Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Wurtagol 15 - Dewtere Laamɗo Fulfulde Burkina Faso


Jimol Muusaa e Israa'iila'en

1 Ndeen Muusaa e Israa'iila'en njimani Joomiraaɗo, mbi'i: Mi yimanan Joomiraaɗo sabo o heɓii jaalagol manngol. Pucci e waɗɗiiɓe ɗi fuu, o faɗɗii ɗum'en ley maayo.

2 Joomiraaɗo woni semmbe am, Kanko waɗi miɗo yima. Kanko woni kisinɗo kam. Kanko woni Laamɗo am: mi manan mo, Laamɗo baabiraaɓe am, mi teddinan mo.

3 Joomiraaɗo wo konunke mawɗo, innde makko woni Joomiraaɗo.

4 Torkooji pucci e konunkooɓe Fira'awna fuu, o faɗɗi ɗum'en ley maayo. Konunkooɓe Fira'awna semmbiɗinɓe njoolake ley Maayo Maaliya.

5 Ndiyam lugguɗam yoolii ɓe. Ɓe ndiƴƴii faa to luggi hono kaaƴe,

6 Yaa Joomiraaɗo, junngo maaɗa nyaamo, ina jogii baawɗe tedduɗe. Joomiraaɗo, junngo maaɗa nyaamo, wo niisoowo wayɓe.

7 Teddeengal maa manngal ngaal liɓirɗaa wayɓe maaɗa. A neldan tikkere maa mawnde ndeen, de ɓe kuɓɓa hono yiite heɓi nyoomal.

8 E henndu foofaango maa, diyeele kawriti. Diyeele bubbooje ndarii hono kokuuji. Diyeele lugguɗe njoori faa ley reedu maayo.

9 Wayɓe amin mbi'annoo: En ndiiwan ɓe, nanngen ɓe, de cennden jawdi maɓɓe, ngaɗen ɓe no muuyruɗen fuu. Coorten kaafaaje meeɗen de kalken ɓe.

10 Puufuɗaa de ndiyam maayo moɗi ɓe. Ɓe ndiƴƴowi hono njamndi ɓaleeri faa ley diyeele cemmbiɗinɗe ɗeen.

11 Moy woni nannduɗo e maaɗa, hakkunde allaaji goɗɗi, yaa Joomiraaɗo? Moy woodi darja e senaare hono maa, Aan kulɓiniiɗo, maneteeɗo, golloowo ko haayni!

12 A foortii junngo maa nyaamo, de leydi moɗi ɓe.

13 Ley hinney maa koolniiɗo, a ardake yimɓe ɓe ndimɗinɗaa ɓeen. E baawɗe maaɗa du ɗowirtaa ɓe, faa to joonnde maa seniinde ndeen.

14 Lenyi nani kabaaru majjum de ndiwni! Ɓerɗe jooɗiiɓe Filistiya taƴii.

15 Kulol manngol nanngii hooreeɓe Edom, ardiiɓe Mo'ab du na ndiwna. Nesi jooɗiiɓe Kanaana fuu taƴi.

16 Kulol e wemmbere caamii dow maɓɓe. Saabe baawɗe junngo maa ɓe ndeƴƴinto siw hono kaaƴe nii, faa yimɓe maa paltoo, yaa Joomiraaɗo, faa nde yimɓe ɓe ndimɗinɗaa ɓeen fuu paltii.

17 A nannan ɓe, de ndarnaa ɓe dow waamnde ndongu maaɗa. Joomiraaɗo, nokkuure nde ngaɗuɗaa joonnde maa, nokkuure maa seniinde nde juuɗe maaɗa ndarni ndeen.

18 Joomiraaɗo laamoto faa abada abadin!

19 Nde pucci Fira'awna e torkooji pucci muuɗum e waɗɗiiɓe pucci muuɗum naatunoo maayo ndeen, Joomiraaɗo wartiri ndiyam ɗaam dow maɓɓe, ammaa Israa'iila'en kaa njaaɓii dow leydi njoorndi hakkunde maayo.


Jimol Mariyama

20 Mariyama, sakiike Haaruuna debbo wo annabaajo. O hooƴi tummbugel pamarel, imo fiya imo wama. Ndeen rewɓe fuu mburtii, njokkii mo, ina piya tummbuɗe kamɓen du ina mbama.

21 Mariyama yimi, wi'i ɓe: Njimanee Joomiraaɗo, sabo heɓii jaalorgal manngal. Pucci e waɗɗiiɓe ɗi fuu o faɗɗii ɗum'en ley maayo.


Ndiyam Maara kaaɗɗam

22 Ndeen Muusaa ardii Israa'iila'en, ɓe ummii maayo Maaliya, ɓe naati ladde Sur. Balɗe tati ɓe njehiri ley ladde, ɓe keɓaay ndiyam.

23 Nde ɓe njottinoo Maara fu, ɓe kunngii yarude ndiyam muuɗum, sabo iɗam haaɗi sanne. Ɗum waɗi nokkuure ndeen inndiraa Maara (ɗum na fiirta kaaɗɗum).

24 Ndeen yimɓe ɓeen ɓernani Muusaa, de mbi'i ɗum: — Ɗume min njarata?

25 Muusaa wullitii Joomiraaɗo, de Joomiraaɗo holli ɗum leggal gomma. O faɗɗi ngal ley ndiyam ɗaam, ɗam laatii mbelɗam. Ɗoon Joomiraaɗo ndaartinii ɓe de hokki ɓe yamiroore.

26 O wi'i ɓe: Si on kettindanake daande am e goonga, on ngaɗii ko wooɗi yeeso am, on ɗowtanake jamirooje am fuu, miin Joomiraaɗo, Laamɗo mooɗon, mi fiirataa on masiibaaji ɗi piirunoomi Misirankooɓe ɗiin. Sabo wo miin woni Joomiraaɗo dannoowo on.

27 Ndeen ɓe njottii Elim. Toon ina woodi ilduɗe ndiyam 12 e leɗɗe tamarooje 70. Ɓe koɗi ɗoon ɗakkol ndiyam.

© SIM International 2012, 2022

ကြှနျုပျတို့နောကျလိုကျပါ:



ကြော်ငြာတွေ