1 Timoteo 4 - UPANGANO UPYA

Yakasambilizya ya ufi. Unnimo wi Timoteo

¹ Leelo Mweso aluvwanga apatiswe, fino um-makati ya chisila yamwi yalupaluka um-usumilo, angi yalupulikisya imyenzo yino iluzosya, na masambilizyo ya mashetani.

² Ukwisongi lya yantu yano yaluvwanga ufi, yapya wa moto um-myenzo yao akola.

³ Yalulesya antu yatachipindula, nu kuizilizya ivyakulya, fino Leesa walenzile vipokelelwe uku nsamalizyo na yano yali nusumilo, yano yamanyile ichumi chiyo.

⁴ Kuno chila chilengwa na Leesa chazipa, nga kusi icha kukanika ndi chapokelelwa uku nsamalizyo.

⁵ Kuno chaswefiwa ukwiswi lyi Leesa nu kukupepa.

⁶ Ngu uwelenguzye achitu ifintu vi, newe wamwa umuofi nzipe uwi Klisto Yesu, wino amanyile ningo amaswi ya usumilo, na masambilizyo mazipe yalye, yano walondile.

⁷ Leelo ivilai vya akolechi, fino visi vya kapanga, uvikane; newe uwelezye ukuwa ni chopo-kuli-Lesa.

⁸ Kuno ukuuwelezya ukuwa na maka ya mwili kuile uche, leelo ichopo-kuli-Lesa chiile uku ifintu vyonsi; ndi fino uli nulanyo wa upuma wa pa kasalaka na uno ulwiza.

⁹ Iswi liyo ilya kutailwa na kaili liine ukuzumilwa nkani.

¹⁰ Kuno tuluuchuzya nu kulemasya uku nnandu uo, kuno tumtaila Leesa wa upuma, uli Kafyusya wa yantu yoshi, nkani kuli yano yazumila.

¹¹ Ifintu vi uvisundisya nu kusambilizya.

¹² Untu wensi atachisula ulumendo wako; leelo uwe chilangizyo kuli yano yazumila, um-mvwango ni miele, undukundo nusumilo nu uswepe.

¹³ Fika lino nacha niza, uchite unte un-ku-soma nu kusokela nu kusambilizya.

¹⁴ Utata ukuombela uwila uno uli muno uli, uno wapilwe uku ulau nu kukuwikilwa makasa ya yikolo

¹⁵ Uyakônke yao, uwikale muli yeneyo, ukuti ukukula kwako kuwe apaswe uku yantu yoshi.

¹⁶ Yisunge umweso wako, na masambilizyo yako; uwikalisye um-ifintu fiyo. Kuno ukuchita fiyo wanjifyusya umweso wako na yano yalukupulika kwene.