Wurtagol 12 - Dewtere Laamɗo Fulfulde Burkina Faso

Nyannde iidi Faltagol

¹ Joomiraaɗo haaldi e Muusaa e Haaruuna ley leydi Misira wi'i ɗum'en:

² — Wo ndu lewru laatantoo on go'aɓurdu hakkunde lebbi fuu.

³ Njehee kaalanee suudu Israa'iila fuu mbi'on ɗum'en: Nyannde sappo lewru ndu, ɓaade fuu ittana yimɓe muuɗum jawgel maa damngel.

⁴ Si tawii yimɓe ɓaade wootere na pamɗani dammuccere muɓɓere fu, ɓe kawta e wondiiɓe maɓɓe ɓuruɓe ɓattaade fodde yimɓe nyaamooɓe. Ɓe cennda dammuccere ndeen hakkunde maɓɓe fodde ko mono fuu waawi nyaamude.

⁵ Sanaa tawee jawgel ngeel maa damngel ngeel walaa malal, tawee du ngel waɗii hitaande. Itton dammuccere ndeen hakkunde ɓiɓɓe baali maa be'i.

⁶ Kiilnoɗon nde faa nyannde 14 lewru ndu. Wakkati caamal naange yimɓe Israa'iila fuu kirsa dammucce cuɓaaɗe ɗeen.

⁷ Ɓe itta ƴiiƴam majje, ɓe buja seraaji dammbuɗe e tiiɗe majje ɗo ɓe nyaamata ɗe ɗoon.

⁸ Ley jemma oon, ɓe nduppa teewu nguun, ɓe nyaamda ngu e buuru mo jillaaka rabilla e haakooji kaaɗuɗi.

⁹ Taa nyaamon teewu nguun tawee wo ngu keccu maa njongaangu. Nduppidon ngu e hoore e koyɗe e tetekki fuu.

¹⁰ Taa ndesanon ɗum jaango. Si ɗum heddake faa hewti subaka fu, paɗɗon ɗum ley yiite.

¹¹ Inan no nyaamroton teewu nguun: Kaɓɓoɗon kaɓɓorɗe mooɗon, ɓornoɗon paɗe mooɗon, njogoɗon cabbi mooɗon. Karoɗon, nyaamon law. Wo ɗum iidi Faltagol Joomiraaɗo.

¹² Jemma oon mi rewan ley leydi Misira, mi waran ko laatii awru ley mayri fuu, gilla e tagaaɓe faa yaha e kulle. Noon ngaɗiranmi sariyaaji am dow allaaji Misira fuu. Miin woni Joomiraaɗo.

¹³ Ƴiiƴam ɗam mooytoton e dammbuɗe mooɗon ɗaam laatanto on maande dow cuuɗi mooɗon ɗo ngonɗon. Ɗo njiimi ƴiiƴam ɗaam fu, mi faltoto. Ndeen masiiba kalkoowo oon hewtataako on wakkati piyanmi leydi Misira ndeen.

¹⁴ Nyalaande ndeen laatanto on nyalaande miccintinoore faa ngaɗanon kam miin Joomiraaɗo iidi mawɗo. Nde laatanoo on yamiroore heddotoonde ley jamaanuuji garooji fuu faa abada.

Haala Iidi buuru mo jillaaka rabilla

¹⁵ Balɗe jeɗɗi nyaamirton buuru mo jillaaka rabilla. Nyannde arandeere ndeen, itton rabilla tawaaɗo ley cuuɗi mon fuu. Sabo neɗɗo nyaamuɗo buuru gattaaɗo rabilla hakkunde nyalaande go'aɓerde e nyalaande jeɗɗaɓerde ndeen fu, ittete hakkunde lenyol Israa'iila.

¹⁶ Nyalaande go'aɓerde ndeen e nyalaande jeɗɗaɓerde ndeen, ngaɗon kawrital ceniingal. Taa ngollon gollal fay gootal ley balɗe ɗeen si wanaa bangal ndefu ko nyaamoton.

