Tindinoowo 6 - Dewtere Laamɗo Fulfulde Burkina Faso

¹ Mi taykake bonanda goɗɗo na sori naange nge, de bonanda oon na teddani ɓii-Aadama:

² Na woodi mo Laamɗo hokki jawdi e danyal e darja faa huunde fuu nyakaay mo, ammaa Laamɗo hokkaay mo weltoraade ɗum, wo goɗɗo nawtortoo ɗum. Ɗum fuu wo ɗum ɓolum, wo bone mettinoowo ɓernde.

³ Neɗɗo na waawi heɓude sukaaɓe hemre de juuta balɗe, ammaa no o juutiri balɗe fu, si o weltoraaki keɓal makko, o heɓaay uweede wooɗa fu, miɗo waawi wi'ude cukalel ngel rimdaaka e yonki na samti mo.

⁴ Ngel warii ɓolum, ngel dilli e nimre, walaa fuu nanuɗo innde maggel.

⁵ Ngel yi'aay naange, ngel anndaa fay gootum, de inngel ɓuri oon gorko heɓude fowtere,

⁶ fay si o wuurnoo duuɓi ujunaaje sowre, nafataa si o weltoraaki nguurndam makko. Wanaa timmoode yimɓe fuu laatoto gootum naa?

⁷ Ko neɗɗo tampanta fuu wo faa hebbina hunnduko muuɗum, de ko haarataa abada.

⁸ Ɗume goodal jom hakkillo ɓurdi ngal puuyɗo? Talka annduɗo no wondirta e yimɓe du, nafaa oye heɓata?

⁹ Halal maa ngal njogiɗaa na ɓuri ko miilotoɗaa heɓude. Ɗum du fuu wo ɗum ɓolum, wo riiwude henndu.

¹⁰ Huunde fuu na woodi innde muuɗum, ɓii-Aadama du na anndaa no wa'i. Fay gooto suusataa haɓude e ɓurɗo ɗum semmbe.

¹¹ Si haalaaji keewii fu, ko nafataa du heewan. Ɗume ɗum nafata ɓii-Aadama?

¹² Moy waawi anndude ko moƴƴani neɗɗo ley nyalakoy muuɗum ɓoloy kooy? Fuu wo paltotookoy hono ɗooki. Moy waawi hollude mo ko waroyta ley adunaaru sorunde naange caggal dillugol makko?