Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Wurtagol 39 - Dewtere Laamɗo Fulfulde Burkina Faso


No kolte almaami'en ngaɗiraa

1 Ɓe ngolliri gaaraaji bulabulaaji e bojjitooji e boɗeeji coy, ɓe ngaɗi kolte gollitirɗe ley nokkuure seniinde ndeen. Ɓe ngaɗani Haaruuna kolte ceniiɗe hono no Joomiraaɗo yamiri Muusaa noon.

2 Ɓe ngaɗiri saayo deketeengo dow e kaŋŋe e gaaraaji bulabulaaji e bojjitooji e boɗeeji coy e leppi ɗaatuɗi.

3 Ɓe ciiwi kaŋŋe oon faa selbi hono lamel, ɓe ceeli ɗum, ɓe cewni hono gaaraaji, de ɓe kaɓɓidi ɗum e gaaraaji bulabulaaji e bojjitooji e boɗeeji coy e leppi ɗaatuɗi sanne. Ɓe canyiri ngo nyeenyal.

4 Saayo ngoon waɗanaa ɓoggoy ɗiɗoy kaɓɓaa dow balaaje ɗiɗi ɗeen.

5 Kaɓɓorgol canyiraangol nyeenyal nyootondiraa e maggo na fiilii ngo. Kangol du ɓe canyiri ngol kaŋŋe e gaaraaji bulabulaaji e bojjitooji e boɗeeji coy e leppi ɗaatuɗi, fodde no Joomiraaɗo yamirnoo Muusaa noon.

6 Ɓe ngatti kaaƴe onikis nder tiigorkoy mooriraakoy kaŋŋe. Inɗe ɓiɓɓe Israa'iila nyenyaa dow majje hono no maande nyenyirtee noon.

7 Ɓe ngatti ɗe dow balaaje saayo deketeengo dow ngoon, ɗe laatii miccintinooje Israa'iila'en fodde no Joomiraaɗo yamiri Muusaa noon.

8 Ɓe ngaɗi basel kiite ngel almaami haɓɓata dow ɓernde muuɗum. Ngel sanyiraa nyeenyal hono no saayo deketeengo dow, sanyiraango morri kaŋŋe ngoon noon. Ngel waɗiraa kaŋŋe e gaaraaji bulabulaaji e bojjitooji e boɗeeji coy e leppi ɗaatuɗi.

9 Ɓe cowi ngel nde wootere, njuuteefi maggel e njaajeefi maggel fuu poti, wo ɗum njaajeefi newre junngo.

10 Ɓe ngaɗi guurti kaaƴe dime nay dow maggel. Ɓe ngaɗi guurti kaaƴe dime nay ɓe takki dow maggel: Dow go'aɓol ngool hayre woɗeere coy wi'eteende sardiyus e oolde wi'eteende topaas e huɗo heccoore wi'eteende emerooda.

11 Dow ɗiɗaɓol ngool hayre huɗo heccoore wi'eteende malakit e siiwre wi'eteende safiir e ɗelkoore wi'eteende diyama.

12 Dow tataɓol ngool hayre woɗeere hono ndiyam gooro wi'eteende yasente e nde ciifi leydi-leydiire wi'eteende agate e woɗeere wi'eteende ameetis.

13 Dow nayaɓol ngool hayre huɗo heccoore seeɗa wi'eteende kirisoliita e raneere nde ciifi wi'eteende onikis e woɗeere seeɗa wi'eteende yaspa. Ɗe takkaa wootere wootere nder moorli kaŋŋe ɗiin.

14 Dow kaaƴe ɗeen ɓe nyenyi inɗe ɓiɓɓe Israa'iila sappo e ɗiɗo ɓeen, ɗe laatii maande. Dow hayre wootere fuu innde gooto, ko hollata lenyi Israa'iila sappo e ɗiɗi ɗiin.

15 Ɓe ngaɗi ɓoggi ɓilduɗi. Ɓe ngaɗiri ɗi kaŋŋe dimo karraaɗo faa ɓe kaɓɓa basel ngeel.

16 Ɓe ngaɗiri moorli ɗiɗi e jawe ɗiɗi e kaŋŋe de ɓe kaɓɓi e coɓɓuli maggel dowuuji ɗiɗi ɗiin.

17 Ɓe ɓili ɓilduɗi ɗiɗi ɗiin e jawe ɗeen.

18 Ɓe kaɓɓi ɗe to tiigorkoy mooraakoy ngonukoy dow balaaje saayo deketeengo dow ngoon faro yeeso.

19 Ɓe ngaɗi katin jawe kaŋŋe ɗiɗi, ɓe kaɓɓi dow coɓɓuli basel ɗiɗi leyiiji ɗiin, hakkunde maggel e saayo ngoon.

20 Ɓe ngaɗi jawe kaŋŋe ɗiɗi. Ɓe kaɓɓi e senngo lefoy saayo njokkukoy dow balaaje ɗiɗoy kooy, faro yeeso maggo, ɗum woni faro dow to lefoy kooy kawrata e kaɓɓorgol maggo toon.

