Lewinkooɓe 24 - Dewtere Laamɗo Fulfulde Burkina Faso

Haala nebbam fitillaaji

¹ Joomiraaɗo haaldi e Muusaa wi'i: —

² Njamiraa Israa'iila'en ngaddane nebbam jaytun unaaɗo laaɓuɗam, ngattaa e fitillaaji ɗiin faa keddoo na kuɓɓa wakkati fuu.

³ Haaruuna joƴƴina ɗi yaasin lefol cuuɗoowol keesuwal Amaana ley hukum Ceniiɗo faa ɗi keddoo iɗi njayna yeeso Joomiraaɗo gilla futuro faa yaade subaka. Wo ɗum yamiroore tilsande Israa'iila'en ley jamaanuuji fuu faa abada.

⁴ O deka fitillaaji ɗiin dow joƴƴinirde muɓɓen seniinde ndeen faa keddoo na kuɓɓa yeeso Joomiraaɗo wakkati fuu.

Haala buuru cakketeeɗo

⁵ Kooƴaa conndi ɗaatundi ngaɗaa buuruuje 12, tawa buuruure wootere fuu wo kilooji jeegom conndi ndiin waɗiraa.

⁶ Ngaɗaa ɗe guurti ɗiɗi dow taabawal ceniingal gonngal yeeso Joomiraaɗo ngaal. Guurtol fuu maasaaje jeegom.

⁷ Ngattaa ure daneeje laaɓuɗe dow guurtol fuu. Ɗe ngona dow buuruuje ɗeen hono maande sadaka Joomiraaɗo.

⁸ Nyannde fowteteende fuu, ɗe njoƴƴinee yeeso Joomiraaɗo, ɗe keddoo ɗoon wakkati fuu. Ɗe ittee e jeyal Israa'iila'en. Wo ɗum amaana tabitoowo faa abada.

⁹ Ɗum laatoo ngeɗu Haaruuna e ɓiɓɓe muuɗum. Ɓe nyaama ɗum ley nokkuure seniinde. Ɗum laatanoo ɓe nyaamdu seniindu ittaandu ley sadakaaji Joomiraaɗo. Wo ɗum yamiroore nde ɗowtantoɗon faa abada.

Haala mbonkaade Innde Joomiraaɗo

¹⁰ Ɓii Misiranke gorko mo inna muuɗum jeyaa Israa'iila na wonnoo hakkunde maɓɓe ley hoɗorde ndeen. Fitina ummii hakkunde makko e Israa'iilanke goɗɗo.

¹¹ O mbonkii innde Laamɗo, o huyfini ɗum de o waddaa yeeso Muusaa. Inniiko na wi'ee Celomita ɓii Dibiri mo lenyol Dan.

¹² O doomaa fadde faameede ko Joomiraaɗo yamirta dow makko.

¹³ Joomiraaɗo haaldi e Muusaa wi'i: —

¹⁴ Mburtinaa mbonkiiɗo kam oon ley hoɗorde ndeen. Nanuɓe mbonka makko ɓeen fuu ndeka juuɗe muɓɓen dow hoore makko de jamaare ndeen fuu hawrita faɗɗa o kaaƴe.

¹⁵ Wooɗi du, mbi'aa Israa'iila'en: Neɗɗo fuu mbonkiiɗo Laamɗo muuɗum, ronndoto hakke muuɗum.

¹⁶ Mbonkiiɗo innde Joomiraaɗo fuu wo bareteeɗo. Jamaare Israa'iila fuu hawrita faɗɗa joomum kaaƴe. Ko joomum laatii fuu, nde wo janano nde wo Israa'iilanke dimo fuu sey waree saabe mbonkake innde Laamɗo.

¹⁷ Barɗo ɓii-Aadama banndum fuu, wo bareteeɗo.

¹⁸ Barɗo ndaaba goɗɗo fuu, sey yoɓa ɗum ndaaba mbuurnga. Yonki yoɓiree yonki.

¹⁹ Nawnuɗo goɗɗo fuu sey kam du nawnee iri nawnande ndeen.

²⁰ Kelol yoɓa kelol, yitere yoɓa yitere, nyiinde yoɓa nyiinde. Barmere nde o barmini banndiiko fuu, wo hono ndeen pay o yomnitetee.

²¹ Baruɗo ndaaba goɗɗo fuu yoɓan ammaa barɗo tagaaɗo fuu wo bareteeɗo.

²² Ndelle sariya gooto oon woodani Israa'iilanke dimo e janano fuu dow majjum. Miin woni Joomiraaɗo, Laamɗo mooɗon.

²³ Muusaa yottini Israa'iila'en haala kaan. Ndeen ɓe mburtini mbonkiiɗo Laamɗo oon ley hoɗorde ndeen de ɓe paɗɗi ɗum kaaƴe faa maayi. Ɓe ngaɗi ko Joomiraaɗo yamiri Muusaa ɗuum fuu.