Lewinkooɓe 27 - Dewtere Laamɗo Fulfulde Burkina Faso

Jamirooje dow aadiiji

¹ Joomiraaɗo haaldi e Muusaa wi'i: —

² Kaaldaa e Israa'iila'en mbi'aa ɗum'en: Si neɗɗo na anniyii hokkude Joomiraaɗo ɓii-Aadama fu, wadda ko joomum haani sonneede. Inan no hokkirtee:

³ Gorko mo duuɓi 20 yaade 60 wo buuɗi cardi 50 fodde ponndirɗe nokkuure seniinde.

⁴ Si wo debbo du buuɗi cardi 30.

⁵ Suka mo duuɓi 5 yaade 20, si wo gorko fu, buuɗi cardi 20. Si wo debbo du, buuɗi cardi 10.

⁶ Ƴuude mo lewru wooturu yaade mo duuɓi joy, si wo gorko fu, buuɗi cardi joy, si wo debbo du buuɗi cardi tati.

⁷ Mo duuɓim kewti 60 yaade yeeso, si wo gorko fu, buuɗi cardi 15. Si wo debbo du, buuɗi cardi 10.

⁸ Si tawii anniyiiɗo hokkude ɓii-Aadama oon wo talka, waawaa waddude njoɓdi ndiin fu, sey wadda neɗɗo oon yeeso almaami. Almaami taƴa coggu makko fodde baawɗe podiiɗo hokkude o oon.

⁹ Si tawii wo ndaaba ndagiinga sakkaneede Joomiraaɗo fu, nga laatoo huunde seniinde.

¹⁰ Ndaaba ngaan wattitataake. Ndaaba lobba loomtinirtaake mbonnga, mbonnga du loomtinirtaake lobba. Si tawii joomum tilay wattita ndaaba ngaan fu, kannga e mbatteteenga ngaan fuu laatoo kujje ceniiɗe.

¹¹ Si tawii wo ndaaba nga laaɓanaa sakkaneede Joomiraaɗo, ko nga laatii fuu, sey joomum wadda nga yeeso almaami.

¹² Almaami taƴa coggu magga fodde no nga wooɗiri maa no nga boniri. No almaami oon hokkiri coggu magga fuu wo noon nga yoɓirantee.

¹³ Si joomum na haajaa sooditaade nga fu, sey ɓeyda e coggu magga nguun mbuuɗu ngootu dow buuɗi joy fuu.

¹⁴ Si neɗɗo seninii suudu muuɗum faa sakkana Joomiraaɗo fu, almaami ndaaran yalla ndu lobburu naa ndu bonndu. No almaami taƴiri coggu mayru fu, wo noon ndu yoɓirantee.

¹⁵ Si joomiiru muuyti sooditaade ndu fu, sey ɓeyda mbuuɗu ngootu dow buuɗi joy fu de ndu warta e jeyal muuɗum.

¹⁶ Si neɗɗo seninii ngesa muuɗum ngoota faa sakkana Joomiraaɗo fu, coggu magga hiisoree e ko waawi aaweede e magga: kilooji sa'iiri 300 fuu wo buuɗi cardi 50.

¹⁷ Si tawii wo ley Hitaande Hokkitingol ngesa ngaan seninaa du, nga sonnee ko nga waawi heɓude fuu.

¹⁸ Si wo gaɗa hitaande ndeen o senini nga du, almaami hiisoo coggu magga fodde duuɓi keddiiɗi faa hewta Hitaande Hokkitingol waroore de coggu nguun ɓuytee.

¹⁹ Si joomiiga na haajaa sooditaade nga fu sey ɓeyda mbuuɗu ngootu dow buuɗi joy fuu de jeyta nga.

²⁰ Si o sooditaaki nga faa nga sonniraama goɗɗo fu, o walaa laawol sooditaade nga katin.

²¹ Ndelle nde Hitaande Hokkitingol hewti fu, nga laatoto jeyal Joomiraaɗo ceniingal. Wo nga ngesa cenndanaanga Joomiraaɗo faa abada. Almaami'en njeyta nga.

²² Si neɗɗo seninanii Joomiraaɗo ngesa nga soodi, tawi wanaa ndonaanga fu,

²³ almaami taƴa coggu magga fodde duuɓi keddiiɗi faa hewta Hitaande Hokkitingol waroore de joomum yoɓa buuɗi ɗiin nyannde ndeen. Buuɗi ɗiin wo ceninanaaɗi Joomiraaɗo.

²⁴ Nde Hitaande Hokkitingol ndeen hewti fu, nga yeccoo e junngo joomiiga arano oon.

²⁵ Cogguuji fuu na taƴe fodde ponndirɗe nokkuure seniinde. Mbuuɗu cardi ngootu fuu teddeefi muuɗum wo garamuuji 10.

²⁶ Fay gooto walaa laawol seninande Joomiraaɗo awru daabaaji muuɗum sabo ko laatii awru fuu wo jeyal Joomiraaɗo. Awru nagge e dammucce fuu wo Joomiraaɗo jeyi.

²⁷ Si tawii wo awru ndaaba nga laaɓaa fu, joomum na waawi sooditaade nga ammaa sey ɓeyda mbuuɗu ngootu dow buuɗi joy fuu. Si o sooditaaki ndaaba ngaan du, nga sonnee fodde ko coggu magga taƴaa.

²⁸ Huunde fuu ko neɗɗo senndani Joomiraaɗo e ley jeyal muuɗum waawaa sonneede maa teeteede. Nde wo tagaaɗo maa ndaaba maa leydi, ko laatii fuu teetataake sabo ko senndanaa Joomiraaɗo fuu na senii sanne.

²⁹ Fay si wo ɓii-Aadama senndanaa Joomiraaɗo, joomum waawaa rimɗineede faa abada. Sey waree.

³⁰ Jakka nyaamri, ko taƴetee e gese e ɓiɓɓe leɗɗe leydi ndiin fuu wo Joomiraaɗo jeyi. Wo ko senanii Joomiraaɗo.

³¹ Si neɗɗo na haajaa sooditaade goɗɗum e jakka muuɗum fu, sey ɓeyda mbuuɗu ngootu dow buuɗi joy e ceede jakka oon.

³² Ko laatii sappoɓerde ley na'i maa dammucce fuu senndanee Joomiraaɗo.

³³ Filataake faameede yalla ndaaba ngaan wo lobba naa mbonnga, wooɗi du nga loomtintaake. Si tawii joomum tilay wattita ndaaba ngaan fu, kannga e mbatteteenga ngaan fuu ɗi laatoo ceniiɗi. Ndelle ɗi mbaawaa sooditeede.

³⁴ Ɗee ngoni jamirooje ɗe Joomiraaɗo hokki Israa'iila'en e hunnduko Muusaa dow waamnde Sinayi.