Wurtagol 30 - Dewtere Laamɗo Fulfulde Burkina Faso

No wulirde ure waɗirtee

¹ Ngaɗaa wulirde ure. Ngaɗiraa nde leɗɗe ngawdi.

² Njuuteefi mayre waɗa fiyande wootere, njaajeefi mayre du fiyande wootere. Tooweefi mayre waɗa piyanɗe ɗiɗi. Ngaɗaa alhaali luwe de ceŋaa ɗum'en dow coɓɓuli mayre nay ɗiin.

³ Mooytaa kaŋŋe dimo dow mayre faa e luwe ɗeen de piilnaa nde koɗol kaŋŋe.

⁴ Ngaɗaa jawe kaŋŋe ɗiɗi takkaa e koɗol piilungol toni mayre ngool senngooji ɗiɗi ɗiin fuu faa coornee cabbi ƴeptirɗi nde ɗiin.

⁵ Ngaɗiraa cabbi ɗiin leɗɗe ngawdi, de mooytaa ɗi kaŋŋe.

⁶ Ndesaa nde yeeso ridoo cuuɗuɗo Keesuwal Amaana ngaal. Nde huccita e ommboode wonnde dow keesuwal ndeen, to kawrammi e maaɗa toon.

⁷ Subaka fuu, Haaruuna wula ure ɗe uurngol mbelngol dow mayre. Ɗum woni nde wari faa o moƴƴina fitillaaji ɗiin fuu.

⁸ Hono noon du, si o warii kiiral naange faa o huɓɓa fitillaaji ɗiin fu, o wula ure ɗeen. Ure ɗeen na cuurtinee yeeso Joomiraaɗo ley jamaanuuji fuu faa abada.

⁹ Taa mbulon ure ɗe ndagaaki naa dammuccere naa gawri dow mayre. Taa njooron inaboojam dow mayre faa ngaɗon sadaka.

¹⁰ Ley hitaande fuu, Haaruuna waɗa Iidi Mooytugol Hakkeeji nde wootere dow luwe sakkirde ndeen. O hooƴa ƴiiƴam sadaka oon o mooyta dow luwe sakkirde ndeen. Wo ɗum ƴiiƴam mooytoojam hakke. Noon ɗum waɗirtee ley jamaanuuji fuu. Sakkirde ndeen laatoo ɓurnde senaade yeeso Joomiraaɗo.

Haala ceede gaddeteeɗe ley nokkuure seniinde

¹¹ Joomiraaɗo haaldi e Muusaa wi'i:

¹² — Nde limoyɗaa Israa'iila'en fu, mono e maɓɓe fuu na tilsi hokka Joomiraaɗo ceede rimɗineede muuɗum. Noon waɗata taa masiiba fay gooto saama dow maɓɓe wakkati limgal ngaal.

¹³ Limaaɗo fuu yoɓa mbuuɗu ngu garamuuji cardi 5, ɗum woni feccere ponndirgal cardi ley suudu seniindu. Wo ɗum dokkal gaɗanteengal Joomiraaɗo.

¹⁴ Limaaɗo gilla mo duuɓi 20 faa yaade yeeso, na tilsi hokka ceede ɗeen saabe Joomiraaɗo.

¹⁵ Taa jom jawdi hokka ko ɓuri feccere mbuuɗu cardi nguun, taa talkaajo du hokka ko hewtaay feccere mbuuɗu nguun. Neɗɗo fuu hokka ɗe Joomiraaɗo saabe rimɗineede muuɗum.

¹⁶ Njaɓaa ceede rimɗineede ɗeen to Israa'iila'en, ɗe ngolliree ley Hukum Ceniiɗo toon. Ɗum laatoo ko miccintinta Joomiraaɗo rimɗingol maɓɓe.

No taasawal cardi waɗirtee

¹⁷ Joomiraaɗo haaldi e Muusaa wi'i: —

¹⁸ Ngaɗiraa taasawal manngal lootorgal almaami'en e njamndi mboɗeeri. Ngaɗiraa joƴƴinirde maggal du e njamndi mboɗeeri. Njoƴƴinaa ngal hakkunde sakkirde e Hukum Ceniiɗo. Ngattaa ngal ndiyam.

