Limle 2 - Dewtere Laamɗo Fulfulde Burkina Faso

No lenyi Israa'iila koɗirta

¹ Joomiraaɗo haaldi e Muusaa e Haaruuna wi'i: —

² Israa'iilanke fu hoɗa ɗakkol darappo lenyol muuɗum, ɓe koɗa ɓe piiloo hukum Ceniiɗo oon.

Hoɗorde Yahuuda

³ Hoɗorde Yahuuda heeda lettugal hukum oon ley darappo muuɗum. Ɓe koɗira fedde fedde. Naasun ɓii Aminadaabu woni hooreejo lenyol Yahuuda.

⁴ Limgal sordaasiiɓe maɓɓe wo ujunaaje capanɗe jeɗɗi e nay e keme njeegom (74.600).

⁵ Ɓe koɗda e lenyol Isakar e ngol Jabulon. Netanel ɓii Suwar woni hooreejo lenyol Isakar.

⁶ Limgal sordaasiiɓe maɓɓe wo ujunaaje capanɗe joy e nay e keme nayo (54.400).

⁷ Lenyol Jabulon du, wo Eliyaba ɓii Helon woni hooreejo muɓɓen.

⁸ Limgal sordaasiiɓe maɓɓe wo ujunaaje capanɗe joy e jeɗɗi e keme nayo (57.400).

⁹ Ndelle sordaasiiɓe hoɗorde Yahuuda fuu wo ujunaaje hemre e capanɗe jeetati e jeegom e keme nayo (186.400). Lenyi tati ɗiin ardotoo yimɓe Israa'iila nde eggata fu.

Hoɗorde Ruben

¹⁰ Hoɗorde Ruben heeda faro horɗoore ley darappo muuɗum. Ɓe koɗira fedde fedde. Elisur ɓii Cedehur woni hooreejo lenyol Ruben.

¹¹ Limgal sordaasiiɓe maɓɓe wo ujunaaje capanɗe nay e jeegom e keme njoyo (46.500).

¹² Ɓe koɗda e lenyol Simeyon e ngol Gad. Celumiyel ɓii Surisaday woni hooreejo lenyol Simeyon.

¹³ Limgal sordaasiiɓe maɓɓe wo ujunaaje capanɗe joy e jeenay e keme tato (59.300).

¹⁴ Lenyol Gad du, wo Eliyasaf ɓii Rewel woni hooreejo muɓɓen.

¹⁵ Limgal sordaasiiɓe maɓɓe wo ujunaaje capanɗe nay e joy e keme njeegom e capanɗe njoyo (45.650).

¹⁶ Ndelle sordaasiiɓe lenyi tati ɗiin fuu wo ujunaaje hemre e capanɗe joy e go'o e keme nayo e capanɗe njoyo (151.450). Ɓeen ndewtata hoɗorde Yahuuda.

Lewinkooɓe

¹⁷ Caggal hoɗorde Ruben, hoɗorde Lewi rewtida e hukum Ceniiɗo oon. Ɓe ngona hakkunde koɗorɗe sordaasiiɓe ɗiɗi ardiiɗe e ɗiɗi cakitiiɗe ɗeen. Ɓe ummoroo hoɗorde hoɗorde, ɓe njokkondira ɓeya fuu ley darappo muɓɓen.

Hoɗorde Efrayim

¹⁸ Hoɗorde Efrayim heeda faro gorgal hukum oon ley darappo muuɗum. Ɓe koɗira fedde fedde. Elisama ɓii Amihud woni hooreejo lenyol Efrayim.

¹⁹ Limgal sordaasiiɓe maɓɓe wo ujunaaje capanɗe nay e keme njoyo (40.500).

²⁰ Ɓe koɗda e lenyol Manasa e ngol Benjamin. Gamaliyel ɓii Pedasur woni hooreejo lenyol Manasa.

²¹ Limgal sordaasiiɓe maɓɓe wo ujunaaje capanɗe tati e ɗiɗi e keme ɗiɗo (32.200).

²² Lenyol Benjamin du, wo Abidaan ɓii Gedeyoni woni hooreejo muuɗum.

²³ Limgal sordaasiiɓe maɓɓe wo ujunaaje capanɗe tati e joy e keme nayo (35.400).

²⁴ Ndelle sordaasiiɓe lenyi tati ɗiin fuu wo ujunaaje hemre e jeetati e yimɓe hemre (108.100). Ɓeen ndewtata Lewinkooɓe.

Hoɗorde Dan

²⁵ Hoɗorde Dan heeda faro soɓɓirre hukum oon ley darappo muuɗum. Ɓe koɗira fedde fedde. Ahiyeser ɓii Amisaday woni hooreejo lenyol Dan.

²⁶ Limgal sordaasiiɓe maɓɓe wo ujunaaje capanɗe jeegom e ɗiɗi e keme njeɗɗo (62.700).

²⁷ Ɓe koɗda e lenyol Aser e ngol Naftali. Pagiyel ɓii Okoran woni hooreejo lenyol Aser.

²⁸ Limgal sordaasiiɓe maɓɓe wo ujunaaje capanɗe nay e go'o e keme njoyo (41.500).

²⁹ Lenyol Naftali du, wo Ahira ɓii Enan woni hooreejo muɓɓen.

³⁰ Limgal sordaasiiɓe maɓɓe wo ujunaaje capanɗe joy e tati e keme nayo (53.400).

³¹ Ndelle sordaasiiɓe lenyi tati ɗiin fuu wo ujunaaje hemre e capanɗe joy e jeɗɗi e keme njeegom (157.600). Ɓeen cakitotoo ndewtida e darapooji muɓɓen.

³² Israa'iila'en winndaaɓe fodde cuuɗi muɓɓen e koɗorɗe muɓɓen fuu wo worɓe ujunaaje keme jeegom e tati e keme njoyo e capanɗe njoyo (603.550).

³³ Lewinkooɓe limdaaka e maɓɓe sabo Joomiraaɗo yamiriino Muusaa taa limida ɓe e Israa'iila'en.

³⁴ Noon Israa'iila'en ngaɗiri ko Joomiraaɗo yamiri Muusaa fu. Iɓe koɗa ley darapooji maɓɓe, wooɗi du, iɓe eggira lenyol lenyol e suudu suudu.