Wurtagol 22 - Dewtere Laamɗo Fulfulde Burkina Faso

Jamirooje dow ko goɗɗo jeyi

¹ Si gujjo helii suudu ley jemma, naatii e mayru, de nanngaa fiyaa faa maayii fu, hakke walaa dow maayde muuɗum.

² Ammaa si gite na nji'a, warude mo wo hakke. Tilay o yomnee. Si o walaa ko o yoɓa du, sey o sonnee saabe nguyka makko kaan.

³ Si ndaaba nga o wujji ngaan tawdaama e yonki, si wo ngaari naa araawa naa mbaalu, sey o yoɓa nde ɗiɗi.

⁴ Si goɗɗo na dura ley ngesa inabooje, de accii daabaaji muuɗum naatii nyaamii ngesa goɗɗo fu sey yoɓa joomum ko ɗi nyaami ɗuum ley ko ɓuri wooɗude e ngesa inabooje ngaan.

⁵ Si goɗɗo waɗii ngulu ley ladde de yiite ngeen nanngii gi'e faa yottii gese, nyaamii kaɓɓe gawri, naa gawri ndi tappaaka, naa ngesa ngaan fuu, tilay joomum yoɓa.

⁶ Si neɗɗo halfinii goɗɗo ceede, naa goɗɗum feere, de ɗum wujjaa ley wuro kalfinaaɗo oon, si gujjo oon nanngaama fu, sey yoɓa hono majjum kile ɗiɗi.

⁷ Si gujjo oon nanngaaka, sey kalfinaaɗo oon wara yeeso Laamɗo faa yimɓe nji'a wo kanko halfinanoo ɗum.

⁸ Si kalala dow jawdi waɗi hakkunde yimɓe ɗiɗo, si wo ngaari naa araawa naa mbaalu naa koltal naa huunde fuu ko wujjaa, faa mono e maɓɓe fuu wi'i wo kam jeyi ɗum, sey ɓe ngadda haala kaan yeeso Laamɗo. Mo Laamɗo nanngi oon, sey yoɓa ooto kile ɗiɗi.

⁹ Si neɗɗo halfinii banndum ngaari naa araawa naa mbaalu naa ndaaba laatiinga fuu de nga waatii naa koyngal magga helii naa nga wujjaama tawii fay gooto seedaaki fu,

¹⁰ hunayeere Joomiraaɗo heddoto hakkunde maɓɓe. Kalfinaaɗo nga oon hunoto meemaay nga de jeyɗo nga oon jaɓa ko o wi'i ɗuum, taa yoɓnoo mo.

¹¹ Si e junngo makko ndaaba ngaan wujjaa du, o yoɓan jeyɗo nga oon.

¹² Si wo huunde ladde nanngi nga, taƴii nga, nyaami du, sey o wadda ko heddii e magga faa laatoo seedee. Ndeen o yoɓataa kalfinɗo mo oon saabe ndaaba mbaraanga ngaan.

¹³ Si neɗɗo wuƴake ndaaba to goɗɗo, si nga nawnaama naa nga waatii tawii jeyɗo nga oon tawaaka fu, tilay o yoɓa.

¹⁴ Ammaa si jeyɗo nga oon na tawaa ɗoon fu, o yoɓataa. Si o wuƴino ndaaba ngaan fu, wo ceede nguƴaa ɗeen tan o yoɓata.

Jamirooje dow joonnde ley lenyol

¹⁵ Si goɗɗo eytii surbaajo mo haɓɓanaaka, de waaldi e muuɗum, tilay yoɓa ceede kaɓɓal de dewla mo.

¹⁶ Si baaba surbaajo oon wi'ii dewlintaa mo oon, tilay bonnuɗo mo oon yoɓa ceede hono kaɓɓal.

¹⁷ Taa accee sukunyaajo debbo wuura.

¹⁸ Neɗɗo fuu pukkodiiɗo e dammuccere, tilay waree.

¹⁹ Kirsanɗo alla feereejo fuu halkee. Wo Joomiraaɗo tan sakkantee.

²⁰ Taa ngaɗaa beero ko boni, taa torraa ɗum. Ngam onon du, on laatakeno weerɓe ley leydi Misira.

²¹ Taa torree atiime e debbo maayraaɗo gorum.

²² Si a torrii ɓe, ɓe mbullitoto kam, mi nanan bojji maɓɓe,

²³ de mi tikkane, mi warde kaafaahi. Rewɓe mooɗon keddoo ngalaa goriraaɓe, ɓiɓɓe mooɗon du laatoo atiime'en.

²⁴ Si a nyamlake neɗɗo hakkunde yimɓe am ceede, naa talkaajo gonɗo ɗakkol maaɗa, taa laatoɗaa hono tinoowo buuɗi, taa ndoolɗaa o yoɓe ceede ɓurɗe ɗe o jaɓi to maaɗa ɗeen.

²⁵ Si goɗɗo nyamlake ceede to maaɗa, de njaɓuɗaa suddamaare muuɗum faa laatoo tolma fu, sey kokkitaa mo nde illa naange saamaay.

²⁶ Sabo o walaa ko o suddoo. Si o jogaaki nde, ɗume o suddotoo, de o ɗaanoo? Si o wullitake kam, mi nanan bojji makko, sabo miin wo mi jurmotooɗo.

²⁷ Taa mbonkee Laamɗo, taa kuɗee ardiiɗo lenyol mooɗon.

²⁸ Taa calee hokkude kam ngeɗu ko keɓuɗon ley gese mooɗon e leɗɗe mooɗon fuu. Kokkon kam du awruuɓe mon worɓe.

²⁹ Noon ngaɗirton e na'i mooɗon e baali mooɗon du. Caggal rimeede majji, balɗe jeɗɗi ɗi ngaddata e inniraaɓe majji, de nyalaande jeetataɓerde ndeen, kokkon kam ɗi.

³⁰ On laatoto yimɓe am seniiɓe. Ndelle taa nyaamon teewu ngu huunde ladde taƴi, ammaa paɗɗanon ngu dawaaɗi.