1 Timoteo 2 - UPANGANO UPYA

Tungapepa uli?

¹ Ichino inkolelo ya ifintu vyonsi, ndusita ukulailila ni nsala, nu kulombela ni nsamalizyo viombeke uku yantu yoshi,

² uku yene na yoshi yano yamulâsile, twikale tutekine na chele, uku chopo-kuli-Leesa nu nchinzi wonsi

³ Alali lyazipa, nalyo lizumilwe apa maaso yi Leesa Unkuluzi witu.

⁴ Wino alusita antu yoshi yafyuke nu kwiza uku kumanyikisya ivya chumi.

⁵ Kuno Leesa ali wenga, na Kapulikanya pali Leesa na antu ali wenga, umwana-ntu Klisto Yesu.

⁶ Wino waufimile unkola ukuwa ukuluzi kuli yoshi; uwo uli usyuta uno ulwimikwa apa makati yaakwe.

⁷ Nene kuli weneo nawikwa imbwe kasunda nu ntume—nduvwanga ichumi, ntaluvwanga ufi, ne kasambilizya wa yantu yakulukuwa um-usumilo ni chumi.

⁸ Ichino ndusita ayonsi yasalizye konsi konsi, angi yakatwisye amakasa yano yasi ni vuzi nanti chilakali nu kupazyana.

⁹ Ifino na anachi kwene, yauyemvye ningo ponga nu nchinzi nu kuteka umweso; asi ku kuluka inyele, nanti uku zaabu ni lulu, nanti uku myenda ya mpangila.

¹⁰ Leelo uku milimo mizipe, ndi fino chiile anachi yano yalondile unchinzi wi Leesa.

¹¹ Umwanachi asambilile um-umyalazu nu kutontela kuli chonsi.

¹² Ntangi ndeke umwanachi asambilizye, nanti ukulâsa umonsi. Leelo awe um-utonsu.

¹³ Kuno Adamu uwino walengilwe intangulo, na Eva ichisila.

¹⁴ Kuno Adamu atachili azosiwe, leelo umwanachi lino wazosiwe, wapona um-maifyo.

¹⁵ Leelo alufyukila ukwikwata lyaakwe, ndi wikalisya um-usumilo nu lukundo nu kuswefiwa, ponga nu kuteka mweso.