1 Yoane 2 - UPANGANO UPYA

¹ Yanane yanono, ndumwandikila ifintu fi, kuti mutachita amaifyo. Ngu ntu wachita iifyo, tuli nu Mwazwilizi pali Tata, Yesu Klisto uwa chumi.

² Nawe uli Kapulikanya uku maifyo itu; leelo kusi ku maifyo itu sile, leelo nu ku maifyo ya antu yoshi kwene a kuno ukunzi.

Kulema masunde yi Klisto

³ Na muli li tumanyile fino tummanyile, ngi tulemile amasunde yaakwe.

⁴ Wino aluti: Nemwi mmanyile, nga atalemile amasunde yaakwe, wene uwa ufi, nanti chumi atakwite.

⁵ Leelo wino alemile iswi lyaakwe, uwino ulukundo lwi Leesa lwamfikilila ningo. Na ku lili tumanyile fino tuli muli wenewe.

⁶ Wino aluti fino atenzi muli wenewe, chinnungime ukupita ndi fino wene wapitanga.

Ichilangaso ichipya

⁷ Yakunde, lisi sunde lipya, lino namwandikila, leelo isunde lya kali lino mwali nalyo fuma intangulo. Ni sunde lya kali liyo, iswi liyo lino mwapulike.

⁸ Kaili namwandikila isunde lipya, iswi lya chumi kunali nu kuno muli, kuno ichanda chilusila nu mwengelela uo uwa chumi uuswefya.

⁹ Wino aluvwanga fino ali um-mwengelela, nawe watuwa uwachakwe, achili un-chanda na li kwene.

¹⁰ Wino wakunda uwachakwe, atenzi um-mwengelela, asi ni chakufwitosya.

¹¹ Leelo wino watuwa uwachakwe, ali un-chanda, na kaili alupita un-chanda, atamanyile kuno ayile, kuno ichanda champofuzya maaso yaakwe.

¹² Ndumwandikila mwe yanche, kuno mwelelwa amaifyo yino ukwizina lyaakwe.

¹³ Namwandikila mwemwe yatata, kuno mumanyile wino waliko fuma intangulo. Namwandikila mwe yalumendo, kuno mwati mumpota unjipe wiyo. Ntimwandikila mwe yanche, kuno mwammanya Tata.

¹⁴ Ntimwandikila mwe yatata, kuno mwammanya wino waliko fuma pa ntangulo. Ntimwandikila mwe yalumendo, kuno muli na maka, niswi lyi Leesa lili muno muli, nemwe mwati mumpota unjipe wiyo.

¹⁵ Mutakunda insi nanti ifintu vya mwenemo. Untu ndi wakunda insi, ulukundo lwi Tata lusimo muli wenewe.

¹⁶ Kuno chonsi chino chili un-nsi, ndi fino ukukumbuka kwa mwili, nu kukumbuka kwa maaso ni chilumba cha upuma, vitakufuma kuli Tata, leelo vilufuma un-nsi.

¹⁷ Ninsi ilupita ponga nu kukumbuka kwakwe; leelo wino aluchita fino Leesa akasime, aluwako manda ti.

Klisto-wa-ufi

¹⁸ Yana yanono, li kwene amanda ya mpelelekesho; ndi fino mwapulike ukuti klisto-wa-ufi alwiza, na li kwene yaklisto-ya-ufi yalipo tupu. Ichino fiyo tumanyile fino manda ya mpelelekezyo.

¹⁹ Yafumile kuno tuli, leelo yatali aya kumwitu. Kuno ngi yali yawe aya kumwitu, yali yikalane ponga neswe. Leelo yafumile, kuti yasweluliwe fino yoshi yasi ya kumwitu.

²⁰ Nemwe mwapakwa mafuta nu Nswefu, nemwe mwensi mumanyile fi.

²¹ Ntamwandikile mwemwe kuno mutamanyile chumi, leelo kuno muchimanyile. Na kaili fino kusi ufi nanti umwi uno ufumile un-chumi chiyo.

²² Uwini uwa ufi, siku wino alukana fino Yesu i Klisto? Wiyo uli klisto-wa-ufi, wino alukana Isi nu Mwana.

²³ Wensi wino asumile uMwana, asi nIsi kwene; na wino alutaka uMwana, ali nIsi kwene.

²⁴ Ichino mwemwi, liyo lino mwapulika fuma intangulo likale muno muli. Ngi lino mwapulike fuma intangulo likale muno muli, nemwe kwene mukwikala nu Mwana na muli Tata kwene.

²⁵ Nau uli ulanyo uno watulainye: uli upuma wa manda ti.

²⁶ Namwandikila ifintu fi uku unndandu wa yantu yano yalusita ukumulofya.

²⁷ Nemwe umpakalo mwapokelile Kunali, ali muno muli, nga mutangi musite untu ukumusambilisha; leelo ndi fino mafuta yao yalumusambilisha amaswi ya fintu fyoshi na kaili aya chumi, usi ufi; na fino wamusambilisha, ikalini muli Wenewe.

²⁸ Ichino yana yanono, ikalini muli wenewe, ukuti pano wacha waloleka, tuposye, tutache tukulwe imitwe apa maaso yaakwe apa kwiza kwakwe.

²⁹ Ngi mwamanya fino wene uwa chumi, manyini kwene fino wensi wino aluchita ivya chumi, wavyalwa nawe.