Lewinkooɓe 11 - Dewtere Laamɗo Fulfulde Burkina Faso

Haala daabaaji karmuɗi e ɗi karmaa

¹ Joomiraaɗo haaldi e Muusaa e Haaruuna wi'i: —

² Kaaldon e Israa'iila'en, mbi'on ɗum'en: Hakkunde daabaaji adunaaru fuu, inan ɗi mbaawɗon nyaamude: Oɗon mbaawi nyaamude ndaaba fuu

³ ngoodunga holnyundu fecciindu de tawa na waccitoo.

⁴ Wooɗi du, hakkunde baccitotooɗi e ɗi kolnyuli pecciiɗi ɗiin du, inan ɗi on njeyaa nyaamude: Ngeelooba, sabo inga waccitoo ammaa kolnyuli magga peccaaki. Ndelle ndaardon nga ko harmani on.

⁵ Gaynaare, sabo na waccitoo ammaa holnyundu muuɗum feccaaki. Ndelle ndaardon ɗum ko harmani on.

⁶ Wojere, sabo na waccitoo ammaa holnyundu muuɗum feccaaki. Ndelle ndaardon ɗum ko harmani on.

⁷ Ngiroowu, sabo na woodi holnyundu fecciindu ammaa waccitataako. Ndelle ndaardon ɗum wo ko harmani on.

⁸ Taa nyaamon teewu majji, taa meemon caaɗɗum majji. Iɗi laatanii on ko harmi.

Daabaaji ndiyam laaɓuɗi e ɗi laaɓaa

⁹ Hakkunde kujje buurɗe ley ndiyam fuu, inan ɗe mbaawɗon nyaamude: oɗon mbaawi nyaamude ko wuuri ley diyeele maayo maa gooruuji de na woodi jinorɗe e koɓalaaje.

¹⁰ Ammaa kujje buurɗe ley maayooji maa gooruuji ɗe ngalaa jinorɗe e koɓalaaje fuu ndaardon ɗum'en ko harmani on.

¹¹ Ɗe laatanoo on ko nyiddinii. Taa nyaamon teewu majje, taa meemon baatuɗi majje, ndaardon ɗe hono ko harmani on sanne.

¹² Ko wuuri ley ndiyam de walaa jinorɗe e koɓalaaje fuu laatanoo on mboɗaa.

Haala pooli laaɓuɗi e ɗi laaɓaa

¹³ Hakkunde pooli fuu, inan ɗi ndaardoton nyiddiniiɗi, ɗi on njeyaa nyaamude: dutal e jigaare e ciilal maayo,

¹⁴ e gabuure e sii ciile feere feere,

¹⁵ e daawuwal e sii muɓɓen,

¹⁶ e ndaw e ngooƴaare e kelentewal maayo e goppere e sii muɓɓen,

¹⁷ e biigamiimolel e sii nyaale e ngooƴaare mawnde,

¹⁸ e ngooƴayel daneyel e daawuwel e sii jigaaje,

¹⁹ e waaliyal e sii cooɗe e wudaawudaa e wilwilndu.

Haala kujje piirooje

²⁰ Piiroowel ngel koyɗe nay fuu laatoo ko harmani on sanne.

²¹ Ammaa hakkunde ngoodukoy koyɗe nay kooy, oɗon mbaawi nyaamude koy koyɗe muɓɓen ngoodi jokkule mbaawkoy fittude.

²² Inan koy mbaawɗon nyaamude: baɓɓatti leɗɗe e gurnyaaji e pelempee e koobaaji e sii muɓɓen.

²³ Ammaa piiroohoy koy koyɗe nay keddiikoy fuu ndaardon ɗum'en wo ko nyiddinii.

Daabaaji tuuninooji

²⁴ Inan daabaaji tuuninooji on: meemuɗo baatuɗi majji fuu laatoto tuunɗo faa hewta futuro.

²⁵ Tiigiiɗo baatungel e majji fu sey lonna kaddule muuɗum de heddoo wo tuunɗo faa hewta futuro.

²⁶ Ndaaba fuu nga holnyundu muuɗum feccaaki e nga waccitataako wo tuunga. Meemuɗo nga fuu laatoto tuunɗo.

