Limle 26 - Dewtere Laamɗo Fulfulde Burkina Faso

¹ Joomiraaɗo haaldi e Muusaa e Eliyajar ɓii almaami Haaruuna wi'i: —

² Limon worɓe gilla ɓe duuɓi 20 yaade yeeso, hewtuɓe tiigaade kaɓitirɗe konu hakkunde jamaare Israa'iila fuu. Limiron ɓe cuuɗi cuuɗi.

³ Muusaa e almaami Eliyajar kaaldi e maɓɓe ley njaayri Mo'ab, daande gooruwol Urdun to ƴeenyirde Yeriko, mbi'i: —

⁴ Min liman worɓe gilla ɓe duuɓi 20 yaade yeeso, fodde no Joomiraaɗo yamirnoo Muusaa e Israa'iila'en nde njaltunoo Misira ndeen.

⁵ Ruben woni hammadiijo Israa'iila. Inan ɓiɓɓe Ruben oon: Henokinkooɓe ƴuurii e Henok. Palluwinkooɓe e Pallu,

⁶ Hesroninkooɓe e Hesron, Karminkooɓe e Karmi.

⁷ Ɓee ngoni lenyi Ruben. Limgal worɓe maɓɓe wo ujunaaje capanɗe nay e tati e keme njeɗɗo e capanɗe tato (43.730).

⁸ Ɓiɓɓe Eliyaba ɓii Pallu

⁹ wo Nemuwel e Datan e Abiram. Datan e Abiram ngoni ardinooɓe jamaare toonyiinde Muusaa e Haaruuna ndeen. Kamɓe ngondunoo e Koora e banndiraaɓe muuɗum muurtannooɓe Joomiraaɗo ɓeen.

¹⁰ Wo kamɓe leydi omtinoo moɗidi e Koora de yiite duppi banndiraaɓe muɓɓen 250 faa ɗum laatanoo heddiiɓe ɓeen maande.

¹¹ Ammaa ɓiɓɓe Koora maayayno.

¹² Inan ɓiɓɓe Simeyon fodde cuuɗi muɓɓen: Nemuwankooɓe ƴuuri e Nemuwel, Yamininkooɓe e Yamin, Yakininkooɓe e Yakin,

¹³ Jerakinkooɓe e Jerak, Sawulinkooɓe e Sawulu.

¹⁴ Ɓee ngoni lenyi Simeyon. Limgal worɓe maɓɓe wo ujunaaje noogay e ɗiɗi e keme ɗiɗo (22.200).

¹⁵ Inan ɓiɓɓe Gad fodde cuuɗi muɓɓen: Sefoninkooɓe ƴuuri e Sefon, Hagginkooɓe e Haggi, Suninkooɓe e Suni.

¹⁶ Osninkooɓe e Osni, Erinkooɓe e Eri.

¹⁷ Arodinkooɓe e Arod, Areelinkooɓe e Areeli.

¹⁸ Ɓee ngoni lenyi Gad. Limgal worɓe maɓɓe wo ujunaaje capanɗe nay e keme njoyo (40.500).

¹⁹ Inan ɓiɓɓe Yahuuda fodde cuuɗi muɓɓen: Er e Onan. Ammaa Er e Onan fuu maayii leydi Kanaana illa ɓe njahaay Misira.

²⁰ Ndelle inan ɓiɓɓe Yahuuda: Selaninkooɓe ƴuuri e Sela, Peresinkooɓe e Peres, Jerakinkooɓe e Jerak.

²¹ Inan ɓiɓɓe Peres: Hesroninkooɓe ƴuuri e Hesron, Hamulinkooɓe e Hamul.

²² Ɓee ngoni lenyi Yahuuda. Limgal worɓe maɓɓe wo ujunaaje capanɗe jeɗɗi e jeegom e keme njoyo (76.500).

²³ Inan ɓiɓɓe Isakar fodde cuuɗi muɓɓen: Tolatinkooɓe ƴuuri e Tola. Puwatinkooɓe e Puwa,

²⁴ Yasubinkooɓe e Yasub. Simroninkooɓe e Simron.

²⁵ Ɓee ngoni lenyi Isakar. Limgal worɓe maɓɓe wo ujunaaje capanɗe jeegom e nay e keme tato (64.300).

²⁶ Inan ɓiɓɓe Jabulon fodde cuuɗi muɓɓen: Seredinkooɓe ƴuuri e Sered, Eloninkooɓe e Elon, Yahalelinkooɓe e Yahalel.

²⁷ Ɓee ngoni lenyi Jabulon. Limgal worɓe maɓɓe wo ujunaaje capanɗe jeegom e keme njoyo (60.500).

²⁸ Inan ɓiɓɓe Yuusufi fodde cuuɗi muɓɓen: Manasa e Efrayim.

²⁹ Ɓiɓɓe Manasa: Makirinkooɓe ƴuuri e Makir. Wo Makir oon rimi Galaad maama Galaadinkooɓe.

³⁰ Inan ɓiɓɓe Galaad: Yejerinkooɓe ƴuuri e Yejer, Helekinkooɓe e Helek,

³¹ Asriyelinkooɓe e Asriyel, Sikeminkooɓe e Sikem.

³² Semidayinkooɓe ƴuuri e Semida, Heferinkooɓe e Hefer.

³³ Selofehad ɓii Hefer rimi ɓiɓɓe rewɓe tan. Inɗe maɓɓe ngoni: Mahala e No'a e Hogila e Milka e Tirsa.

³⁴ Ɓee ngoni lenyi Manasa ɓii Yuusufi. Limgal worɓe maɓɓe wo ujunaaje capanɗe joy e ɗiɗi e keme njeɗɗo (52.700).

