Wurtagol 35 - Dewtere Laamɗo Fulfulde Burkina Faso

Jamirooje dow nyalaande fowteteende

¹ Muusaa hawrondini yimɓe Israa'iila fuu, wi'i ɗum'en: — Inan ko Joomiraaɗo yamiri ngaɗon:

² Nyalaaɗe jeegom ngollirton golleeji mooɗon, ammaa nyannde jeɗɗaɓerde ndeen wo nyalaande fowteteende seniinde saabe Joomiraaɗo. Golluɗo nyannde ndeen fuu, wo bareteeɗo.

³ Taa kuɓɓon yiite ley galle mooɗon nyalaande fowteteende ndeen.

Haala dokke saabe Nokkuure Seniinde

⁴ Muusaa wi'i kawrital jamaare Israa'iila fuu: — Inan ko Joomiraaɗo yamiri:

⁵ Ittanon Joomiraaɗo dokke ley ko ngooduɗon. Moƴƴuɗo ɓernde kaajaaɗo waɗande Joomiraaɗo dokkal fuu, wadda kaŋŋe e cardi e njamndi mboɗeeri e

⁶ gaaraaji bulabulaaji e bojjitooji e boɗeeji coy e leppi ɗaatuɗi, e leeɓi be'i,

⁷ e guri jawɗi bojjinaaɗi e guri ɗaatuɗi moƴƴinaaɗi, e leɗɗe ngawdi,

⁸ e nebbam fitillaaji e ure nebbam seningol e ure buleteeɗe,

⁹ e kaaƴe dime bi'eteeɗe onikis e kaaƴe dime feere feere takketeeɗe e saayo deketeengo dow e basel kaɓɓeteengel dow ɓernde.

¹⁰ Waawuɓe gollal e mooɗon fuu, ngara ngaɗana Joomiraaɗo ko yamiri ɗuum.

¹¹ Ɓe ngaɗana o nokkuure seniinde e hukum muuɗum e kuurgal muuɗum e ngadirkoy e leɗɗe darnirɗe e pale e dammbugaaje e joƴƴinirɗe muɓɓen,

¹² tawti Keesuwal Amaana ngaal e cabbi muuɗum e ommboode to hakkeeji mooytetee toon e ridoo muuɗum

¹³ e taabawal e cabbi muuɗum e gollitirɗe muuɗum e buuru cakketeeɗo

¹⁴ e joƴƴinirde fitillaaji e fitillaaji ɗiin e gollitirɗe muɓɓen e nebbam fitillaaji

¹⁵ e wulirde ure e cabbi muuɗum e nebbam seningol e ure buleteeɗe e wudere uddirde dammbugal hukum oon

¹⁶ e sakkirde sadakaaji buleteeɗi e giriyaasi njamndi mboɗeeri e cabbi muuɗum e gollitirɗi muuɗum fuu e taasawal manngal ngaal e joƴƴinirde muuɗum

¹⁷ e gude piileteeɗe taliyaare ndeen e darnirɗe muɓɓen e joƴƴinirɗe muɓɓen e ridoo dammbugal taliyaare ndeen

¹⁸ e tonteeje Nokkuure Seniinde ndeen e tonteeje taliyaare muuɗum e ɓoggi muuɗum

¹⁹ e kolte gaɗiraaɗe nyeenyal ɓorneteeɗe ley nokkuure seniinde ndeen. Ɗum woni kolte ceniiɗe ɗe almaami Haaruuna e ɓiɓɓe muuɗum ɓornotoo faa ngaɗa gollal almaamaaku ngaal.

²⁰ Caggal ɗuum jamaare Israa'iila ndeen fuu ndilli yeeso Muusaa.

²¹ Moƴƴuɓe e yardiiɓe hokkude fuu ngaddi dokke muɓɓen ɗe ittani Joomiraaɗo saabe gollal Hukum Ceniiɗo e kujje gollitirɗe muuɗum fuu e kolte ceniiɗe.

²² Rewɓe e worɓe fuu ngari. Yardiiɓe hokkude fuu kokki ɓee jawe, ɓee koɗi, ɓee kootone kolli ɓee kootone noppi, ɓee kawlaaje, kujje kaŋŋe feere feere. Ɓe ɓanti dokke ɗeen yeeso Joomiraaɗo.

²³ Neɗɗo tawraaɗo gaaraaji bulabulaaji e bojjitooji e boɗeeji coy e leppi ɗaatuɗi e leppi leeɓi be'i e guri jawɗi e guri ɗaatuɗi fuu waddi to makko.

²⁴ Jogiiɗo cardi e njamndi mboɗeeri faa waɗa dokkal fuu waddi ɗum to Joomiraaɗo. Gooduɗo leɗɗe ngawdi du waddi ɗe saabe gollal ngaal.

²⁵ Rewɓe waawuɓe mottugol ngaddi gaaraaji bulabulaaji e bojjitooji e boɗeeji coy e leppi ɗaatuɗi ngaddi to makko.

²⁶ Rewɓe yardiiɓe waawuɓe golle leeɓi be'i fuu ngaddi ɗi to makko.

²⁷ Mawɓe lenyol du ngaddi kaaƴe dime bi'eteeɗe onikis e kaaƴe goɗɗe gatteteeɗe dow saayo deketeengo dow e basel kaɓɓeteengel dow ɓernde ngeel.

²⁸ Ɓe gaddi du urdiiji feere feere e nebbam fitillaaji e nebbam seningol e ure buleteeɗe.

²⁹ Worɓe e rewɓe fuu njardii waddude dokke ɗeen saabe gollal ngal Joomiraaɗo yamiri ngaal. Nii Israa'iila'en fuu ngaddiri dokke muɓɓen yardaamuye saabe gollal Joomiraaɗo to Muusaa.

Haala suɓagol Besalel e Oholiyab

³⁰ Muusaa wi'i Israa'iila'en: Ndaaree, Joomiraaɗo suɓake Besalel ɓii Uri, Uri ɓii Huur, mo lenyol Yahuuda.

³¹ Joomiraaɗo hebbinii o Ruuhu Laamɗo faa o heɓa hakkillo e paamal e anndal e caral e waɗude golleeji feere feere.

³² O heɓii hakkillo waɗirde kujje lobbe e kaŋŋe e cardi e njamndi mboɗeeri.

³³ Imo waawi nyeenyude kaaƴe dime nyaaynirteeɗe e sehirde leɗɗe nyeenyal waɗira iri golle fuu.

³⁴ Joomiraaɗo hokkii mo, kanko e Oholiyab ɓii Ahisamak mo lenyol Dan dabare ekintinde yimɓe.

³⁵ O hokkii ɓe hakkillo waɗude gollal nyo'ugol leppi bulabulaaji e bojjitooji e boɗeeji coy e leppi ɗaatuɗi. O hokkii ɓe du dabare sehude e nyo'ude e waɗude gollal waylɓe.