1 Tesalonike 3 - UPANGANO UPYA

Fino Timoteo watumilwe

¹ Ichino walangi, pano tutangi tulolele nkani, twawine chingazipe tusyale uku Atene swenga.

² twatuma Timoteo uwachitu, umuofi wi Leesa ponga neswe umwiswi-zipe ilyi Klisto, ukumukomya mwemwe nu kumusungula uku usumilo wino.

³ Mutachisima na machulo ya. Kuno nemwe kwene mumanyile fino twawikilwa yeneyo.

⁴ Kuno pano twali ukumwino, twalile twamunena kali, fino tuluzanwa na machulo, ndi fino chawile nemwe mumanyile.

⁵ Ichino nene kwene pano nawine ntawezizye ukulolela kaili, natumile untu kuti imanye ukuzumila kwino, atize Kezya amwezye, nu kusuka kwitu kuwe ukwa chaka.

⁶ Leelo pano Timoteo wawezile li kwene ukufuma kuno muli, watuletile amaswi mazipe aya kuzumila kwino nu lukundo lwino, na fino mulutwelengula ningo manda yoshi, nu kulûka ukutulola sweswe, ndi fino neswe kwene ukumulola mwemwe.

⁷ Ichino fiyo yachitu, twatekine imyenzo uku maswi ino, um-malanda na machulo itu yoshi, uku kuzumila kwino.

⁸ Kuno kasalaka tutenzi nupuma, ngi mwemwe mwimisya ningo um-Mwene.

⁹ Kuno insamalizyo chi yino tungapa Leesa uku nnandu wino, uku kuchimba kuwo kuno tuluchimbila uku nnandu wino, pali Leesa witu?

¹⁰ Usiku nu nsanya pano tulupepa uku maka, kuti tulolane, nu kumalila fino vyasyalila uku kuzumila kwino.

¹¹ Nga Leesa unkola, Tata witu, nu Mwene witu Yesu, atukolelele inzila yitu tufike uku mwino.

¹² Nu Mwene amuvuzye nu kumuvuzizya ulukundo chila wenga uku nnina nu ku yantu yoshi, ndi fino neswe tuli kuno muli,

¹³ ukuti akomye imyenzo ino itachisumbikilwa um-uswefu apa maaso yi Leesa, Tata witu, apa kwiza kwa Mwene witu Yesu ponga naswepe yaakwe yoshi.