Yuunusa 3 - Dewtere Laamɗo Fulfulde Burkina Faso

No yimɓe ngalluure Niniwe tuubiri

¹ Joomiraaɗo haaldi e Yuunusa katin, wi'i ɗum:

² — Ummaa yahu ngalluure Niniwe mawnde ndeen, kaalanaa jooɗiiɓe nder mayre kongol ngol kaalanammaami ngool.

³ Jonle, Yuunusa ummii yehi Niniwe fodde e konngol Joomiraaɗo. Niniwe wo ngalluure mawnde sanne. Neɗɗo yiiltoto balɗe tati de huuɓina nde.

⁴ Yuunusa waɗi nyalaande muɓɓere ina yaha ley huɓeere ndeen ina ƴeewnoo ina wi'a: — Ɗo yaade balɗe 40, ngalluure Niniwe halkan.

⁵ Yimɓe Niniwe ngoonɗini konngol Laamɗo. Ɓe njamiri mono fuu suumoo, gilla e tedduɓe faa e lo'uɓe. Ɓe ɓornii tekke bootooji faa ɓe kolla mettorgal ɓerɗe maɓɓe.

⁶ Nde kabaaru majjum yottinoo to kaananke Niniwe fu, ummii dow jooɗorgal laamu muuɗum, ɓortii kaddule laamu, ɓornii tekke bootooji, kollooje mettorgal ɓernde muuɗum. Ndeen o jooɗii dow ndoondi.

⁷ O waɗi yimɓe ngooyna nder ngalluure ndeen, mbi'a: — Inan ko kaananke e howruuɓe muuɗum njamiri: «Taa fay gooto nyaama goɗɗum. Taa daaba fay ngoota hokkee ko nyaama, illa daabaaji mawɗi faa pamari. Katin du, taa tagaaɗo fuu naa daaba njara ndiyam.

⁸ Yimɓe e daabaaji fuu cuddiree tekke bootooji, mbulloo Laamɗo bojji cattuɗi. Mono fuu tuuba yoppa laawol bone e golleeji muuɗum nyannguɗi.

⁹ Moy anndi, yalla Laamɗo accitataa ko wi'i ɗum, itta tikkere muuɗum ndeen dow men faa taa kalken.»

¹⁰ Nde Laamɗo yi'unoo ko ɓe ngaɗi e yoppude laabi maɓɓe bonɗi ɗiin fu, acciti halkude ɓe hono no wiirunoo halkan ɓe ni. O waɗaay ɗum katin.