Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Wurtagol 36 - Dewtere Laamɗo Fulfulde Burkina Faso

1 Besalel e Oholiyab e neɗɗo fuu baawɗo gollal, mo Joomiraaɗo hokki hakkillo gollude ley suudu seniindu nduun fuu, ngaɗa ko Joomiraaɗo yamiri ɗuum fuu.

2 Muusaa noddi Besalel e Oholiyab e waawuɓe golle feere feere ɓe Joomiraaɗo hokki hakkillo ɓeen, ɗum woni ɓe ɓerɗe muɓɓen njardii gollude fuu.

3 Ɓe njaɓi to Muusaa dokke ɗe Israa'iila'en ngaddi saabe nyiɓugol nokkuure seniinde ndeen fuu. Yimɓe ɓeen na keddinoo na ngadda dokke yardamuye ɗeen weeti fuu.

4 Ndeen worɓe waawuɓe golle, gollanooɓe nokkuure seniinde ɓeen ndilli njoppi ɗe ngaɗannoo ɗeen.

5 Ɓe ngari to Muusaa, ɓe mbi'i ɗum: — Yimɓe na keddii na ngadda dokke saabe gollal ngal Joomiraaɗo yamiri waɗee ngaal faa ɓuri ko heƴi gollireede.

6 Muusaa hokki yamiroore gooynaa ley hoɗorde ndeen fuu wi'aa: — Taa fay gooto wadda dokkal saabe nyiɓugol nokkuure seniinde ndeen katin. Yimɓe hoɗorde ɓeen fuu kaɗaa waddude dokke katin. Noon yimɓe ɓeen accitiri waddude dokke,

7 sabo ko ɓe ngaddunoo ɗuum heƴii ko waɗiree gollal ngaal fuu faa heddii.


No Hukum Ceniiɗo waɗiraa

8 Worɓe waawuɓe golle gollanannooɓe nokkuure seniinde ɓeen ngaɗiri hukum oon e gude mawɗe tekkuɗe sappo. Ɓe ngaɗiri gude ɗeen leppi ɗaatuɗi e gaaraaji bulabulaaji e bojjitooji e boɗeeji coy. Ɓe tuppiniri keruba'en e nyeenyal dow majje.

9 Njuuteefi wudere fuu piyanɗe 28, njaajeefi muuɗum du piyanɗe nay. Ɗe fuu ɗe potu.

10 Ɓe nyootondiri joy majje laatii wudere wootere. Noon ɓe ngaɗiri joy keddiiɗe ɗeen du.

11 Ɓe ngaɗi ɓoggoy bulabulawoy 50, laatii kaɓɓirkoy de ɓe nyootondiri e toni wudere go'aɓerde ndeen. Ɓe ngaɗiri ɗiɗaɓerde ndeen du noon.

12 Ɓe ngaɗi ɓoggoy 50 nyootondiraakoy e wudere go'aɓerde ndeen kuccondira e 50 ngonkoy e wudere ɗiɗaɓerde ndeen.

13 Ɓe ngaɗi ngadirkoy kaŋŋe 50, de ɓe kaɓɓondiriri gude ɗeen e ngadirkoy kooy faa hukum oon laatii suudu wooturu.

14 Ɓe ngaɗiri gude 11 e leeɓi be'i faa huuriree Hukum Ceniiɗo oon.

15 Njuuteefi wudere fuu piyanɗe 30, njaajeefi muuɗum du piyanɗe nay. Ɗe fuu ɗe potu.

16 Ɓe nyootondiri joy majje gere gooto, jeegom keddiiɗe du gere gooto.

17 Ɓe ngaɗi kaɓɓirkoy 50 dow toni gude joy arandeeje nyootondiraaɗe laatii wootere ɗeen, kaɓɓirkoy 50 dow toni gude joy keddiiɗe ɗeen du.

18 Ɓe ngaɗiri ngadirkoy 50 e njamndi mboɗeeri faa ɓe ngadondira gude ɗeen, ɓe tiigoroo hukum oon faa ɗum laatoo suudu wooturu.

