Wurtagol 11 - Dewtere Laamɗo Fulfulde Burkina Faso

No masiiba sappoɓo sapporaa

¹ Joomiraaɗo wi'i Muusaa: — Mi fiiran Fira'awna e leydi Misira fuu masiiba gooto tan katin. Caggal ɗuum, o accan on ndillon, wo o riiwan on jaati ndillon leydi makko.

² Kaalanaa yimɓe Israa'iila, mbi'a ɓe: «Gorko fuu rookoo koddo muuɗum gorko, debbo du ŋaaroo koddo muuɗum debbo gineeji gaɗiraaɗi kaŋŋe e cardi.»

³ Joomiraaɗo waɗi yimɓe Israa'iila keɓi moƴƴere e gite yimɓe Misira. Katin du Muusaa wo teddinaaɗo sanne ley leydi Misira, yeeso gollooɓe Fira'awna e yeeso yimɓe leydi ndiin fuu.

⁴ Muusaa wi'i: — Inan ko Joomiraaɗo wi'i: Hakkunde jemma mi yuusoto ley Misira.

⁵ Ko laatii awru ley leydi Misira fuu maayan, gilla afo Fira'awna jooɗiiɗo dow jooɗorgal laamu muuɗum faa hewta afo korɗo niisoowo tawta awru daabaaji fuu.

⁶ Bullaali mawɗi ngaɗan ley leydi Misira fuu, ɗi iri muɓɓen ngaɗayno abada, wooɗi ngaɗataa du katin.

⁷ Ammaa ley yimɓe Israa'iila kaa, nanataake fay ɗo rawaandu ŋuuri ɓii Aadama naa ndaaba faa paamon Joomiraaɗo senndii Misirankooɓe e Israa'iila'en.

⁸ Ndeen, gollooɓe maaɗa ɓeen fuu ngaran to am de kippoo yeeso am, mbi'a kam: «Dillu, aan e jokkuɓe ma fuu!» Ndeen mi dillan. Muusaa wurtii to Fira'awna, ina tikki sanne.

⁹ Ndeen Joomiraaɗo wi'i Muusaa: — Ko Fira'awna hettindantaako ma ɗuum, wo faa mi ɗuuɗina kaayeefiiji am ley leydi Misira.

¹⁰ Muusaa e Haaruuna ngaɗi maandeeji kaayniiɗi ɗiin fuu yeeso Fira'awna, ammaa Joomiraaɗo yoorni ɓernde Fira'awna, o accaay Israa'iila'en mburtii leydi makko.