¹⁹ Haaruuna e ɓiɓɓe muuɗum lootirta juuɗe muɓɓen e koyɗe muɓɓen ndiyam ɗaam.

²⁰ Nde ɓe naatata ley hukum oon fuu, ɓe loota juuɗe maɓɓe e koyɗe maɓɓe tafon taa ɓe maaya. Nde ɓe ngarata sakkirde ɗoon faa ɓe cakkana Joomiraaɗo sadaka dokkal fuu,

²¹ ɓe loota juuɗe maɓɓe e koyɗe maɓɓe tafon taa ɓe maaya. Ɗum laatanoo Haaruuna e ƴuwdi muuɗum yamiroore tabitoore faa abada.

Haala nebbam seningol

²² Joomiraaɗo haaldi e Muusaa wi'i:

²³ — Kawrondinaa kilooji joy ure ɓurɗe woodde, ɗuum woni ɗakke lekki miiri peewɗe e kilooji ɗiɗi e feccere ceɓe lekki sinamon e kilooji ɗiɗi e feccere huɗooji uurooji

²⁴ e kilooji joy ceɓe kasiihi. Ɗum fuu ɗum fonndiree e ponndirgal suudu seniindu. Kooƴaa liitereeji nebbam jaytun jeegom de

²⁵ kawrondinaa ɗum fuu. Gaɗoowo uurdi oon diibida ɗum e nebbam jaytun. Wo ɗum nebbam seningol.

²⁶ Njooraa ɗam dow Hukum Ceniiɗo ceninaa ɗum kam e Keesuwal Amaana ngaal.

²⁷ Tawti taabawal ngaal e gollitirɗe muuɗum e joƴƴinirde fitillaaji ndeen e gollitirɗe muuɗum e wulirde ure ndeen

²⁸ e sakkirde sadakaaji buleteeɗi ndeen e gollitirɗe muuɗum fuu e taasawal manngal ngaal e joƴƴinirde muuɗum.

²⁹ Ceninanaa kujje ɗeen fuu Joomiraaɗo ɗe laatoo ceniiɗe sanne. Ko meemi ɗe fuu laatoto ko senii.

³⁰ Njooraa nebbam ɗaam dow Haaruuna e dow ɓiɓɓe muuɗum du, ceninaa ɓe faa ɓe ngollana kam gollal almaamaaku.

³¹ Kaalanaa Israa'iila'en, mbi'aa ɓe wo kanjam woni nebbam seningol ley jamaanuuji fuu.

³² Taa fay gooto wujoo ɗam, taa fay gooto waɗa iri majjam du, sabo wo ɗam nebbam ceniiɗam. Wo ɗam ceninanaaɗam Laamɗo, wooɗi du noon ɗam heddortoo ɗam ceniiɗam.

³³ Neɗɗo fuu gaɗuɗo iri majjam naa du jooranɗo ɗam goɗɗo mo wanaa almaami fuu ittete e lenyol.

No uurdi suudu seniindu waɗirtee

³⁴ Joomiraaɗo haaldi e Muusaa wi'i: — Kawrondinaa ure belɗe, ɗuum woni ɗakke uurooje e oniika e ɗakke galbanum. Ɓeydaa e majje ure ɗakke daneeje ɓurɗe woodde ko foti ure artiiɗe ɗeen pay.

³⁵ Ndeen gaɗoowo ure wara hawrondina ɗum waɗa urdi. O watta ndi lamɗam, wooɗi du ndi laatoo laaɓundi ceniindi yeeso am.

³⁶ Niisaa seeɗa mayri njoƴƴinaa yeeso Keesuwal Amaana, ley Hukum Ceniiɗo ɗo kawrammi e maaɗa ɗoon. Ndi laatoo ko senii sanne.

³⁷ Taa ngaɗanon ko'e mooɗon iri mayri. Ndi laatanoo on ko senii yeeso Joomiraaɗo.

³⁸ Neɗɗo gaɗuɗo iri mayri faa nana uurngol mayri fuu, ittete e lenyol.