Wurtagol 7 - Dewtere Laamɗo Fulfulde Burkina Faso

¹ Ndeen Joomiraaɗo wi'i Muusaa: — Mi waɗii ma hono Laamɗo yeeso Fira'awna. Mawna Haaruuna du laatante annabaajo.

² Ko njamiranmaami fuu, sey kaalanaa ɗum Haaruuna. De kam du haalda e Fira'awna faa yoppa yimɓe Israa'iila mburtoo leydi Misira.

³ Ammaa mi yoornan ɓernde Fira'awna. Mi hebbinan maandeeji am kaayniiɗi ley leydi Misira.

⁴ Fira'awna hettindantaako on. Ndeen mi yowan junngo am ngo baawɗe ngoon dow Misira. Mi wurtiniran yimɓe am Israa'iila'en, konunkooɓe am ɓeen ley leydi ndiin e sariyaaji mawɗi.

⁵ Nde njowoymi junngo am ngo baawɗe ngoon dow Misira faa mi wurtina Israa'iila'en hakkunde maɓɓe fu, Misirankooɓe paaman wo miin woni Joomiraaɗo.

⁶ Muusaa e Haaruuna ngaɗiri no Joomiraaɗo yamiri ɗum'en noon.

⁷ Nde ɓe njahunoo ɓe kaaldowi e Fira'awna ndeen, Muusaa na wondi duuɓi 80, Haaruuna du duuɓi 83.

No sawru Haaruuna laatorii mboddi

⁸ Joomiraaɗo haaldi e Muusaa e Haaruuna, wi'i: —

⁹ Si Fira'awna ndaartindake on, wi'ii on kollon ɗum kaayeefi fu, aan Muusaa mbi'aa Haaruuna hooƴa sawru muuɗum faɗɗa yeeso Fira'awna, ndeen ndu laatoto mboddi.

¹⁰ Muusaa e Haaruuna ngari yeeso Fira'awna. Ɓe ngaɗi hono no Joomiraaɗo yamiri ɓe noon. Haaruuna faɗɗi sawru muuɗum yeeso Fira'awna e yeeso gollooɓe muuɗum, ndu laatii mboddi.

¹¹ Ndeen Fira'awna noddi jom'en anndal e joomiraaɓe dabareeji. Dabarankooɓe Misira ɓeen du ngaɗiri noon e dabareeji muɓɓen.

¹² Mono fuu faɗɗi sawru muuɗum, cabbi ɗiin fuu laatii bolle. Ndeen sawru Haaruuna nduun moɗi cabbi maɓɓe ɗiin fuu.

¹³ Ammaa ɓernde Fira'awna heddii ina yoori, o hettindanaaki ɓe. Ɗum laatorii hono no Joomiraaɗo wiirunoo noon.

Haala masiibaaji 10 kewtiiɗi leydi Misira Masiiba go'aɓo: Haala ndiyam laatiiɗam ƴiiƴam

¹⁴ Joomiraaɗo wi'i Muusaa: — Ɓernde Fira'awna na yoori, o salake yoppude Israa'iila'en ndilla.

¹⁵ Yahu to Fira'awna jaango illa subaka. Wakkati o wurtotoo faa o yaha maayo Nil ndeen, ndaroɗaa daande maayo ngoon faa kawraa e makko. Tiigoɗaa sawru waylinoondu mboddi nduun.

¹⁶ Mbi'aa Fira'awna: «Joomiraaɗo, Laamɗo Ibraninkooɓe nelii kam mi wi'ee: ‹Accu yimɓe am ndilla faa ɗowtanowoo kam ley ladde yoornde.› Ammaa faa joonin a hettindaaki.

¹⁷ Inan ko Joomiraaɗo wi'i: ‹Nii paamirtaa wo miin woni Joomiraaɗo.› Ndelle, mi fiiran ndiyam maayo Nil sawru wonndu e junngo am ndu de ɗam laatoo ƴiiƴam.

¹⁸ Liƴƴi gonɗi ley maayo Nil ɗiin mbaatan, ndiyam maayo ngoon du luuɓa. Ndeen yimɓe Misira kunngoto yarude ɗam.»

¹⁹ Joomiraaɗo wi'i Muusaa: — Mbi'aa Haaruuna hooƴa sawru muuɗum, foorta junngo muuɗum dow diyeele Misira fuu: Dow gooruuji maɓɓe mawɗi e pamari fuu, e dow pete maɓɓe e dow beeli maɓɓe e to ndiyam maɓɓe wattaa fuu faa ɗam laatoo ƴiiƴam. Ƴiiƴam ɗaam tawee ley leydi Misira fuu fay ley akalaaje e looɗe fuu.

²⁰ Muusaa e Haaruuna ngaɗi hono no Joomiraaɗo yamiri noon. Haaruuna ɓanti sawru, fiyi ndiyam maayo Nil ɗaam yeeso Fira'awna e gollooɓe muuɗum. Ndiyam ɗaam fuu laatii ƴiiƴam.

²¹ Liƴƴi gonɗi ley maayo Nil mbaati, ndiyam maayo ngoon luuɓi faa yimɓe Misira kunngii yarude ɗam. Ƴiiƴam na woni nokku fuu ley Misira.

²² Ammaa dabarankooɓe Misira ngaɗiri noon e dabareeji muɓɓen. De ɓernde Fira'awna heddii na yoori. O hettindanaaki ɓe. Ɗum laatorii hono no Joomiraaɗo wiirunoo noon.

²³ Ndeen Fira'awna yeccii suudu muuɗum, hillaaka e majjum.

²⁴ Yimɓe Misira fuu njehi mbasowi ɗakkol maayo Nil faa keɓa ndiyam njareteeɗam, sabo ɓe kunngake yarude ndiyam maayo Nil.

²⁵ Ndiyam maayo ngoon heddorii noon faa hiɓɓi balɗe jeɗɗi gaɗa ko Joomiraaɗo fiyi ngo ɗuum.

Masiiba ɗiɗaɓo: Haala paaɓi

²⁶ Caggal ɗuum Joomiraaɗo wi'i Muusaa: — Yahu to Fira'awna mbi'aa ɗum: «Inan ko Joomiraaɗo wi'i: Accu yimɓe am ndilla, ɗowtanowoo kam.

²⁷ Si a jaɓaay yoppude ɓe ndilla fu, mi hebbinan leydi maaɗa fuu paaɓi.

²⁸ Maayo Nil fuu heewan paaɓi, ɗi njaltan ɗi naata suudu maaɗa faa ɗo pukkotoɗaa, dow leeso maaɗa. Ɗi naatan du ley cuuɗi gollooɓe maa e yimɓe leydi maaɗa, ɗi naatan ley defirɗe maaɗa e nder le'e maaɗa diibirɗe conndi fuu.

²⁹ Paaɓi ɗiin ƴeeŋan dow maaɗa aan e yimɓe maaɗa e gollooɓe maa ɓeen fuu.»