Wurtagol 26 - Dewtere Laamɗo Fulfulde Burkina Faso

No hukum Ceniiɗo waɗirtee

¹ Ngaɗiraa hukum oon gude mawɗe tekkuɗe sappo. Gude ɗeen ngaɗiree leppi ɗaatuɗi e gaaraaji bulabulaaji e bojjitooji e boɗeeji coy. Keruba'en tuppiniree nyeenyal dow majje.

² Njuuteefi wudere fuu waɗa piyanɗe 28, njaajeefi muuɗum du piyanɗe nay. Ɗe fuu ɗe pota.

³ Nyootondiraa joy majje laatoo wudere wootere. Noon du ngaɗataa joy keddiiɗe ɗeen.

⁴ Ngaɗaa ɓoggoy bulabulahoy 50 laatoo kaɓɓirkoy de nyootondiraa e toni wudere go'aɓerde ndeen. Ngaɗiraa noon e wudere ɗiɗaɓerde ndeen du.

⁵ Ɓoggoy 50, nyootondiraakoy e wudere go'aɓerde ndeen, kuccondira e ɓoggoy 50 ngonkoy e wudere ɗiɗaɓerde ndeen.

⁶ Ngaɗaa ngadirkoy kaŋŋe 50, de kaɓɓonduraa gude ɗeen e ngadirkoy kooy faa hukum oon laatoo suudu wooturu.

⁷ Ngaɗiraa gude 11 e leeɓi be'i faa huuriree Hukum Ceniiɗo oon.

⁸ Njuuteefi wootere fuu piyanɗe 30, njaajeefi muuɗum du piyanɗe nay. Ɗe fuu ɗe pota.

⁹ Nyootondiraa joy majje gere gooto, jeegom keddiiɗe du gere gooto. Jeegoɓerde ndeen sowitoo yeeso suudu nduun.

¹⁰ Ngaɗaa kaɓɓirkoy 50 dow toni gude joy arandeeje nyootondiraaɗe laatii wootere ɗeen, kaɓɓirkoy 50 dow toni joy keddiiɗe ɗeen du.

¹¹ Ngaɗiraa ngadirkoy 50 e njamndi mboɗeeri, de kaɓɓaa gude ɗeen e makkoy faa tiigondira e hukum oon de ɗum fuu ɗum laatoo suudu wooturu.

¹² Feccere wudere leeɓi be'i heddiinde ndeen ɓilee gaɗa hukum oon.

¹³ Wudere mawnde waɗiraande leeɓi be'i, heedoore dow hukum ndeen, njuuteefi muuɗum ɓurda njuuteefi muuɗum leppi ɗaatuɗi ɗiin ko foti fiyande wootere faro tatteeji fuu. Hono noon nde jipportoo faro tatteeji hukum oon fuu, nde huura ɗum.

¹⁴ Ngaɗanaa hukum oon guri jawɗi bojjinaaɗi, kuuriraa ɗum, tawti guri ɗaatuɗi moƴƴinaaɗi, ndekaa dow arandeeji ɗiin.

¹⁵ Ngaɗiraa darnirɗe hukum oon leɗɗe ngawdi.

¹⁶ Tooweefi leggal gootal fuu piyanɗe sappo, njaajeefi muuɗum du, fiyande wootere e feccere.

¹⁷ Ngaɗanaa darnirgal gootal fuu tiigorɗe ɗiɗi na camndondiri. Ngaɗiranaa darnirɗe ɗeen fuu noon.

¹⁸ Ngaɗaa darnirɗe 20 faro horɗoore hukum oon.

¹⁹ Ngaɗiraa joƴƴinirɗe 40 e cardi faa tiigoo darnirɗe ɗeen. Darnirgal fuu tiigorɗe ɗiɗi faa koyɗe ɗiɗi ɗeen fuu keɓa ɗo tiigoo.

²⁰ Noon du ngaɗirtaa faro soɓɓirre hukum oon, ngaɗaa darnirɗe 20,

²¹ e joƴƴinirɗe muɓɓen gaɗiraaɗe cardi 40, darnirgal fuu joƴƴinirɗe ɗiɗi.

²² Ndarnaa darnirɗe jeegom faro gorgal hukum oon.

²³ Ngaɗaa darnirɗe ɗiɗi, ndarnaa dow coɓɓuli nder mayru.

²⁴ Ɗe laatoo coɓɓuli hukum oon, gilla ley ammaa ko'e majje kawra dow nder alhaali jawo. Noon ɗe ɗiɗi fuu ɗe ndarortoo, ɗe laatoo coɓɓuli ɗiɗɗiɗi gaɗa e yeeso fuu.

²⁵ Ndelle na ɗum hawrana darnirɗe jeetati e joƴƴinirɗe muɓɓen gaɗiraaɗe cardi 16, darnirgal fuu joƴƴinirɗe ɗiɗi.

²⁶ Keɓaa leɗɗe ngawdi juutuɗe paleteeɗe, joy majje faro soɓɓirre,

²⁷ joy faro horɗoore, joy du gaɗa, ɗuum woni gorgal hukum oon.

²⁸ Leggal hakkundeyal ngaal faloo hakkunde leɗɗe dariiɗe ɗeen, gilla senngo ngo'o faa yaade senngo ngo'o too.

²⁹ Mooytiraa darnirɗe ɗeen e pale ɗeen fuu kaŋŋe, ndeen ngaɗanaa darnirɗe ɗeen jawe kaŋŋe to kawri e pale ɗeen toon.

³⁰ Ndarnaa hukum oon fodde alhaali mo kollumaami dow waamnde oon.

³¹ Ngaɗaa ridoo canyiraanɗo gaaraaji bulabulaaji e bojjitooji e boɗeeji coy e leppi ɗaatuɗi. Ndeen nyeenyuɗo baawɗo gollal waɗa alhaali keruba'en dow mayre.

³² Keɓanaa ridoo oon leɗɗe ngawdi nay darnirɗe. Mooytaa ɗe kaŋŋe, ngaɗanaa ɗe ngadirkoy kaŋŋe. Ciiwaa cardi, ngaɗaa joƴƴinirɗe nay faa darnirɗe ɗeen cenngoo e muɓɓen.

³³ Ɓilaa ridoo oon e tiigorkoy kawritinkoy e gude kuuruɗe hukum oon kooy. Ridoo oon sennda Nokkuure Seniinde e Nokkuure Ɓurnde fuu Senaade ndeen. Kooƴaa keesuwal Amaana ngaal, njoƴƴinaa ɗum gaɗa ridoo oon

³⁴ ley Nokkuure Ɓurnde fuu Senaade toon de ommbaa keesuwal ngaal.

³⁵ Njoƴƴinaa taabawal ngaal yeeso ridoo oon, joƴƴinirde fitillaaji ndeen du faro horɗoore na hucciti e maggal, tawa ingal woni faro soɓɓirre ley nokkuure seniinde ndeen.

³⁶ Ngaɗanaa naarude hukum oon ridoo canyiraaɗo gaaraaji bulabulaaji e bojjitooji e boɗeeji coy e leppi ɗaatuɗi, ɗum fuu ɗum golliree nyeenyal.

³⁷ Keɓanaa ridoo oon leɗɗe ngawdi darnirɗe joy, mooytiraa ɗe kaŋŋe, ngaɗanaa ɗe ngadirkoy kaŋŋe faa koy kaɓɓoo e ridoo oon. Taaynaa njamndi mboɗeeri, ngaɗanaa darnirɗe ɗeen joƴƴinirɗe joy.