Wurtagol 37 - Dewtere Laamɗo Fulfulde Burkina Faso

No Keesuwal Amaana waɗiraa

¹ Besalel waɗiri keesuwal e leɗɗe ngawdi. Njuuteefi maggal wo piyanɗe ɗiɗi e feccere, njaajeefi maggal, fiyande wootere e feccere, tooweefi maggal du fiyande wootere e feccere.

² O mooyti nder maggal e yaasin maggal fuu kaŋŋe dimo. O fiiltini toni maggal koɗol kaŋŋe.

³ O siiwi kaŋŋe, o waɗi jawe nay, o seŋi e coɓɓuli maggal nay ɗiin fuu, ɗiɗi senngo ngoo, ɗiɗi senngo ngootoo.

⁴ O waɗi cabbi leɗɗe ngawdi, o mooytiri ɗi kaŋŋe.

⁵ O soorni ɗi nder jawe gonɗe e coɓɓuli keesuwal ngaal faa na ngal ɓantiree.

⁶ O hooƴi kaŋŋe dimo o waɗiri ommboode keesuwal ngaal. Njuuteefi ommboode ndeen wo piyanɗe ɗiɗi e feccere, njaajeefi mayre du fiyande wootere e feccere.

^7-8 O siiwi kaŋŋe, o tappi, o waɗi keruba'en ɗiɗo dow ommboode ndeen, gooto senngo ngoo, gooto du senngo ngootoo, iɓe ceŋii e ommboode ndeen.

⁹ Keruba'en ɓeen na peerti bippeele muɓɓen dow ommboode keesuwal ngaal, geese muɓɓen na kuccondiri, na njiima ngal.

No taabawal buuru cakketeeɗo waɗiraa

¹⁰ O waɗiri taabawal e leɗɗe ngawdi. Njuuteefi maggal wo piyanɗe ɗiɗi, njaajeefi maggal fiyande wootere, tooweefi maggal du fiyande wootere e feccere.

¹¹ O mooytiri ngal kaŋŋe dimo, o waɗi alhaali koɗol kaŋŋe dimo o takki ngal o fiilni.

¹² Ndeen o huulniri toni maggal leggal lobbal de o mooytiri ɗum kaŋŋe dimo o fiilni.

¹³ O siiwi kaŋŋe, o waɗi alhaali jawe nay de o seŋi e coɓɓuli maggal nay ɗiin fuu.

¹⁴ Jawe ɗeen na ɗakkondiri e koɗol piiliingol buttuli maggal ngool. Wo e majje cabbi ƴeptirɗi ngal ɗiin coornetee.

¹⁵ O waɗiri cabbi ɗiin leɗɗe ngawdi, o mooytiri ɗi kaŋŋe. Ɗi laatii ƴeptirɗi taabawal ngaal.

¹⁶ O waɗani ngal du gollitirɗe, ɗuum woni taasaaje e jarduɗe e taasahoy e jollooji saabe sadakaaji njaram. Ɗuum fuu e kaŋŋe dimo o waɗiri ɗum.

No joƴƴinirde fitillaaji waɗiraa

¹⁷ O siiwi kaŋŋe dimo, o tappi, o waɗi joƴƴinirde fitillaaji. O waɗani nde darorde e calɗi e gattirɗi nebbam nannduɗi e pinndi e bilite tiigiiɗe ndi. Ɗum fuu o seŋi ɗum e joƴƴinirde fitillaaji ndeen, ɗum laatii huunde wootere.

¹⁸ O waɗani ɗum calɗi jeegom, tati keediri salndu hakkundeeru nduun senngo ngoo, tati keddiiɗi du senngo ngoo too.

¹⁹ O waɗani calɗi jeegom ɗiin gattirɗi nebbam e alhaali pinndi amande e bilite muuɗum, salndu fuu gattirɗi tati.

²⁰ Ndeen o waɗani salndu hakkundeeru nduun gattirɗi nebbam nay e pinndi amande e bilite muuɗum.

²¹ O waɗi wilitere pinndi to calɗi ɗiɗi arandeeji ɗiin kawri e salndu hakkundeeru nduun toon. O waɗi wilitere pinndi to calɗi ɗiɗi ɗiɗaɓi ɗiin du kawri toon, o waɗi katin wilitere pinndi to calɗi ɗiɗi cakitiiɗi ɗiin kawri toon.

²² Bilite ɗeen e calɗi ɗiin e joƴƴinirde fitillaaji ndeen fuu laatii huunde wootere waɗiraande kaŋŋe dimo tappaaɗo.

²³ O waɗiri fitillaaji jeɗɗi ɗiin e nyifirkoy yiite e ɓoɓtirkoy ndoondi e kaŋŋe dimo.

²⁴ Joƴƴinirde ndeen e kujje mayre ɗeen fuu wo kilooji kaŋŋe dimo 30 ngaɗiraa.

No wulirde ure waɗiraa

²⁵ O waɗi wulirde ure. O waɗiri nde leɗɗe ngawdi. Njuuteefi mayre wo fiyande wootere, njaajeefi mayre, fiyande wootere, tooweefi mayre piyanɗe ɗiɗi. O waɗi alhaali luwe to dow coɓɓuli mayre. Iɗe ceŋii e mayre.

²⁶ O mooytiri nde kaŋŋe dimo dow mayre faa e luwe ɗeen. O fiiltini nde koɗol kaŋŋe.

²⁷ O waɗi jawe kaŋŋe ɗiɗi o takki e koɗol piilungol toni mayre ngool senngooji ɗiɗi ɗiin fuu faa coornee cabbi ƴeptirɗi nde ɗiin.

²⁸ O waɗiri cabbi ɗiin leɗɗe ngawdi, o mooytiri ɗi kaŋŋe.

No nebbam seningol e ure buleteeɗe ngaɗirtee

²⁹ O waɗi nebbam seningol, e ure buleteeɗe laaɓuɗe, hono no gaɗoowo uurdi waɗirta noon.