¹⁷ Ngaɗon Iidi Buuru mo Jillaaka Rabilla, sabo wo nyalaande majjum pay mburtinirammi on geɓe geɓe ley leydi Misira. Miccitoɗon, nyalaande ndeen laatanoo on yamiroore heddotoonde ley jamaanuuji garooji fuu faa abada.

¹⁸ Nyannde 14 ley lewru go'aɓurdu wakkati caamal naange faa yaade 21 mayru caamal naange, nyaamon buuruuje ɗe njillaaka rabilla.

¹⁹ Ley balɗe jeɗɗi ɗeen taa rabilla tawee ley cuuɗi mooɗon fey, sabo neɗɗo fuu nyaamuɗo buuru jillaaɗo rabilla, si joomum wo janano naa Israa'iilanke dimo fuu, ittete ley kawrital suudu Israa'iila.

²⁰ On njeyaa nyaamude fay huunde jillaande rabilla. Ley to njooɗiɗon fuu, ko jillaaka rabilla tan nyaamoton.

Haala Iidi Faltagol go'aɓo

²¹ Ndeen Muusaa noddi mawɓe Israa'iila fuu, wi'i ɗum'en: Njehee ittanowee cuuɗi mooɗon jawgel maa damngel faa kirson koy saabe iidi Faltagol.

²² Itton liccoy haakolooji lekki hisopi, cuuwon koy nder le'e gonduɗe e ƴiiƴam de mbiccon ɗam dow tiiɗe dammbuɗe mooɗon e seraaji majje. De taa fay gooto mooɗon wurtoo suudu muuɗum faa ɗo weeti.

²³ Nde Joomiraaɗo fantata faa fiya yimɓe Misira fu, yi'an ƴiiƴam e tiiɗe dammbuɗe mon e seraaji majje. Ndeen o faltoto, o accataa kalkoowo oon naata cuuɗi mooɗon de fiya on wara.

²⁴ Ɗum laatanto on yamiroore onon e ƴuwdi mooɗon faa abada.

²⁵ Nde naatoyɗon ley leydi ndi Joomiraaɗo aadii hokkude on ndiin fu, ngaɗon iidi oon.

²⁶ Si sukaaɓe mooɗon ƴamii on ko waɗi oɗon ngaɗa noon fu,

²⁷ mbi'on ɗum'en: «Wo kirsamaari ngaɗanaandi Joomiraaɗo nyannde iidi Faltagol. Nde yimɓe Israa'iila ngonnoo ley leydi Misira ndeen, Joomiraaɗo faltii cuuɗi muɓɓen, de fiyiri yimɓe Misira maayde. Enen kaa, o danni en.» Ndeen yimɓe Israa'iila fuu kippii, cujidani Joomiraaɗo.

²⁸ Caggal ɗuum ɓe njehi, ɓe ngaɗiri noon. Ɓe ngaɗi huunde fuu ko Joomiraaɗo yamirnoo Muusaa e Haaruuna.

Masiiba sappoɓo: Maayde ko laatii awru leydi Misira fuu

²⁹ Hakkunde jemma, Joomiraaɗo fiyi ko laatii awru ley leydi Misira fuu, wari ɗum'en, gilla afo Fira'awna kaananke Misira jooɗiiɗo dow jooɗorgal laamu muuɗum faa e awruuɓe uddaaɓe ley kasu e ko arti rimeede ley kulle fuu.

³⁰ Fira'awna ummii ley jemma oon, kam e gollooɓe muuɗum e yimɓe Misira fuu. Wullaango manngo nanaa ley Misira sabo walaa fuu suudu ndu maayɗo waɗaay e muuɗum.

³¹ Ley jemma oon, Fira'awna noddi Muusaa e Haaruuna, wi'i ɗum'en: — Ummee, mburtoɗon hakkunde yimɓe am, onon e Israa'iila'en. Njehee teddinowee Joomiraaɗo hono no ŋaaroriɗon noon.

³² Kooƴee dammucce mooɗon e na'i mooɗon hono no mbiiruɗon noon de ndillon. Ŋaaroɗon Laamɗo mooɗon barkina kam miin du.

