Fuɗɗoode 3 - Dewtere Laamɗo Fulfulde Burkina Faso

No neɗɗo arandeejo luttiri Laamɗo

¹ Ley kulle ladde ɗe Laamɗo Joomiraaɗo tagi ɗeen fuu mboddi ɓuri ƴoyre. Ndi wi'i debbo oon: — Yalla wo goonga, Laamɗo wi'i taa nyaamon ɓiɓɓe leɗɗe ngesa ɗeen fuu naa?

² Debbo oon jaabii ndi, wi'i: — Miɗen mbaawi nyaamude ɓiɓɓe leɗɗe ngesa ngaan.

³ Ammaa ɓiɓɓe lekki ngonki hakkunde ngesa kiin kaa, Laamɗo wi'i taa min nyaama ɗe, taa min meema ɗe fey, de min maaya.

⁴ Mboddi ndiin wi'i debbo oon: — A'aa, on maayataa.

⁵ Laamɗo ina anndi nyannde nyaamuɗon ɓiɓɓe makki fu, gite mooɗon peertoto, laatoɗon hono Laamɗo, anndon ko wooɗi e ko boni.

⁶ Ndeen debbo oon yi'i ɓiɓɓe lekki kiin ina muuyni ndaarude, ina mbeli nyaamude, iɗe ɓeyda suuno heɓude hakkillo. O itti ɓinngel makki, o nyaami. O hokki goriiko gondunooɗo e makko oon, kam du nyaami.

⁷ Ɓe ɗiɗo fuu gite maɓɓe peertii, ndeen ɓe annditi ɓalli ɓoli ɓe ngoni. Ɓe itti haako ƴibbi, ɓe canyi, ɓe taadii.

⁸ Nde henndu kiiral naange wifunoo ndeen, ɓe nani sawtu Laamɗo Joomiraaɗo. Imo yiiltoo ley ngesa leɗɗe ngaan. Ndeen gorko oon e deekum cuuɗii Laamɗo Joomiraaɗo ley leɗɗe magga.

⁹ Laamɗo Joomiraaɗo noddi gorko oon, wi'i: — Toy ngonɗaa?

¹⁰ Gorko oon jaabii, wi'i: — Mi nanu sawtu maa ley ngesa, de kulumi, cuuɗiimi sabo ɓanndu ɓoldu ngonumi.

¹¹ Laamɗo Joomiraaɗo wi'i: — Mooy haalani ma ɓanndu ɓoldu ngonɗaa? Ndelle a nyaamii ɓiɓɓe lekki ki mbiimi taa nyaamaa kiin naa?

¹² Gorko oon jaabii, wi'i: — Debbo mo kokkuɗaa kam faa wonda e am oon, wo kam hokki kam ɓii lekki kiin, de nyaamumi.

¹³ Laamɗo Joomiraaɗo wi'i debbo oon: — Ɗume woni ko ngaɗuɗaa ɗuum? Debbo oon jaabii, wi'i: — Wo mboddi hiili kam de nyaamumi ɗum.

¹⁴ Laamɗo Joomiraaɗo wi'i mboddi ndiin: Saabe ko ngaɗuɗaa ɗuum, a huɗaama hakkunde daabaaji e kulle ladde fuu. A daasoto dow reedu maaɗa, a nyaaman colla ley nguurndam maaɗa fuu.

¹⁵ Mi waɗan nganyaandi hakkunde maaɗa e debbo oon, e hakkunde ƴuwdi maaɗa e ƴuwdi makko. Ƴuwdi debbo oon fusan hoore maa, aan du, a soppan mo teppere.

¹⁶ Laamɗo wi'i debbo oon: Mi waɗan torra naawuka ley ɓeyngu maaɗa, a tampan e ŋatawere. A muuyan gondal gora, ammaa wo kam dawrante.

¹⁷ Laamɗo wi'i gorko oon: — Saabe ko njaɓuɗaa haala deeka de nyaamuɗaa ɓiɓɓe lekki ki kaɗumaami nyaamude ɗuum: leydi huɗaama saabe maa. E tampiri keɓirtaa nyaamdu ley nguurndam maa fuu.

¹⁸ Ndi funnante gi'e e huɗo bonko. Wo ɓii jalo laatotoo nyaamdu maaɗa.

¹⁹ E nguli maaɗa keɓirtaa nyaamdu, faa nde njeccoyɗaa e leydi ndi ittaɗaa e muuɗum ndiin. Sabo wo a sollaare, ley mayre du njeccotoɗaa.

²⁰ Gorko bi'eteeɗo Aadama oon inndiri deekum Hawwaa, (ɗum na fiirta «nguurndam») sabo kam laatii inna yimɓe fuu.

²¹ Laamɗo Joomiraaɗo moƴƴinani Aadama e deekum kaddule guri, ɓorni ɗum'en.

²² Laamɗo Joomiraaɗo wi'i: — Inan, neɗɗo laatake hono gooto meeɗen e anndude ko wooɗi e ko boni. Joonin kaa taa o foorta junngo makko o itta ɓiɓɓe lekki nguurndam kiin du, o nyaama de o wuura faa abada.

²³ Ndeen Laamɗo Joomiraaɗo yaltini neɗɗo ley ngesa leɗɗe Eden faa rema leydi ndi nokkaa e muuɗum ndiin.

²⁴ Nde o riiwunoo neɗɗo oon, o wurtini ɗum ndeen, o darni doomooɓe wi'eteeɓe keruba'en faro lettugal ngesa leɗɗe Eden ngaan na tiigii kaafaahi njiilotooki ki ɗemle yiite faa dooma laawol lekki nguurndam kiin.