19 Ɓe ngaɗani hukum oon guri jawɗi bojjinaaɗi, ɓe kuuriri ɗum, tawti guri ɗaatuɗi moƴƴinaaɗi, ɓe ndeki dow arandeeji ɗiin.

20 Ɓe ngaɗiri darnirɗe hukum oon leɗɗe ngawdi.

21 Tooweefi leggal gootal fuu piyanɗe sappo, njaajeefi muuɗum du, fiyande wootere e feccere.

22 Ɓe ngaɗani darnirgal gootal fuu tiigorɗe ɗiɗi na camndondiri. Noon ɓe ngaɗirani darnirɗe ɗeen fuu.

23 Ɓe ngaɗii darnirɗe 20 faro horɗoore hukum oon.

24 Ɓe ngaɗiri joƴƴinirɗe 40 e cardi faa tiigoo darnirɗe ɗeen. Darnirgal fuu tiigorɗe ɗiɗi faa koyɗe ɗiɗi ɗeen fuu keɓi ɗo tiigoo.

25 Noon du ɓe ngaɗiri faro soɓɓirre hukum oon. Ɓe ngaɗi darnirɗe 20,

26 e joƴƴinirɗe muɓɓen gaɗiraaɗe cardi 40, darnirgal fuu joƴƴinirɗe ɗiɗi.

27 Ɓe ndarni darnirɗe jeegom faro gorgal hukum oon.

28 Ɓe ngaɗi darnirɗe ɗiɗi, ɓe ndarni dow coɓɓuli nder mayru.

29 Ɗe laatii coɓɓuli hukum oon, gilla ley ammaa ko'e majje kawri dow nder alhaali jawo. Noon ɗe ɗiɗi fuu ɗe ndarorii, ɗe laatii coɓɓuli ɗiɗɗiɗi gaɗa e yeeso fuu.

30 Ndelle ɗum hawri e darnirɗe jeetati e joƴƴinirɗe muɓɓen gaɗiraaɗe cardi 16, darnirgal fuu joƴƴinirɗe ɗiɗi.

31 Ɓe keɓi leɗɗe ngawdi juutuɗe paleteeɗe, joy majje faro soɓɓirre,

32 joy faro horɗoore hukum oon, joy du gaɗa makko, ɗuum woni faro gorgal.

33 Ɓe pali leggal hakkundeyal ngaal hakkunde leɗɗe ɗeen, gilla senngo ngo'o faa yaade ngo'o too.

34 Ɓe mooytiri darnirɗe ɗeen e pale ɗeen fuu kaŋŋe, ɓe ngaɗani darnirɗe ɗeen jawe kaŋŋe to kawri e pale ɗeen toon.

35 Ɓe ngaɗiri ridoo canyiraaɗo gaaraaji bulabulaaji e bojjitooji e boɗeeji coy e leppi ɗaatuɗi. Ndeen nyeenyuɗo baawɗo gollal waɗi alhaali keruba'en dow majjum.

36 Ɓe keɓani ridoo oon leɗɗe ngawdi nay darnirɗe. Ɓe mooyti ɗe kaŋŋe, ɓe ngaɗani ɗe ngadirkoy kaŋŋe. Ɓe ciiwi cardi, ɓe ngaɗi joƴƴinirɗe nay faa darnirɗe ɗeen cenngoo e muɓɓen.

37 Ɓe ngaɗani naarude hukum oon ridoo canyiraaɗo gaaraaji bulabulaaji e bojjitooji e boɗeeji coy e leppi ɗaatuɗi, ɗum fuu ɗum golliraa nyeenyal.

38 Ɓe ngaɗani ridoo oon darnirɗe joy e gadirɗe muɓɓen, ɓe mooyti ko'e majje kaŋŋe. Ɓe ngaɗiri joƴƴinirɗe majje joy e njamndi mboɗeeri.

© SIM International 2012, 2022

ကြှနျုပျတို့နောကျလိုကျပါ:



ကြော်ငြာတွေ