Wurtagol 25 - Dewtere Laamɗo Fulfulde Burkina Faso

Dokke gaddanteeɗe Joomiraaɗo

¹ Ndeen Joomiraaɗo wi'i Muusaa:

² — Mbi'aa Israa'iila'en ngaddana kam dokke. Njaɓon dokke ɗeen to ɓe ɓerɗe muɓɓen njardii hokkude fuu.

³ Dokke ɗe ɓe ngaddata ɗeen wo kaŋŋe e cardi e njamndi mboɗeeri

⁴ e gaaraaji bulabulaaji e bojjitooji e boɗeeji coy e leppi ɗaatuɗi e leeɓi be'i

⁵ e guri jawɗi bojjinaaɗi e guri ɗaatuɗi moƴƴinaaɗi e leɗɗe ngawdi

⁶ e nebbam fitillaaji e ure e nebbam seningol e ure buleteeɗe

⁷ e kaaƴe dime bi'eteeɗe onikis takketeeɗe dow saayo deketeengo dow e kaaƴe dime feere feere takketeeɗe dow saayo deketeengo dow ngoon e dow basel kaɓɓeteengel dow ɓernde.

⁸ Ɓe nyiɓana kam suudu seniindu de mi wonda e maɓɓe.

⁹ Mi hollete alhaali mayru alhaali kujje mayru fuu. No kolliranmi on noon pay, ngaɗirton ɗum, ɗum fuu.

No keesuwal Amaana Joomiraaɗo waɗirtee

¹⁰ Ɓe ngaɗira keesuwal e leɗɗe ngawdi. Njuuteefi maggal waɗa piyanɗe ɗiɗi e feccere, njaajeefi maggal fiyande wootere e feccere, tooweefi maggal du fiyande wootere e feccere.

¹¹ Mooytiraa nder maggal e yaasin maggal fuu kaŋŋe dimo wooɗi du takkaa toni maggal alhaali koɗol kaŋŋe piilnaa.

¹² Ciiwaa kaŋŋe, ngaɗaa jawe nay, ceŋaa e coɓɓuli maggal nay ɗiin fuu, ɗiɗi senngo ngoo, ɗiɗi senngo ngootoo.

¹³ Ngaɗaa cabbi leɗɗe ngawdi, mooytiraa ɗi kaŋŋe.

¹⁴ Coornaa ɗi nder jawe gonɗe e coɓɓuli keesuwal ngaal, heɓa na ngal ɓantiree.

¹⁵ Cabbi ɗiin keddoo nder jawe keesuwal ɗeen wakkati fuu, taa ɗi coortee.

¹⁶ Ndesaa ley keesuwal ngaal alluuje amaana ɗe kokkammaami ɗeen.

¹⁷ Kooƴaa kaŋŋe dimo, ngaɗiraa ommboode keesuwal ngaal. Njuuteefi ommboode ndeen waɗa piyanɗe ɗiɗi e feccere, njaajeefi muuɗum du fiyande wootere e feccere.

^18-19 Ciiwaa kaŋŋe, tappaa, ngaɗiraa keruba'en ɗiɗo, gooto senngo ngoo, gooto du senngo ngootoo, ɓe ceŋoo e ommboode ndeen.

²⁰ Keruba'en ɓeen na peerti bippeele muɓɓen dow ommboode keesuwal ngaal, geese muɓɓen na kuccondiri na njiima ngal.

²¹ Omtaa ommboode ndeen de ngattaa alluuje amaana ɗe kokkammi ma ɗeen ley keesuwal ngaal.

²² Wo dow ommboode ndeen, hakkunde keruba'en ɓeen kawrammi e maaɗa de mi haalane jamirooje am saabe Israa'iila'en.

No taabawal buuru cakketeeɗo waɗirtee

²³ Ngaɗiraa taabawal e leɗɗe ngawdi. Njuuteefi maggal waɗa piyanɗe ɗiɗi, njaajeefi maggal fiyande wootere, tooweefi maggal du fiyande wootere e feccere.

²⁴ Mooytiraa ngal kaŋŋe dimo de ngaɗaa alhaali koɗol kaŋŋe takkaa piilnaa ngal.

²⁵ Kuulniraa toni maggal leggal lobbal de mooytiraa ɗum kaŋŋe dimo piilnaa.

²⁶ Ngaɗanaa taabawal ngaal alhaali jawe kaŋŋe nay de ceŋaa e coɓɓuli maggal nay ɗiin fuu.

²⁷ Jawe ɗeen ceŋee ɗakkondira e koɗol piiliingol buttuli maggal ngool. Wo e majje cabbi ƴeptirɗi ngal ɗiin coornetee.

²⁸ Ngaɗiraa cabbi ɗiin leɗɗe ngawdi, de mooytaa ɗi kaŋŋe. Ɗi laatoo ƴeptirɗi taabawal ngaal.

²⁹ Ngaɗanaa ngal taasaaje e jarduɗe e jollooji e taasahoy saabe sadakaaji njaram. Ngaɗiraa kujje ɗeen fuu e kaŋŋe dimo.

³⁰ Wo dow taabawal ngaal ndekataa buuru cakketeeɗo oon. O tawee yeeso am wakkati fuu.

No joƴƴinirde fitillaaji waɗirtee

³¹ Ciiwaa kaŋŋe dimo, tappaa, ngaɗaa joƴƴinirde fitillaaji. Ngaɗanaa nde darorde e calɗi e gattirɗi nebbam nannduɗi e pinndi e bilite tiigiiɗe ndi. Ɗum fuu ɗum seŋoo e joƴƴinirde fitillaaji ndeen, ɗum laatoo huunde wootere.

³² Ngaɗanaa nde calɗi jeegom, tati keedira salndu hakkundeeru nduun senngo ngoo, tati keddiiɗi du senngo ngoo too.

³³ Ndeen ngaɗanaa calɗi jeegom ɗiin gattirɗi nebbam ɗi alhaali pinndi amande e bilite muuɗum, salndu fuu gattirɗi tati.

³⁴ De salndu hakkundeeru nduun, ngaɗanaa ɗum gattirɗi nebbam nay e pinndi amande e bilite muuɗum.

³⁵ Calɗi ɗiɗi arandeeji ɗiin kawra e salndu hakkundeeru nduun. Ngaɗaa wilitere pinndi ley calɗi ɗiɗi ɗiɗaɓi ɗiin. Ndeen ngaɗaa wilitere pinndi ley calɗi ɗiɗi cakitiiɗi ɗiin du.

³⁶ Bilite ɗeen e calɗi ɗiin e joƴƴinirde fitillaaji ndeen fuu laatoo huunde wootere, tafiraa ɗum kaŋŋe dimo tappaaɗo.

³⁷ Ngaɗaa fitillaaji jeɗɗi de njoƴƴinaa ɗi faa ɗi njayna yeeso majji.

³⁸ Ngaɗiranaa ɗi nyifirkoy yiite e ɓoɓtirkoy ndoondi e kaŋŋe dimo.

³⁹ Teddeefi majjum fuu laatoo kilooji kaŋŋe dimo 30.

⁴⁰ Ndaaraa faa wooɗa de ngaɗiraa huunde fuu fodde alhaali mo kollumaami dow waamnde oon.