Fuɗɗoode 33 - Dewtere Laamɗo Fulfulde Burkina Faso

Hawrugol Yaakuuba e Isuwa

¹ Yaakuuba ɓanti gite muuɗum, haynii Isuwa ina warda e yimɓe 400. O fecci sukaaɓe makko ɓeen, o hokki woɓɓe maɓɓe Leya, woɓɓe du Rahiina, woɓɓe du horɓe ɗiɗo ɓeen.

² O ardini horɓe ɓeen e sukaaɓe muɓɓen, o jokkini Leya e sukaaɓe muuɗum de o sakintini Rahiina e ɓiyum Yuusufi.

³ Kanko e hoore makko du, o ardii ɓe. Nde o ɓadinoo mawniiko Isuwa ndeen, o sujidi kile jeɗɗi.

⁴ Isuwa du doggi hawri e makko, mumilii daande makko, muccii mo. Ɓe mboyi.

⁵ Isuwa ɓanti gite muuɗum yi'i rewɓe e sukaaɓe ɓeen de wi'i: — Moy en ngoni wonduɓe e maaɗa ɓee? Yaakuuba jaabii, wi'i: — Sukaaɓe ɓe, wo ɓe Laamɗo hokkari maccuɗo maa.

⁶ Horɓe ɓeen ɓattitii, kam'en e sukaaɓe muɓɓen, cujidi.

⁷ Leya du ɓattitii, kam e sukaaɓe muuɗum cujidi. Caggal ɗuum, Yuusufi e Rahiina, kam'en du ɓattitii, cujidi.

⁸ Isuwa wi'i: — Ɗume woni cefe ɗe kawrumi ɗeen fuu? Yaakuuba jaabii wi'i: — Ɗuum wo faa mi heɓa moƴƴere yeeso maa, aan joomam.

⁹ Isuwa wi'i: — Sakiike am, miin miɗo hebbini jawdi. Joga komaa ɗuum.

¹⁰ Yaakuuba wi'i: — A'aa, miɗo ŋaare! Si aɗa yardii fu, nanngaa ko kokkumaami ɗuum. Sabo ko njiimi yeeso maa ɗuum na nanndani kam hono wo yeeso Laamɗo nji'umi. A jaɓɓorake kam no wooɗiri.

¹¹ Nanngu moƴƴere nde ngaddanmi ma ndeen, sabo Laamɗo barkinii kam, miɗo jogii huunde fuu. O doolɗi ɗum faa jaɓi.

¹² Isuwa wi'i: — Ummoɗen njehen, miin mi ardete.

¹³ Yaakuuba jaabii mo wi'i: — Joomam, aɗa anndi sukaaɓe ɓeen wo lokkaaɓe, miɗo jogii dammuuli e na'i ɓeyɗi muynooji. Si ɗi coggaama fay nyalooma gooto, dammuuli ɗiin fuu mbaatan.

¹⁴ Miɗo ŋaare joomam, jaɓu ardaade maccuɗo maaɗa. Mi yahiran heese heese, mi jokka coggal gonngal yeeso am ngaal e sukaaɓe ɓeen faa kewta to joomam ley leydi Seyir.

¹⁵ Isuwa wi'i: — Mi yoppidete seeɗa e yimɓe wonduɓe e am ɓeen. Yaakuuba jaabii, wi'i: — Saabe ɗume? Ko keɓumi moƴƴere yeeso maa, aan joomam ɗuum, heƴii kam!

¹⁶ Nyannde ndeen jaati Isuwa yeccii jokki laawol muuɗum yeccii Seyir.

¹⁷ Ammaa Yaakuuba eggi, fonndii Sukkot. O mahani hoore makko suudu, o waɗani dammuuli makko buguuji. Ɗum waɗi de nokku oon inndiraa Sukkot.

¹⁸ Noon Yaakuuba ƴuwiri Padan-Aram, faa yottii huɓeere Sikem wonnde ley leydi Kanaana ndeen e jam. O hoɗi ɗakkol mayre.

¹⁹ Ɗo o nyiɓi hukum makko ɗoon, o soodi leydi ndiin buuɗi cardi 100 e junngo ɓiɓɓe Hamor. Hamor woni baaba Sikem.

²⁰ Yaakuuba darni toon sakkirde. O inndiri nde El-Elohe-Israa'iila.