Fuɗɗoode 49 - Dewtere Laamɗo Fulfulde Burkina Faso

¹ Yaakuuba noddi ɓiɓɓe muuɗum, wi'i ɗum'en: — Kawritee faa mi haalana on ko hewtotoo on ley duuɓi garooji:

² Kawritee onon ɓiɓɓe Yaakuuba, kettindanee Israa'iila baabii on oon.

³ Ruben, aan woni afo am, aan woni semmbe am, ɓiyam mo artiimi keɓumi ley njokollaaku am. Aan woni ɓurɗo teddeengal e baawɗe fuu.

⁴ Aɗa nanndi e ndiyam iloojam, a walaa nanngitaare, a heɓataa ardaade, sabo a fukkake dow daɗɗo bammaa de tuuninɗaa ngo.

⁵ Simeyon e Lewi wo sakiraaɓe, kaafaaje maɓɓe wo nyannguɗe.

⁶ Mi naatataa ley anniyaaji maɓɓe. Ɓernde am seyortaako kawrital maɓɓe. Sabo ley tikkere maɓɓe ɓe mbarii worɓe. Ley dukkuru maɓɓe, ɓe taƴii codduli ga'i.

⁷ Tikkere maɓɓe nyanngunde ndeen huɗaama Kuddi ndiin saama dow dukkuru maɓɓe bonndu nduun. Mi senndan ɓe hakkunde ɓiɓɓe Yaakuuba, de mi sankita ɓe ley Israa'iila.

⁸ Aan Yahuuda, sakiraaɓe maa manete. Junngo maa teddan dow koƴƴuli wayɓe maaɗa, Sakiraaɓe maa cujidante.

⁹ Aan Yahuuda wo a laddeeru jokoldu. Aan ɓiyam, a wartii e loohagol maaɗa semmbewol ngool. A dikkinake de pukkoriɗaa hono laddeeru noon. De moy suusi umminde laddeeru rewru hono ndu?

¹⁰ Sawru laamu heddoto e lenyol Yahuuda, laamu dillataa ley ƴuwdi makko, faa nde podanaaɗo teddeengal oon warowi. Lenyi adunaaru ɗowtanto mo.

¹¹ O haɓɓan araawa makko e inaboohi. O jorfa mola makko e liccal ɓurngal wooɗude. O lonnira kaddule makko inaboojam de o suuwa forgo makko ley mboɗejam ɗaam.

¹² Inaboojam wojjinan gite makko, de ɓiraaɗam rawnina nyiiƴe makko.

¹³ Jabulon jooɗoto daande maayo, Kanko jeyi laanaaji dariiɗi daande maayo ɗiin. Leydi makko hewtan faa ndi Sidon.

¹⁴ Isakar wo araawa cemmbiɗinnga, pukkiinga ley hoggo ngo kokuuji ɗiɗi.

¹⁵ Nde nga tawnoo hoɗorde ndeen na wooɗi, leydi ndiin du na weli fu, nga turni balaaje magga nga ronndii donngal, nga laatii maccuɗo golleeji tiiɗuɗi.

¹⁶ Dan du saroto lenyol muuɗum hono gootol e lenyi Israa'iila ɗiin.

¹⁷ O laatoto hono mboddi dow laawol, hono foosikere soppoore teppe pucci de waɗɗiiɓe ɗi caamira gaɗa gaɗalde dow laawol.

¹⁸ Miɗo doomi kisindam ƴuuroojam to maaɗa, aan Joomiraaɗo!

¹⁹ Konunkooɓe piiloto Gad, ammaa o jaaltoto ɓe, o riiwa ɓe.

²⁰ Aser jogoto neema gooduɗo nebbam. O waɗanan laamiiɓe neemaaji belɗi.

²¹ Naftali wo lewla njoofaanga, ndimoowa ɓiɓɓe fonnditiiɓe.

²² Yuusufi wo liccal lekki dimoowal, lekki ndimoowi ngonki dow ildude ndiyam, ki licce muuɗum mbeɗɗitii dow kokuwol.

²³ Fiɗooɓe kure koni mo, piɗi mo, torri mo.

²⁴ Ammaa imo tiigii ɓaaru makko faa teeŋi, juuɗe makko na celli saabe ballal Laamɗo, junngo Jom Semmbe balloowo Yaakuuba oon, Duroowo laatiiɗo tefaare Israa'iila oon.

²⁵ Laamɗo bammaa oon wallete, Jom Baawɗe oon barkinante huunde fuu, barkeeji ƴuurooji dow kammu, barkeeji ilam mbaaliiɗam e leydi, barkeeji enndu e enɗam.

²⁶ Barkeeji bammaa ɓuri barkeeji baamle ɓooyɗe e moƴƴereeji nokkuuje toowɗe duumiiɗe. Ɗi ngona dow hoore maaɗa, ɗi ndekoo dow ngaasa maaɗa, aan Yuusufi cenndaaɗo hakkunde sakiraaɓe muuɗum oon.

²⁷ Benjamin wo suundu seekooru, nyaamooru wanyuɓe ɗum gilla subaka, peccoowo ko heɓi du wakkati kiiral naange.

²⁸ Ɓee ngoni lenyi Israa'iila 12 ɗiin. Ɗuum woni ko baaba maɓɓe wi'i nde barkinannoo ɓe ndeen. Gooto fuu fodde barke mo o barkiniri ɗum.

Haala maayde Yaakuuba

²⁹ Yaakuuba tindini ɓe, wi'i: — Joonin mi maayan, mi hawritowan e maamiraaɓe am. Mooɓaa kam ɗakkol baabiraaɓe am ley loho wonko ngesa Eforon Hittiyanke koon.

³⁰ Koon woni loho wonko ley ngesa Makpela, lettugal Mamre ley leydi Kanaana. Loho koon, wo Ibrahiima soodi ko kanko e ngesa ngaan fuu e junngo Eforon faa nokku oon laatoo nokku caabeeje.

³¹ Toon Ibrahiima e jom suudu mum Saaratu mooɓaa. Toon Isiyaaka e jom suudu mum Rebeka du mooɓaa. Toon mooɓumi Leya du.

³² Ngesa ngaan e loho wonko e magga koon fuu e juuɗe Hittiyankooɓe coodaa.

³³ Nde Yaakuuba tilinoo tindinde ɓiɓɓe muuɗum ndeen, hawrini koyɗe muuɗum dow daɗɗo, foofi foofaango sakitiingo, de dilli adunaaru, hawritowi e maamiraaɓe muuɗum.