanyile fino tutenzi muli wenewe, nawe muno tuli, kuno watupungwila Mweso wakwe.

¹⁴ Neswe twalola nu kwimikila fino Tata watuma uMwana ukuwa Katula kuno ukunzi.

¹⁵ Wensi wino alwimikila fino Yesu uMwana wi Leesa, Leesa atesi munali, nawe muli Leesa.

¹⁶ Neswe tumanyile ulukundo luno Leesa ali nalo kuno tuli nu kuluzumila. Leesa ulukundo, na wino atesi un-dukundo atenzi muli Leesa, na Leesa muli wenewe.

¹⁷ Uku ifintu vi tululola ulukundo lufikilile muno tuli, ukuti tuposye apa wanda wa uputusi wa milandu, kuno, ndi fino ali, ifino neswe kwene tuli kuno ukunsi.

¹⁸ Undukundo musi ingofi, leelo ulukundo lwa mpomvu lukuluwinga ingofi; kuno ingofi zikuchushazya, nu wa ngofi asi nu lukundo lwa mpomvu.

¹⁹ Swemwi twakunda, kuno unkola watangwile ukutukunda.

²⁰ Ngu ntu umwi wati: Nakunda Leesa, nawe watuwa uwachakwe, angi uwa ufi; kuno wino atakunda uwachakwe wino walola, atangi akunde Leesa wino atatana andole.

²¹ Nisunde li twapiwe nawe: ukuti wino wakunda Leesa, akunde nu wa chakwe kwene.