Wurtagol 13 - Dewtere Laamɗo Fulfulde Burkina Faso

Yamiroore dow ko laatii awru fuu

¹ Joomiraaɗo haaldi e Muusaa wi'i:

² — Senndanam ko laatii awru fuu ley Israa'iila. Ko arti rimeede fuu, gilla awruuɓe ɓiɓɓe-Aadama faa hewti kulle, wo miin jeyi.

Haala Iidi Buuru mo jillaaka Rabilla

³ Ndeen Muusaa wi'i yimɓe ɓeen: — Miccoɗon nyalaande nde, wo nyalaande nde mburtiɗon Misira, ley leydi maccungaaku, sabo wo junngo Joomiraaɗo semmbiɗingo wurtini on. Taa nyaamon huunde fuu ko jillaa rabilla.

⁴ Hannden ley lewru wi'eteendu Abib mburtotoɗon.

⁵ Joomiraaɗo hunanakeno maamiraaɓe mooɗon hokkan on leydi Kanaaninkooɓe e Hittiyankooɓe e Amorinkooɓe e Hewinkooɓe e Yebusinkooɓe, leydi ndi kosam e njuumndi ilata e muuɗum. Nde Joomiraaɗo nanni on toon fu, ngaɗon iidi oon ley lewru nduun.

⁶ Sabo ley balɗe jeɗɗi on nyaaman buuru mo jillaaka rabilla. Ley nyalaande jeɗɗaɓerde ndeen, ngaɗanon Joomiraaɗo iidi.

⁷ Ley ɓalde jeɗɗi ɗeen fuu, nyaamon buuru mo jillaaka rabilla. Taa buuru jillaaɗo rabilla yi'ee, taa rabilla du yi'ee ley leydi mooɗon fuu.

⁸ Nyannde iidi ndeen, pillanoɗon ɓiɓɓe mooɗon, mbi'on ɗum'en: Min ngaɗii ɗum saabe ko Joomiraaɗo waɗani min nyannde nde min mburtinoo leydi Misira ndeen.

⁹ Iidi oon laatanto on huunde miccintinoore on, hono maande dow juuɗe mooɗon e dow tiiɗe mooɗon. Noon jamirooje Joomiraaɗo ngonirta e kunnduɗe mooɗon sabo wo kanko wurtini on leydi Misira e junngo makko semmbiɗingo.

¹⁰ Ndelle kakkilanon iidi oon ley hitaande fuu si wakkati muuɗum warii.

Haala ko laatii awru fuu

¹¹ Muusaa ɓeydi wi'i: — Si Joomiraaɗo nannii on ley leydi Kanaaninkooɓe de hokki on ndi hono no hunoraninoo on, onon e maamiraaɓe mooɗon noon fu,

¹² cakkanon mo awruuɓe mooɗon e ko artii rimeede ley kulle mon fuu. Joomiraaɗo kam jeyi awruuɓe worɓe fuu.

¹³ Ɓinngel araawa artaangel rimaa fuu, loomtinon ɗum e jawgel maa damngel, maa kelon hoore maggel, mbaron ngel. Awruuɓe mooɗon worɓe fuu ndimɗinanon kam ɗum'en.

¹⁴ Ndeen le, ley ko warata, si ɓiɓɓe mooɗon ƴamii on maanaa majjum fu, mbi'on ɗum'en: «Wo Joomiraaɗo wurtiniri min e baawɗe muuɗum mawɗe ley leydi Misira nder wuro maccungaaku.

¹⁵ Nde Fira'awna salinoo yoppude min min ndilla ndeen, Joomiraaɗo wari awruuɓe worɓe fuu tawaaɓe ley leydi Misira gilla e tagaaɓe faa e kulle. Saabe ɗuum de miɗen cakkana Joomiraaɗo awruwel gorel artaangel rimaa hakkunde kulle fuu. Ammaa awruuɓe amin ɓeen kaa wo min ndimɗinan ɗum'en.

¹⁶ Kirsamaaji ɗiin laatoto maande dow juuɗe mooɗon e dow tiiɗe mooɗon. Ɗi miccintinan wo junngo Joomiraaɗo semmbiɗingo wurtini on leydi Misira.»

No Laamɗo e hoorem ardorii yimɓe Israa'iila

¹⁷ Nde Fira'awna yoppunoo yimɓe Israa'iila ndilla ndeen, Laamɗo ƴuurinaay ɓe laawol dewoowol leydi Filistiyankooɓe, fay si wo kanngol ɓuri ɓadaade. Sabo Laamɗo wi'i: si yimɓe ɓeen nji'ii woldeeji fu, na mbaawi mimsitinde de njeccoo Misira.

¹⁸ Saabe ɗuum Laamɗo ƴuurni ɓe laawol laddewol faro maayo Maaliya. Israa'iila'en mburtii leydi Misira na cegilii hono yahooɓe wolde.

¹⁹ Muusaa hooƴi ƴi'e Yuusufi sabo oon wi'iino sakiraaɓe muuɗum: — Sikke walaa, Laamɗo warowan walla on. Kunanee kam yalla on ndillidan e ƴi'e am.

²⁰ Yimɓe Israa'iila ndilli Sukkot, njehi koɗowi Etam ɗakkol ladde yoornde.

²¹ Nyalooma fuu Joomiraaɗo ina ardorii ɓe ruulde nanndunde e bimmbeere faa holla ɓe laawol. Jemma du imo ardoroo ɓe iilde yiite nanndunde e bimmbeere faa yaynana ɓe. Ɗum waɗi de iɓe mbaawi yaade jemma e nyalooma fuu.

²² Ruulde ndeen seedataa e maɓɓe nyalooma, iilde ndeen du seedataa e maɓɓe jemma. Iɗe ngoni yeeso maɓɓe wakkati fuu.