³⁵ Ɓiɓɓe Efrayim fodde cuuɗi muɓɓen: Sutelahinkooɓe ƴuuri e Sutelaha, Bekerinkooɓe e Beker, Tahaninkooɓe e Tahan.

³⁶ Inan ɓiɓɓe Sutelaha: Eraninkooɓe ƴuuri e Eran;

³⁷ Ɓee ngoni lenyi Efrayim ɓii Yuusufi. Limgal worɓe maɓɓe wo ujunaaje capanɗe tati e ɗiɗi e keme njoyo (32.500). Kamɓe du wo ɓe ɓiɓɓe Yuusufi fodde cuuɗi maɓɓe.

³⁸ Inan ɓiɓɓe Benjamin fodde cuuɗi muɓɓen: Belaninkooɓe ƴuuri e Bela, Asbelinkooɓe e Asbel, Ahiraminkooɓe e Ahiram,

³⁹ Sufaminkooɓe e Sufam, Hufaminkooɓe e Hufam.

⁴⁰ Ɓiɓɓe Bela wo: Ared e Na'aman, Aredinkooɓe ƴuuri e Ared, Na'aminkooɓe du e Na'aman.

⁴¹ Ɓee ngoni lenyi Benjamin. Limgal worɓe maɓɓe wo ujunaaje capanɗe nay e joy e keme njeegom (45.600).

⁴² Inan ɓiɓɓe Dan fodde cuuɗi muɓɓen: Suhaminkooɓe ƴuuri e Suham.

⁴³ Ɓee ngoni lenyol Suham ɓii Dan. Limgal worɓe maɓɓe wo ujunaaje capanɗe jeegom e nay e keme nayo (64.400).

⁴⁴ Inan ɓiɓɓe Aser fodde cuuɗi muɓɓen: Yimnankooɓe ƴuuri e Yimna, Yiswinkooɓe e Yiswi, Beriyinkooɓe e Beriya.

⁴⁵ Inan taaniraaɓe Beriya: Heberinkooɓe ƴuuri e Heber, Malkiyelinkooɓe e Malkiyel.

⁴⁶ Aser na woodunoo ɓiɗɗo debbo na inndiree Seera.

⁴⁷ Ɓee ngoni lenyi Aser. Limgal worɓe maɓɓe wo 53.400.

⁴⁸ Inan ɓiɓɓe Naftali fodde cuuɗi muɓɓen: Yassiyelinkooɓe ƴuuri e Yassiyel; Guninkooɓe e Guni

⁴⁹ Yeeserinkooɓe e Yeeser, Silleminkooɓe e Sillem.

⁵⁰ Ɓee ngoni lenyi Naftali. Limgal worɓe maɓɓe wo ujunaaje capanɗe nay e joy e keme nayo (45.400).

⁵¹ Limgal worɓe Israa'iila'en fuu wo ujunaaje keme jeegom e go'o e keme njeɗɗo e capanɗe tato (601.730).

No leydi ndiin fecciroytee

⁵² Ndeen Joomiraaɗo haaldi e Muusaa wi'i: —

⁵³ Leydi ndiin feccoyte hakkunde yimɓe ɓee fodde limgal muɓɓen faa ndi laatanoo ɓe ndonngu.

⁵⁴ Cuuɗi ɓurɗi yimɓe, kokkee ko ɓuri yaajude e mayri. Ɓurɗi famɗude ɗiin du kokkee ko ɓuri famɗude. Lenyol fuu hokkee ngeɗu muuɗum fodde limgal cuuɗi muuɗum.

⁵⁵ Leydi ndiin fecciree cumnal. Ɓe ndonira ndi fodde inɗe maamiraaɓe maɓɓe.

⁵⁶ E cumnal ndi hokkirtee cuuɗi ɓurɗi heewude e ɓurɗi famɗude fuu.

Lewinkooɓe

⁵⁷ Inan limaaɓe hakkunde Lewinkooɓe: Gersoninkooɓe ƴuuri e Gerson, Kehatinkooɓe e Kehat, Merarinkooɓe e Merari.

⁵⁸ Inan cuuɗi lenyol Lewi: Libininkooɓe, Heberoninkooɓe, Mahilinkooɓe, Muusinkooɓe e Koorankooɓe. Kehat rimi Amram.

⁵⁹ Dee Amram oon na wi'ee Yokebed, ɓii Lewi debbo mo rimi leydi Misira. O rimani Amram Haaruuna e Muusaa e Mariyama.

⁶⁰ Ɓiɓɓe Haaruuna wo Nadabu e Abihu e Eliyajar e Itamar.

⁶¹ Nadabu e Abihu maayi saabe ɓe ngaɗanii Joomiraaɗo sadaka ure ɗe ndagaaki.

⁶² Lewinkooɓe worɓe limaaɓe gilla mo lewru wooturu fuu wo yimɓe ujunaaje noogay e tato (23.000). Ɓe limidaakano e Israa'iila'en sabo ɓe kawtaay e muɓɓen ndonngu.

⁶³ Ɓee ngoni Israa'iila'en ɓe Muusaa e almaami Eliyajar limi ley njaayri Mo'ab, daande Urdun to ƴeenyirde Yeriko.

⁶⁴ Fay gooto e ɓe almaami Haaruuna e Muusaa limunoo ley ladde Sinayi ɓeen heddaaki.

⁶⁵ Sabo Joomiraaɗo wi'iino ɓe maayan ley ladde ndeen, wooɗi du, wo noon ɗum laatorii: Kaalibu ɓii Yefunne e Yoosuwa ɓii Nuun tan keddii.