1 Kolinto 12 - UPANGANO UPYA

Mawila ya Mweso Nswefu

¹ Leelo yachane, uku wila wamweeso, ntakasi kuti mutamanya.

² Mumanyile fino lino mwali yantu yakulukuwa, mwapulwilwe ukulondela ivilui fino visuvwanga, ndi fino mwakolelilwe.

³ Ichino namumanyisya fino kusi wino akuvwanga um-Mweso wi Leesa, ukuti: “Yesu watipwa,” kaili untu atangi ati: “Yesu uMwene,” ngi asi um-Mweso Nswefu.

⁴ Ichino uwila ulekine, leelo uMweeso ali wenga.

⁵ Na kaili kuli uomvi ulekanile, leelo Mwene uwiwi kwene.

⁶ Nga kaili kuomba nako kwene kulekine. Leelo Leesa ali wenga kwene wino aluomba imilimo iyo yoshi muli yoshi.

⁷ Leelo chila wenga aluswelwilwa nu Mweso uku nzano wa antu yoshi.

⁸ Kuno wenga uku Mweso apiwa iswi lya mano na kuli wenga iswi lya kumanya ndi fino uMweeso ali wenga akasime.

⁹ Nunji usumilo muli Mweso wiyo kwene, nu nji uwila wa kupozya muli Mweso wiyo wali wenga.

¹⁰ Nunji ifipezya-mano, nunji ukulauzya, nunji ukumanya imyenzo, nunji imivwango tupu tupu, nunji ukusenula imivwango.

¹¹ Leelo imilimo iyo yoshi Mweso ali wenga aluomba, wenga kwene, angi alwankanya kuli wenga wenga ndi fino akasi.

Ivyai tupu, mwili onga

¹² Kuno ndi fino umwili uli onga nao uli ni vyai tupu, ni vyai vyonsi ivya mwili navyo kwene vili tupu, leelo umwili wonga, ifino na Klisto kwene.

¹³ Kuno muli Mweso wenga, swensi kwene twabatiziwe ukuwa umwili onga, ngi swe aYudea nanti swe aGliki, ngi swe yazya nanti swe yakauwele; swensi twanwesiwa uMweeso wenga.

¹⁴ Kuno mwili kwene chisi chai chonga, leelo vili tupu.

¹⁵ Ngi kulu lyaati: “Kuno nemwi asi ne ikasa, asinene wa ku mwili,” ichintu chiyo chaleka, Chene! lisi uku mwili?

¹⁶ Nikutwi ngi lyaati: ‘Kuno nemwi nsi ne linso, asi ne wa ku mwili.” Chene! ichintu chiyo chaleka lisi lya ku mwili?

¹⁷ Ngu mwili onsi wawa ilinso, nga chani champulikanga? Ngu mwili onsi ikutwi, chani chinunsyange?

¹⁸ Leelo Leesa wawika ivyai, chonga chonga, uku mwili ndi fino wakasime.

¹⁹ Leelo ngi vyonsi vyali viwe ichai chonga, ngali umwili uli kwi?

²⁰ Leelo ivyai vyavula, leelo umwili uli onga.

²¹ Ni linso litangi linene ikasa, liti: “Ntalukusita,” nanti untwe utangi unene amulu, uti: ‘Ntalumusita, awe.’

²² Leelo ukuluta na nkani ivyai vya mwili fino viluloleka vitachindikwe,

²³ vyai fiyo tuluvichindika nkani, ni vyai vitu fino vitazifile, vyazipisya nkani.

²⁴ Kuno ivyai vitu fino vyazipa, visi na chino vilusita Leelo Leesa walemanya umwili, nu kupa unchinzi ichai chino chaulilwa chimwi.

²⁵ Kuti umwili utapalunkana, leelo ivyai vyonsi vyazwane chila chonga ni chinina.

²⁶ Ni chai chonga ngi chachisika, angi vyonsi ivichisika; ni chai chonga ngi chachindikwa, ivyai vyonsi vichimba ponga nacho.

²⁷ Ichino mwemwi mwe mwili wi Klisto, ni vyai chila chonga nsya.

²⁸ Nga Leesa wimika yamwi umwi kanisa, antangulo imitume, aya uwili ayakalauzya na ya utatu yakasambilizya, kaili ivipezya-mano, chalondelela uwila wa kupozya alwale nu kwazwana, nu tunguluzi, ni mivwango tupu tupu.

²⁹ Chene! yoshi imitume? Yoshi ayakalauzya? Yoshi ayakasambilizya? Yoshi yaluchita ivipezya-mano?

³⁰ Chene! yoshi yali nu wila wa kupozya alwale? Yoshi yaluvwanga uku mivwango? Yoshi yalusenula?

³¹ Sitini uwila ukulu. Nga nammulanga inzila ya ningo ukuluta iyo.