Wurtagol 19 - Dewtere Laamɗo Fulfulde Burkina Faso

No Joomiraaɗo ɓangirani Israa'iila'en dow waamnde Sinayi

¹ Nyannde go'o lewru tataɓuru caggal wurtagol Israa'iila'en leydi Misira, ɓe njottii ladde Sinayi yoornde.

² Nde ɓe ndillunoo Refidim, ɓe njottii ladde Sinayi fu, ɓe koɗi yeeso waamnde Sinayi ley ladde toon.

³ Muusaa ƴeeŋi dow waamnde ndeen faa hawra e Laamɗo. Joomiraaɗo noddi o dow waamnde toon, wi'i o: — Inan ko kaalantaa yimɓe Israa'iila, ƴuwdi Yaakuuba:

⁴ Onon e ko'e mon, on nji'ii ko ngaɗumi Misirankooɓe. Mi yowii on hono dow bippeele ciilal de ngaddumi on to am.

⁵ Joonin du si on kettindake haala am, si on njokkii amaana am, on laatoto jeyal am korsungal hakkunde lenyi fuu, sabo miin jeyi adunaaru fuu.

⁶ On laatoto laamu almaami'en e lenyol ceniingol. Ɗi ngoni haalaaji ɗi kaalantaa Israa'iila'en.

⁷ Muusaa yeccii hoɗorde toon, noddi mawɓe cuuɗi haalani ɗum'en haalaaji ɗi Joomiraaɗo yamiri ɗum ɗiin fuu.

⁸ Caggal ɗuum yimɓe fuu nootii e daande wootere, mbi'i: — Ko Joomiraaɗo yamiri fuu min ngaɗan. Muusaa haalani Joomiraaɗo ko yimɓe ɓeen mbi'i.

⁹ Ndeen Joomiraaɗo wi'i Muusaa: — Mi waran to maa ley ruulde tekkunde faa yimɓe nana miɗo haalda e maaɗa heɓa ɓe koole faa abada. Muusaa haalani Joomiraaɗo ko yimɓe ɓeen mbi'i.

¹⁰ Joomiraaɗo wi'i Muusaa: — Yahu to yimɓe ɓeen, mbi'aa ɓe ɓe cenina ko'e maɓɓe hannden e jaango fuu. Ɓe lonna kaddule maɓɓe.

¹¹ Ndeen ɓe cegiloo faa wooɗa sabo nyalaande tataɓerde miin Joomiraaɗo, mi jippoto dow waamnde Sinayi yeeso Israa'iila'en fuu.

¹² Kollaa yimɓe ɓeen kaddi to ɓe ndarotoo ɓe piiloo waamnde ndeen, ɓe kakkila taa ɓe ƴeeŋa dow mayre, taa ɓe ɓattoo nde fey. Ko meemi waamnde ndeen fuu warete.

¹³ Ko meemi waamnde ndeen fuu taa junngo meema ɗum. Ɗum limnee kaaƴe maa ɗum fiɗee kure si wo ndaaba naa si wo ɓii-Aadama. Nde ɓe nani luwal njawdiri na fuufee fu, iɓe mbaawi ƴeeŋude.

¹⁴ Muusaa jippii waamnde ndeen, yehi to yimɓe ɓeen, senini ɗum'en. Ɓe lonni kaddule maɓɓe.

¹⁵ O wi'i ɓe: — Cegilanee faɓɓi-jaango. Taa fay gooto meema debbo.

¹⁶ Nyannde tataɓerde ndeen, gilla fajiri, pelnyaali e maƴƴe e ruulde tekkunde ngaɗi dow waamnde ndeen. Fuufaango luwal semmbiɗingo du nanaa. Yimɓe wonɓe ley hoɗorde ndeen fuu keddii na ndiwna kulol.

¹⁷ Muusaa wurtini yimɓe ɓeen ley hoɗorde muɓɓen faa ɓe kawra e Laamɗo. Ɓe ndarii ley waamnde ndeen.

¹⁸ Cuurki suddi waamnde Sinayi fuu sabo Joomiraaɗo jippake ley yiite. Cuurki kiin ina ƴeeŋa dow hono cuurki duppirde mawnde ni. Waamnde ndeen fuu dimmborii semmbe.

¹⁹ Fuufaango luwal ngoon na ɓeydoroo semmbe. Wakkati oon Muusaa haali de Laamɗo jaaborii ɗum daande nanndude e riggaango.

²⁰ Joomiraaɗo jippii dow seɓtoodu waamnde Sinayi ndeen, noddi Muusaa wara to muuɗum. Muusaa ƴeeŋi faa dow mayre.

²¹ Laamɗo wi'i Muusaa: — Jippa cappanaa yimɓe ɓeen taa karoo ɓattoo ndaara Joomiraaɗo de heewɓe muɓɓen kalka.

²² Almaami'en waawɓe ɓattaade kam miin Joomiraaɗo ɓeen du cenina ko'e muɓɓen taa mi halka ɗum'en.

²³ Muusaa wi'i Joomiraaɗo: — Yimɓe ɓeen mbaawaa ƴeeŋude dow waamnde Sinayi sabo aan e hoore maa a wi'ii min ngaɗa keerol to min ndarotoo min piiloo waamnde ndeen, min ndaarda nde wo nde seniinde.

²⁴ Joomiraaɗo wi'i mo: — Jippa ley hoɗorde toon de ƴeeŋidaa e Haaruuna, ammaa taa almaami'en e yimɓe ɓeen paltoo keerol ngool faa ƴeeŋa to am de mi halka ɗum'en.

²⁵ Muusaa jippii to yimɓe ɓeen, haalani ɗum'en.