Fuɗɗoode 39 - Dewtere Laamɗo Fulfulde Burkina Faso

¹ Yuusufi yaaraa Misira. Nde o yaaranoo toon fu, Misiranke bi'eteeɗo Potifaar, mawɗo sordaasiiɓe Fira'awna, soodi mo e juuɗe Ismaa'iilankooɓe wadduɓe mo ɓeen.

² Joomiraaɗo ina wondi e Yuusufi, huunde fuu na gasana ɗum. O jooɗii ley ɓaade joomiiko Misiranke oon.

³ Oon taykii, yi'i Joomiraaɗo ina wondi e makko. Ko wattaa e junngo makko fuu, Joomiraaɗo ina barkina ɗum.

⁴ Yuusufi heɓi hoolaare yeeso joomum oon. Oon ɓattini mo e muuɗum, waɗi o kayboowo ɓaade muuɗum e jawdi muuɗum fuu.

⁵ Nde Yuusufi waɗanoo kayboowo jawdi ndiin fu, Joomiraaɗo barkini ɓaade Misiranke oon saabe muuɗum. Barke oon heddii dow jawdi makko, dow wuro makko e gese makko fuu.

⁶ Ndelle ko o jogii fuu, o halfini ɗum Yuusufi. Walaa fuu ko o ndaaranta sanaa ko o nyaamata tan. Tawi le Yuusufi wo jom ŋari, belɗo ndaarude.

⁷ Nde ɓooynoo seeɗa fu, dee joomiiko oon taykii ŋari makko de wi'i o: — War, pukkodoɗen.

⁸ Yuusufi salii, wi'i dee joomum oon: — Ndaar, jooman ɓattinii kam hoore muuɗum, o accii huunde fuu ko woni e ɓaade nde e juuɗe am.

⁹ O ɓuraa kam teddeengal ley ɓaade nde. Walaa fuu ko o haɗi kam ley mayre, sanaa aan taan, sabo wo a jom suudu makko. Ndelle noy ngaɗiranmi bonanda mawɗo o, mi lutta Laamɗo?

¹⁰ Nyannde fuu debbo oon ina haalda e makko heɓa o fukkodoo e muuɗum, ammaa Yuusufi jaɓaay fay wondude e makko ley nokku gooto.

¹¹ Nyannde gomma Yuusufi naati ley suudu faa golla golleeji muuɗum, tawi fay gooto walaano toon.

¹² Ndeen, debbo oon nanngi saayo makko, wi'i mo: — Fukkoda e am! Yuusufi yoppidi mo e saayo ngoon de doggiri yaasin.

¹³ Nde o yi'unoo Yuusufi yoppidii mo e saayo ngoon de doggiri yaasin fu,

¹⁴ o noddi gollooɓe ɓaade ndeen, o wi'i ɗum'en: — Ndaaree! En ngaddanaama Ibraninkoowel faa fijira en. O warii faa o fukkodoo e am, de toownumi daande am, kalɓumi.

¹⁵ Nde o nannoo ƴeewniimi, kalɓumi fu, o yoppi saayo makko ɗakkol am de o doggiri yaasin.

¹⁶ O fukkini saayo Yuusufi ngoon ɗakkol makko faa goriiko warti.

¹⁷ O haalani ɗum haala kaan, o wi'i: — Maccuɗo Ibraninke mo ngaddanɗaa min oon, warii to am faa semtina kam.

¹⁸ Nde ƴeewninoomi, mbullumi fu, o yoppi saayo makko ɗakkol am de o doggiri yaasin.

¹⁹ Nde joomiiko oon nannoo deekum na wi'a «Inan ko maccuɗo maa oon waɗi kam» ndeen, ɓerni sanne.

²⁰ O waɗi Yuusufi nanngaa, wattaa ley kasu to kasunkooɓe kaananke ngoni toon. Wo noon Yuusufi kasiraa

Yuusufi ley kasu

²¹ ammaa Joomiraaɗo wondi e makko, waɗani o moƴƴere. O waɗi hooreejo kasu oon du yiɗi Yuusufi, laatanii ɗum moƴƴuɗo.

²² Oon halfini kasunkooɓe ɓeen fuu Yuusufi. Huunde fuu ko golletee toon wo kam gollinta.

²³ Hooreejo kasu oon ndaarantaa fay huunde e ko Yuusufi halfinaa ɗuum, sabo Joomiraaɗo ina wondi e Yuusufi. Ko o anniyii fuu, Joomiraaɗo na gayna ɗum.