²⁷ Daabaaji gooduɗi koyɗe nay de ngalaa kolnyuli fuu wo karmuɗi. Meemuɗo baatungel e majji fuu laatoto tuunɗo faa hewta futuro.

²⁸ Tiigiiɗo baatungel e majji fu sey lonna kaddule muuɗum de heddoo wo tuunɗo faa hewta futuro sabo iɗi karmani on sanne.

Haala kujje ladooje e leydi

²⁹ Hakkunde kujje ladooje e leydi fuu, inan karmanɗe on: gusuuru e doomburu e sii pallaaɗi feere feere,

³⁰ e joldu e eleleldu e huutooru e fallalde e doonyorgal.

³¹ Kanje ngoni kujje karmanɗe on. Meemuɗo baatungel e majje fuu laatoto tuunɗo faa hewta futuro.

³² Si baatungel e majje saami ley ginewol fuu ngol laatoto ko tuuni. Ko ngol laatii fuu, nde wo le'al maa kaddungal maa nguru maa bootooru; ko gollirtee fuu, sey suuwee ley ndiyam de heddoo wo tuunɗum faa hewta futuro. Caggal ɗuum iɗum waawi ndaardeede ko laaɓi.

³³ Si baatungel majje saamii ley ginewol gaɗiraangol loope fu, ko wonnoo ley maggol fuu laatato ko tuuni. Ndelle sey ngol fusee.

³⁴ Si ndiyam ngonnooɗam e ginewol ngool meemii nyaamdu fu, ndu laatoto tuundu. Noon du njaram laaɓunooɗam ɗam ndiyam ginewol ngool meemi fuu laatorto tuunɗam ley ginewol laatiingol fuu.

³⁵ Ginewol ngol baatungel majji saamii ley muuɗum fuu laatoto ko tuuni. Nde wo duppirde buuru maa kaatane fuu sey fusee sabo laatake ko tuuni. Iɗi karmani on sanne.

³⁶ Si huunde waatunde ndeen wo nder ildude maa ley ɓunndu saami fu tuunintaa ɗum. Ammaa meemuɗo baatungel majje fuu laatoto tuunɗo.

³⁷ Si baatungel majje saamii dow aawdi fu, ɗuum tuunintaa ndi.

³⁸ Ammaa si ndiyam wattaama e aawdi ndiin de ngel saamii ley mayri fu, ndi laatoto ko harmi.

Jamirooje dow daabaaji caaɗuɗi

³⁹ Si ndaaba ndagiinga saaɗii fu, meemuɗo nga fuu laatoto tuunɗo faa hewta futuro.

⁴⁰ Nyaamuɗo teewu ndaaba ngaan fuu sey lonna kaddule muuɗum de heddoo wo tuunɗo faa hewta futuro. Tiigiiɗo nga du sey lonna kaddule muuɗum de heddoo wo tuunɗo faa hewta futuro.

⁴¹ Kujje ladooje e leydi fuu laatanoo on ko harmi. Taa nyaamon ɗe.

⁴² Kujje ladooje dow leydi maa tallotooɗe dow deedi muɓɓen maa njaarooje koyɗe nay maa koyɗe ɗuuɗɗe fuu taa nyaamon fay gootel e muɓɓen sabo ɗe fuu wo ɗe nyiddiniiɗe.

⁴³ Ndelle taa tuuninee ko'e mooɗon saabe majje. Taa tuuniniron ko'e mon saabe meemude ɗe wooɗi du, taa ɗe tuunina on.

⁴⁴ Sabo wo miin woni Joomiraaɗo, Laamɗo mooɗon. Ceninee ko'e mooɗon, faa laatoɗon seniiɓe sabo miin wo mi ceniiɗo. Taa tuuniniree ko'e mooɗon e meemude kujje ladooje e leydi.

⁴⁵ Sabo wo miin woni Joomiraaɗo burtinɗo on leydi Misira faa laatoo Laamɗo mooɗon. Ndelle laatoɗon seniiɓe sabo miin wo mi ceniiɗo.

⁴⁶ Ndee woni yamiroore dow daabaaji e pooli e ko wuuri ley diyeele e kujje ladooje e leydi fuu,

⁴⁷ faa cenndon ko harmi e ko harmaa, hakkunde daabaaji ɗi njeyɗon nyaamude e ɗi on njeyaa.