³³ Yimɓe Misira ɓilli yimɓe ɓeen faa ndilla leydi muɓɓen law sabo ɓe miilii ɓe fuu ɓe maayan.

³⁴ Israa'iila'en kooƴi conndi muɓɓen ndi ndiibunoo de njillaay rabilla ndiin. Ɓe ngatti diibirɗe maɓɓe ley kaddule maɓɓe, ɓe mbakkii.

³⁵ Israa'iila'en ngaɗi ko Muusaa yamirnoo ɗum'en: Ɓe ndookii Misirankooɓe gineeji gaɗiraaɗi kaŋŋe e cardi e kaddule.

³⁶ Joomiraaɗo waɗi ɓe keɓi moƴƴere yeeso Misirankooɓe ɓeen. Ɓeen kokki ɓe ko ɓe ndookii fuu. Noon ɓe ɓoliri Misirankooɓe.

No Israa'iila'en mburtorii leydi Misira.

³⁷ Israa'iila'en ummii Ramses ponndii Sukkot. Limoore maɓɓe wo worɓe ujunaaje keme njeegom (600.000), baka rewɓe e sukaaɓe walaa.

³⁸ Ɓe njaadi e dammucce e na'i keewɗi. Jamaare nde lenyi feere feere du njaadi e maɓɓe.

³⁹ Ɓe kooƴi conndi ndiibaandi ndi ɓe ngaɗunoo gilla Misira ndiin, ɓe ca'i, ɓe ngaɗi buuruuje daɓɓe ɗe njillaaka rabilla. Ɓe keɓayno jillude rabilla ley conndi ndiibaandi ndiin sakko ndi ƴuufa, sabo ɓe ndiiwaama ley Misira, wooɗi du ɓe mbaawaay hooƴande ko'e maɓɓe njooɓaari.

⁴⁰ Duuɓi 430 Israa'iila'en njooɗorii ley leydi Misira.

⁴¹ Nde duuɓi 430 ɗiin kiɓɓunoo fu, ley nyalaande majjum pay jamaare Joomiraaɗo ndeen fuu wurtorii leydi Misira geɓe geɓe.

⁴² Hono no Joomiraaɗo haybirani jemma oon faa wurtina yimɓe muuɗum leydi Misira noon, wo noon Israa'iila'en kaaniri haybande jemma oon ley jamanuuji fuu sabo jemma oon wo jemma miccintinoowo ɗum'en ko Joomiraaɗo waɗani ɗum'en.

Yamiroore dow iidi Faltagol

⁴³ Joomiraaɗo wi'i Muusaa e Haaruuna: — Inan yamiroore dow iidi faltagol: Janano fay gooto waawaa nyaamude nyaamdu majjum.

⁴⁴ Maccuɗo coodaaɗo, si tawii wo taadaaɗo fu, ina waawi nyaamude ɗum.

⁴⁵ Beero naa adaaɗo gollal fuu waawaa nyaamude ɗum.

⁴⁶ Ɗum nyaamete ley suudu wooturu. On mburtintaa teewu nguun yaasin. On kelataa ƴi'al fay gootal.

⁴⁷ Kawrital Israa'iila fuu sanaa waɗa iidi oon.

⁴⁸ Si won janano kaajaaɗo waɗugol iidi Faltagol Joomiraaɗo oon fu, na tilsi worɓe tawaaɓe ley suudu muuɗum fuu taadee. Ndeen imo waawi warude o waɗa iidi oon hono no Israa'iila'en noon. Mo taadaaka fuu waawaa nyaamude ɗum.

⁴⁹ Yamiroore wootere ndeen na woodani ɓii wuro e janano gonɗo hakkunde mooɗon fuu.

⁵⁰ Yimɓe Israa'iila fuu ngaɗiri noon. Ɓe ngaɗiri hono no Joomiraaɗo yamiri Muusaa e Haaruuna noon.

⁵¹ Nyannde ndeen pay, Joomiraaɗo wurtiniri jama'aaje Israa'iila'en ɓeen ley leydi Misira geɓe geɓe.