21 Ɓe kaɓɓi ɓoggol bulabulawol e jawe basel gonungel dow ɓernde ngeel, de ɓe kaɓɓondiri ngol e jawe saayo ngoon, heɓa ngol heddoo ingol haɓɓii dow kaɓɓorgol ngool, taa ngol sotta, hono no Joomiraaɗo yamiri Muusaa noon.

22 Ɓe ngaɗi saayo bulabulaawo. Ɓe ngaɗiri ɗum gaaraaji bulabulaaji tan. Wo dow ngoon saayo deketeengo dow ngoon ɓornetee.

23 Saayo bulabulaawo ngoon waɗanaa daande, de daande ndeen waɗanaa kommbol taa seekoo.

24 Ɓe ngaɗi faro ley kommbol saayo ngoon alhaali ɓikkoy lekki rummaneehi. Ɓe ngaɗiri ɗum e gaaraaji bulabulaaji e bojjitooji e boɗeeji coy, mottaaɗi faa wooɗi.

25 Ɓe ngaɗi lenngi kaŋŋe dimo. Ɓe ngaɗi ɗi hakkunde alhaali ɓikkoy lekki rummaneehi kooy, ɓe piiltini ley kommbol saayo ngoon.

26 Ɓe ngaɗi lennguru wooturu e alhaali ɓinngel rummaneehi na njokkondiriri ɗiɗɗiɗi de ɓe piilni ley saayo ngoon, saabe waɗugol golle almaamaaku ɗeen fodde no Joomiraaɗo yamirnoo Muusaa noon.

27 Ɓe canyi leppi ɗaatuɗi mottaaɗi faa wooɗi, ɓe ngaɗani Haaruuna e ɓiɓɓe muuɗum forgooji ɓorneteeɗi ley ɗiin

28 e kufune almaamaaku e sarrahoy kenneteekoy ley.

29 Ɓe ngaɗi kaɓɓorgol tuppiniraangol gaaraaji feere feere, ɗi leppi ɗaatuɗi e gaaraaji bulabulaaji e bojjitooji e boɗeeji coy, nyootiraaɗi nyeenyal, hono no Joomiraaɗo yamiri Muusaa noon.

30 Ɓe kooƴi kaŋŋe dimo ɓe ngaɗi pilkol ceniingol. Ɓe nyenyi dow maggol haala kaa: CENINANAAƊUM JOOMIRAAƊO.

31 Ɓe ngaɗani ngol ɓoggol bulabulawol faa ngol haɓɓiree e kufune oon, hono no Joomiraaɗo yamiri Muusaa noon.


No golle suudu seniindu timminiraa

32 Nii ɓe timminiri golle nokkuure seniinde ndeen, ɗum woni Hukum Ceniiɗo oon. Israa'iila'en ngaɗi huunde fuu ko Joomiraaɗo yamirnoo Muusaa.

33 Ɓe ngaddi hukum oon to Muusaa. Ɗum woni hukum oon e gollitirɗe muuɗum: ngadirkoy e leɗɗe darnirɗe e leɗɗe pale e dammbugaaje e joƴƴinirɗe muɓɓen,

34 e kuurgal gaɗiraangal guri jawɗi bojjinaaɗi e kuurgal gaɗiraangal guri ɗaatuɗi moƴƴinaaɗi, e wudere senndunde Nokkuure Ɓurnde fuu Cenaade,

35 e Keesuwal Amaana ngaal e cabbi muuɗum e ommboode muuɗum to hakkeeji mooytete toon

36 e taabawal e gollitirɗe muuɗum fuu, e buuru cakketeeɗo

37 e joƴƴinirde fitillaaji waɗiraande kaŋŋe dimo, e fitillaaji joƴƴinteeɗi dow mayre, e gollitirɗe mayre fuu, e nebbam majji,

38 e wulirde ure waɗiraande kaŋŋe, e nebbam seningol, e ure buleteeɗe, e wudere uddirde dammbugal hukum oon,

39 e sakkirde waɗiraande njamndi mboɗeeri e njamndi mboɗeeri ngaɗiraandi giriyaasi e cabbi mayre e gollitirɗe mayre fuu e taasawal manngal e joƴƴinirde muuɗum,

40 e gude piileteeɗe taliyaare ndeen e kaɓɓirɗe muɓɓen e joƴƴinirɗe e ridoo dammbugal taliyaare ndeen e ɓoggi mayre e tiigorɗe mayre e gollitirɗe Nokkuure Seniinde e Hukum Ceniiɗo,

41 e kolte gaɗiraaɗe nyeenyal ɓorneteeɗe ley nokkuure seniinde ndeen. Ɗum woni kolte ceniiɗe ɗe almaami Haaruuna e ɓiɓɓe muuɗum ɓornotoo faa ngaɗa gollal almaamaaku ngaal.

42 Israa'iila'en ngaɗi golleeji ɗiin fuu hono no Joomiraaɗo yamirnoo Muusaa noon.

43 Muusaa yi'i golleeji ɗi ɓe ngaɗi ɗiin. O tawi ɓe ngaɗii huunde fuu hono no Joomiraaɗo yamiri. Ndeen o barkini ɓe.

© SIM International 2012, 2022

ကြှနျုပျတို့နောကျလိုကျပါ:



ကြော်ငြာတွေ