1 Kolinto 11 - UPANGANO UPYA

¹ Mundondele nene ndi fino nene ndondile Klisto.

Anachi ukunyepa uku ntwe

² Ichino ndumutensya kuno mutandaatile uku ifintu vyonsi, nemwe mwalemasha amasambilizyo ndi fino namupile.

³ Leelo ndusita kuti mumanye fino untwe wi chila monsi wensi i Klisto, nu ntwe wa mwanachi iya wakwe, nuntwe wi Klisto i Leesa.

⁴ Umonsi wensi pano alusalika nanti pano alusunda, nawe akuwile uku ntwe, alusekelisya untwe wakwe.

⁵ Leelo umwanachi wensi pano alusalika nanti pano alusunda, nanti kunyepa uku ntwe, alusekelisya untwe wakwe, kuno chakolana na wino wasandwa.

⁶ Kuno umwanachi ngi atanyefile uku ntwe, asandwe inyele kwene. Leelo ndi chawi nsoni umwanachi ukupelwa inyele zyakwe nanti ukusandwa, anyepe.

⁷ Kuno chitaile umonsi ukunyepa uku ntwe, kuno wene umwata nu ukulu wi Leesa. Leelo umwanachi ukulu wa monsi.

⁸ Kuno umonsi atafumile uku mwanachi, leelo mwanachi uwino wafumile uku monsi.

⁹ Nanti umonsi ataumvilwe ku nnandu wa manachi, leelo umwanachi waumvilwe uku nnandu wa monsi.

¹⁰ Ichino chilungime umwanachi anyepe uku ntwe uku nnandu wi yamalaika.

¹¹ Leelo umwanachi kwaula umonsi, nanti umonsi ukwaula umwanachi chisi chimwi um-Mwene.

¹² Kuno ndi fino umwanachi wafumile uku monsi, nu monsi kwene akuvyalwa nu mwanachi; leelo ifintu vyonsi akafumo kakwe ukuli Leesa.

¹³ Uvwangili mwe akola pa lwino, Chene! chizifile umwanachi ukusalika pali Leesa, nawe atanyefile ukuntwe?

¹⁴ Chene! imiele kwene ino niwaumvilwe, italumusambilizya fino umonsi ngi wawa ni nyele zino zyatalimpa, ivya nsoni kunali?

¹⁵ Leelo umwanachi ngi wawa ni nyele intali, uzipe wakwe kunali Kuno wapilwe inyele ziyo intali ziwe wa mwenda.

¹⁶ Leelo ngi untu umwi alusita ukuleta ukulemanila, swemwi tusi na ntambi ndi kuti iyo, nanti umwi kanisa lyi Leesa.

Kusekelisha ichakulya cha Mwene

¹⁷ Leelo uku kumusunda fiyo, ntalumutensya fino mulukongana kusi ku vizipe, leelo ku viipe.

¹⁸ Kuno icha ntangulo, pano mulukongana umwi kanisa, ndupulika fino muli nu kutalunkana, nene mbalinga nduzumila.

¹⁹ Kuno chilungime ukutalunkana kuweko, ukuti yano a ya chumi, yaloleke apatiswe kuno muli.

²⁰ Ichino pano mulukongana nu kulyi chakulya, chiyo chisi ichakulya-cha-Mwene.

²¹ Kuno chila wenga alutangulaukutola ichakulya chakwe apakulya, chaleka wiyo ali ni nzala, na wiyo atakoleka.

²² Chene! musi na mang'anda umwa kulyila nu kunwa? Nanti mulusula ikongani li Leesa nu kuyakuzya imitwe yano yatavikwite? Nammunena chani? Mutensye? Awe! Ntangi mutensya uku chintu chi.

²³ Kuno nemwi chino napokelile uku Mwene, ichino nampile, fino uMwene Yesu usiku ulye uno wafimilwe, watozile unkate.

²⁴ Nawe pano wasamalizya, aukimyola, ati: “Alau uli mwili wane, uno wafimwa kuno muli, muchitange ndi vi kwene uku kungelengula.”

²⁵ Na pa chisila cha kulya, atola untonto, ati: “Untonto u, ulanyo upya umu wazi wane. Lyonsi lino mukunwa, muchita ndi vi uku kungelengula.”

²⁶ Kuno lyonsi lino mululya unkate u, nu kunwela umu ntonto u, mululanda infwa ya Mwene fika na lino aluwela.

²⁷ Ichino wensi wino alulya unkate nu kunwela untonto uo uwa Mwene fino chitaile, aluwa ni ifyo uku mwili nu wazi wa Mwene.

²⁸ Chazipa untu aulole ngi chinjile ukulya unkate nu kunwela un-ntonto.

²⁹ Kuno wino alulya nu kunwa sile, alulya nu kunwa uputuzi wa pa ntwe wakwe, ngi atalulola umwili wa Mwene.

³⁰ Ichino uku chintu chi, kuli yamwi kuno muli yano yaombokela na yamwi alwale, na antu tupu tupu yala yafwa.

³¹ Leelo ngi twali tuumanyikisye um-myenzo, tutali tuyangulwe unnandu.

³² Leelo pano twayangulwa nu Mwene angi twasokeziwa, kuti tutache tuyangulwe ponga na amunsi.

³³ Ichino yachane, ndi pano mwakongana ukulya, mupembana.

³⁴ Ndu ntu umwi ali ni nzala, alye ukwakwe, kuti mutachikonganila uyanguzi. Ni vyasyalila nduvimalila, pano nacha niza.