1 Kolinto 6 - UPANGANO UPYA

Aklisto kushita ichumi uku yakulukuwa

¹ Chawa uli untu umwi kuno muli, ndi ali nu nnandu uku wachakwe, angezya nu kumtwala uku asi-ya-chumi, asi uku yaswepe?

² Chene! mutamanyile fino aswefiwa yaluputula imilandu kuno ukunzi? Ngi ukunzi kuluputwilwa imilandu nemwe, chitamulungime ukuti mumputula imilandu minono?

³ Mutamanyile fino tuluputwila yamalaika imilandu? Nga chitalusile nkani ifintu vya mikalo ya?

⁴ Ichino ngi muli ni ifintu fino viluputwilwa imilandu vya mikalo ya, Chene! mwayawika uli uku uputuzi nayo yano yasulwa umwi kanisa?

⁵ Nduvwanga vi kuti musekelisye. Chene! ifino chili ukuti kuno muli kusi umwi uwa mano, wino angaputula amaswi ya yanina?

⁶ Nga mulusongelelana mwe yatupu, na kaili pali yano yatasumile.

⁷ Ichumi ifintu fiyo vyonsi ivya kusongelelana mwe yatupu na tupu, mwaulilwa chimwi: Kuno chili uche uche ukononwa? Kuno chitali uche uche ukupokwa insao ino?

⁸ Fwandi nemwe kwene mulonona nu kupoka insao ya antu, nu ku achino kwene.

⁹ Chene! mutamanyile fino asi-ya-chumi yatalupyana uwene-wi-Leesa?

¹⁰ Mutalowana! Apundu nanti ayakapepa-ya-myao, nanti ayakonona-ng'anda, nanti ayonsi yano yakukundana, nanti achizale, nanti aivi, nanti ayakakumbuka, nanti akolesi, nanti aya ntusi, nanti akulupoka-vya-antu, yoshi yao yatalupyana uwene-wi-Leesa.

¹¹ Na pali mwemwe mwali antu ya fiyo kwene; leelo mwafulwa, kaili mwaswefiwa, mwalilwe ichumi ukwizina lya Mwene witu Yesu Klisto, nu ku Mweso wi Leesa witu.

Myili itu ku utensyo wi Leesa

¹² Kuli nene kusi chimwi icha mishilo, leelo asi vyonsi fino vizifile. Kunondi kusi chimwi cha mizilo, leelo nemwi ntangi mbwikwe apisika ya maka ya chintu chimwi.

¹³ Ivyakulya ivyanda, ninda iya vyakulya, leelo Leesa aluvyonona vyonsi viyili, inda ni vyakulya; leelo umwili usi wa kuchita ivya upundu, leelo uwa Mwene, nu Mwene uwa mwili.

¹⁴ Na Leesa watutulwile uMwene na kaili alutututulula neswe uku maka yaakwe.

¹⁵ Chene! mutamanyile fino imyili yino ivyai vyi Klisto? Chene! ntole ivyai vyi Klisto imvichite viwe ivyai vyi malaya? Mwiko ta!

¹⁶ Nanti mutamanyile fino wino wuminkana na malaya wawa umwili onga nawe? Kuno avwanzile ukuti: “Yao yaili yaluwa umwili onga.”

¹⁷ Leelo wino wuminkana nu Mwene wawa umweso onga nawe.

¹⁸ Mwituke ivya upundu Iifyo lyonsi lino untu aluchita, lili ukunzi uku mwili wakwe; leelo wino aluchita ivya upundu, aluchita amaifyo uku mwili waakwe unkola.

¹⁹ Chene! mutamanyile fino imyili ino ing'anda-nkulu iya Mweso Nswefu wino ali muno muli, wino mwapiwa na Leesa? Nga mwemwi asi yino mwe yakola?

²⁰ Kuno mwakazilwe uku mpangila. Ichino fiyo mutensye Leesa um-myili ino.