Wurtagol 27 - Dewtere Laamɗo Fulfulde Burkina Faso

No sakkirde waɗirtee

¹ Ngaɗiraa sakkirde e leɗɗe ngawdi. Njuuteefi mayre e njaajeefi mayre fuu piyanɗe joy joy. Tooweefi mayre, piyanɗe tati.

² Ngaɗanaa nde alhaali luwe nay, soɓɓundu fuu gootal, ɗe ceŋoo e mayre. Mooytiraa nde njamndi mboɗeeri.

³ Ngaɗaa taasaaje to ndoondi wattetee e pelliiji e taasahoy mbiccirkoy ƴiiƴam e juwirɗe teewu e ɓoɓtirɗe ndoondi. Gollitirɗe sakkirde ɗeen fuu ngaɗiree njamndi mboɗeeri.

⁴ Canyanaa nde giriyaasi njamndi mboɗeeri de ceŋaa jawe njamndi mboɗeeri nay e coɓɓuli muuɗum nay ɗiin.

⁵ Piilnaa gilla ley sakkirde ndeen faa yottoo hakkunde tooweefi mayre.

⁶ Ngaɗanaa nde cabbi ngawdi, de mooytiraa ɗi njamndi mboɗeeri.

⁷ Ngattaa ɗi nder jawe gonɗe coɓɓuli mayre ɗeen, ɗe coornee e coɓɓuli mayre ɗiɗi ɗiin nde ƴeptetee fuu.

⁸ Sakkirde ndeen waɗiree leɗɗe ceelaaɗe, tawee du wo nde ɓolde hono luuro nii. Nde waɗiree no kollirmaami dow waamnde ndeen noon.

No kokuwol hukum Ceniiɗo waɗirtee

⁹ Ngaɗaa taliyaare fiiloo hukum oon de kuuriraa nde gude canyiraaɗe leppi ɗaatuɗi. Njuuteefi majje wo piyanɗe 100 faro horɗoore.

¹⁰ Ngaɗiranaa ɗe darnirɗe 20 e joƴƴinirɗe muɓɓen 20 e njamndi mboɗeeri. Ko gude ɗeen tiigortee e ko kaɓɓirtee fuu waɗiree cardi.

¹¹ Noon du ngaɗirtaa faro soɓɓirre hukum oon du. Njuuteefi gude ɗeen waɗa piyanɗe 100. Ngaɗanaa ɗe darnirɗe 20 e joƴƴinirɗe muɓɓen 20. Ɗe ngaɗiree njamndi mboɗeeri. Ko ɗe tiigortee e ko ɗe kaɓɓirtee fuu waɗiree cardi.

¹² Njuuteefi gude taliyaare ndeen waɗa piyanɗe 50 faro gorgal hukum oon e darnirɗe 10 e joƴƴinirɗe muɓɓen 10.

¹³ Faro lettugal toon du, njuuteefi gude ɗeen waɗa piyanɗe 50.

^14-15 Njuuteefi gude gattaaɗe senngo wooto wo piyanɗe 15 e darnirɗe muɓɓen tati e joƴƴinirɗe muɓɓen tati.

¹⁶ Ndeen ngaɗanaa dammbugal taliyaare ndeen du wudere uddirde sanyiraande gaaraaji bulabulaaji e bojjitooji e boɗeeji coy e leppi ɗaatuɗi, ɗum fuu ɗum golliree nyeenyal. Njuuteefi mayre waɗa piyanɗe 20. Ngaɗanaa ngal darnirɗe nay e joƴƴinirɗe muɓɓen.

¹⁷ Darnirɗe kokuwol ngool fuu ndobondiriree ngadirkoy ciiwiraakoy cardi. Ngaɗiraa joƴƴinirɗe majje ɗeen du njamndi mboɗeeri.

¹⁸ Njuuteefi kokuwol ngool waɗa piyanɗe 100, njaajeefi maggol piyanɗe 50, tooweefi maggol du piyanɗe 5, ɗum woni tooweefi gude canyiraaɗe leppi ɗaatuɗi ɗeen. Joƴƴinirɗe ɗeen du ngaɗiree njamndi mboɗeeri.

¹⁹ Gollitirɗe Hukum oon fuu ngaɗiree njamndi mboɗeeri. Tonteeje hukum oon e ɗe kokuwol taliyaare ndeen du fuu ngaɗiree njamndi mboɗeeri.

Haala nebbam fitillaaji

²⁰ Njamiraa Israa'iila'en ngaddane nebbam jaytun niisaaɗo, laaɓuɗam, ngatta e fitillaaji ɗiin faa keddoo na kuɓɓa wakkati fuu.

²¹ Haaruuna e ɓiɓɓe muuɗum ngatta ɗi ley Hukum Ceniiɗo, yaasin lefol cuuɗungol keesuwal Amaana ngool. Ɓe njoƴƴinira ɗi no ɗi mbaawiri heddaade iɗi njayna yeeso Joomiraaɗo gilla futuro faa yaade subaka. Yamiroore ndeen na tilsani Israa'iila'en ley jamaanuuji fuu faa abada.