Wurtagol 24 - Dewtere Laamɗo Fulfulde Burkina Faso

No Israa'iila'en njaɓiri amaana Joomiraaɗo

¹ Joomiraaɗo wi'iino Muusaa: — Ƴeeŋu, ngaraa to am dow waamnde nde, aan e Haaruuna e Nadabu e Abihu e mawɓe Israa'iila 70. On fuu cujidon to toowti e am.

² Ammaa Muusaa tan ɓattitotoo kam, heddiiɓe ɓeen kaa, taa ɓattoo. Israa'iila'en du ƴeenyida e maaɗa.

³ Muusaa wari haalani yimɓe ɓeen haalaaji Joomiraaɗo e jamirooje ɗe hokki fuu. Jamaare ndeen fuu nootii e daande wootere, wi'i: — Min ngaɗan ko Joomiraaɗo wi'i fuu!

⁴ Wakkati oon Muusaa winndi ko Joomiraaɗo wi'i ɗuum fuu. O ummii gilla fajiri, o dawi o darni kaaƴe ley waamnde ndeen, o waɗi sakkirde. O darni bimmbeeje 12 faa laatoo maande miccinoore lenyi Israa'iila 12 ɗiin.

⁵ Ndeen o waɗi jokolɓe nanngi kalahali, kirsi. Goɗɗi majji laatii sadakaaji bulanteeɗi Joomiraaɗo, goɗɗi du sadakaaji dewral.

⁶ Muusaa itti feccere ƴiiƴam majji watti ley taasaaje mawɗe, o wicci keddiiɗam ɗaam du dow sakkirde ndeen.

⁷ O hooƴi dewtere amaana ndeen, o janngani lenyol ngool. Ndeen ɓe mbi'i: — Ko Joomiraaɗo wi'i fuu, min ngaɗan, min kettinanto o.

⁸ Muusaa hooƴi ƴiiƴam keddiiɗam ɗaam wicci dow maɓɓe de wi'i: — Inan ƴiiƴam ceedotooɗam Joomiraaɗo haɓɓidii e mooɗon amaana dow haalaaji ɗii fuu.

⁹ Muusaa e Haaruuna e Nadabu e Abihu e mawɓe 70 ɓeen ƴeeŋi dow waamnde ndeen.

¹⁰ Ɓe nji'i Laamɗo Israa'iila. Ley koyɗe makko na nanndi e kaaƴe ɗelkooje, laaɓuɗe hono njaayri kammu.

¹¹ O halkaay mawɓe Israa'iila ɓeen. Ɓe njiiri Laamɗo e gite maɓɓe, iɓe mbuuri. Ɓe nyaami, ɓe njari.

No Muusaa hawriri e Joomiraaɗo dow waamnde

¹² Joomiraaɗo wi'i Muusaa: Ƴeeŋu ngaraa to am dow waamnde ndee de keɗoɗaa faa mi hokke alluuje kaaƴe cehaaɗe. Mi winndii jamirooje e sariyaaji dow majje faa ekintinaa yimɓe ɓeen.

¹³ Ndeen Muusaa e Yoosuwa ballo muuɗum oon ummorii waamnde Laamɗo toon.

¹⁴ Muusaa wi'i mawɓe ɓeen: — Keɗoɗon min ɗoo faa min ngarta. Inan Haaruuna e Huur keddodoto e mooɗon. Si won waɗduɓe kalala fu, njaha to maɓɓe faa ɓe kiitanoo ɗum'en.

¹⁵ Nde Muusaa ƴeeŋunoo waamnde Sinayi ndeen, ruulde suddi nde.

¹⁶ Teddeengal Joomiraaɗo jippii dow mayre. Balɗe jeegom ruulde ndeen suddiri waamnde ndeen. Ley nyalaande jeɗɗaɓerde Joomiraaɗo noddi Muusaa ley ruulde toon.

¹⁷ No Israa'iila'en njiiri teddeengal Joomiraaɗo dow waamnde noon, ina wa'i hono yiite nyaamoowe.

¹⁸ Muusaa naati faa ley ruulde ndeen dow waamnde toon. O heddii dow waamnde toon balɗe 40 jemma e nyalooma.