Wurtagol 33 - Dewtere Laamɗo Fulfulde Burkina Faso

No Muusaa e yimɓe Israa'iila ndilliri waamnde Sinayi

¹ Joomiraaɗo haaldi e Muusaa wi'i: — Dillu ɗo, aan e yimɓe ɓe mburtinoyɗaa leydi Misira ɓeen. Njahon leydi ndi kunaniimi maamiraaɓe mooɗon Ibrahiima e Isiyaaka e Yaakuuba, mbiimi: «Mi hokkan ƴuwdi mooɗon leydi ndiin.»

² Mi nelan maleyka ardoo on de mi riiwa Kanaaninkooɓe e Amorinkooɓe e Hittiyankooɓe e Perisinkooɓe e Hewinkooɓe e Yebusinkooɓe.

³ Njahon leydi ndi kosam e njuumndi ilata e muuɗum ndiin. Ammaa miin mi yaadataa e mooɗon, sabo wo on lenyol cattungol joorngol hoore.

⁴ Nde yimɓe ɓeen nannoo haalaaji tiiɗuɗi ɗiin fu, mboyi. Fay gooto maɓɓe wattaay koɗi nyaaƴirɗi.

⁵ Joomiraaɗo wi'i Muusaa: — Mbi'aa Israa'iila'en: «Onon wo on sattuɓe, yoorɓe ko'e. Si mi yaadii e mooɗon fay wawtu seeɗa fu, mi halkan on. Ndelle joonin, ittee kolte mooɗon nyaaƴirɗe ɗeen faa mi ndaara ko ngaɗammi on.»

⁶ Noon Israa'iila'en ittiri kolte muɓɓen nyaaƴirɗe ɗeen wakkati ndillannoo waamnde Sinayi ndeen.

Haala Hukum Hawrugol e Joomiraaɗo

⁷ Muusaa na woowunoo darnude hukum yaasin hoɗorde, to toowti seeɗa. O inndiri ɗum Hukum hawrugol e Joomiraaɗo. Neɗɗo fuu kaajanooɗo haaldude e Joomiraaɗo, sey yalta e hoɗorde ndeen de yaha hukum toon.

⁸ Nde Muusaa yahata hukum toon fuu, mono fuu wurtoto yaasin hukum muuɗum, daroo dammbugal faa nde o naatowi ley Hukum hawrugol e Joomiraaɗo toon.

⁹ Nde Muusaa naatata ley hukum oon fu, ruulde na jippoo, daroo dow dammbugal toon. Ndeen Joomiraaɗo haalda e makko.

¹⁰ Nde yimɓe ɓeen nji'i ruulde ndeen na darii dow dammbugal hukum oon fuu, iɓe ndaroo dammbuɗe hukumuuji maɓɓe, iɓe kippoo toon, iɓe cujidana Joomiraaɗo.

¹¹ Joomiraaɗo na haaldannoo e Muusaa hunnduko e hunnduko, hono no neɗɗo haaldirta e banndum nii. Caggal ɗuum o soƴƴoo ley hoɗorde, ammaa Yoosuwa ɓii Nuun ballo makko oon kaa heddoto ley hukum toon.

Ŋaarnde Muusaa to Joomiraaɗo

¹² Muusaa wi'i Joomiraaɗo: — A wi'ii kam: «arda yimɓe ɓee, ammaa a wi'aay kam moy woni mo njaadammi.» Ammaa a wi'ii: «miɗo anndiri ma e innde maaɗa, a heɓii du hinney yeeso am.»

¹³ Ndelle miɗo ŋaare, si mi heɓii hinney yeeso maaɗa fu, kollaa kam laawol maaɗa faa mi annde, de mi ɓeyda heɓude hinney yeeso maaɗa. Wooɗi ndardaa lenyol ngol hono jeyal maaɗa.

¹⁴ Ndeen Joomiraaɗo wi'i: — Mi yaadan e maaɗa, mi hokkete du powtiri.

¹⁵ Muusaa wi'i o: — Si aan e hoore maaɗa a yaadataa e amin fu, taa dillin min nokkuure ndee.

¹⁶ Si a yaadaay e amin noy faamirtee ko a ndaardii min hinney miin e yimɓe maaɗa. Ndelle sanaa njaadaa e amin sabo wo ɗuum hollata miin e yimɓe ma ɓeen miɗen ceedi e lenyi adunaaru keddiiɗi fuu.

¹⁷ Joomiraaɗo wi'i Muusaa: — Mi waɗan ko mbiiɗaa ɗuum ngam a heɓii hinney yeeso am wooɗi du, miɗo anndiri ma e innde maaɗa.

¹⁸ Ndeen Muusaa wi'i: — Miɗo ŋaare, hollam teddeengal maaɗa.

¹⁹ Joomiraaɗo wi'i Muusaa: — Mi waɗan moƴƴere e hinney am fuu paltoo yeeso maaɗa, ndeen mi innda innde am wi'eteende «Joomiraaɗo» yeeso maaɗa faa nanaa. Mi hollan hinney am mo kinnotoomi, yurmeende am du mo njurmotoomi.

²⁰ Ammaa a yi'ataa yeeso am, sabo walaa ji'oowo yeeso am de wuura.

²¹ Joomiraaɗo wi'i o: — Inan nokkuure ɗakkol am, dow tefaare to ndarotoɗaa.

²² Nde teddeengal am faltotoo ndeen, mi suuɗete ley ceekol tefaare ndeen, de mi suddire junngo am faa nde ƴaɓɓiimi.

²³ Ndeen mi hunca ngo, de njiiraa kam gaɗa ammaa a yi'ataa yeeso am.