Fuɗɗoode 20 - Dewtere Laamɗo Fulfulde Burkina Faso

No Ibrahiima e Abimelek ngaddi

¹ Ibrahiima ƴuwi ɗoon, eggiri horɗoore leydi Kanaana. O hoɗi hakkunde Kaades e Sur. O eggi ɗoon, o hoɗowi Gerar.

² Ɗoon du Ibrahiima wi'i Saaratu deekum oon wo sakiike muuɗum debbo. Saabe ɗuum Abimelek kaananke Gerar wi'i Saaratu waddee to muuɗum, de waddaa.

³ Ammaa Laamɗo ɓangani mo ley koyɗol jemma, haaldi e makko, wi'i: — Inan a maayan, sabo debbo mo aduɗaa oon wo debbo gonɗo goriiwo.

⁴ Tawi Abimelek meemaayno debbo oon tafon. O wi'i: — Joomam, yalla a halkan lenyol ponnditiingol ngol waɗaay ko boni naa?

⁵ Wanaa goriiko oon jaati wi'i kam wo o sakiike muuɗum debbo naa. Kanko debbo oon du, o wi'i kam oon wo sakiike makko gorko? Wo e ɓernde laaɓunde kooƴirmi mo, mi waɗaay ko boni.

⁶ Laamɗo haaldi e makko ley koyɗol, wi'i mo: — Goonga, miɗo anndi e laaɓal ngaɗirɗaa ɗum, katin du miin haɗi ma luttude kam, ɗum waɗi de mi accaay meemuɗaa mo.

⁷ Joonin kaa, hokkitin gorko oon deekum, sabo o annabaajo. O du'ante heɓa mbuuraa. Ammaa si a hokkitaay mo fu, tennyoraa a maayan, aan e jeydaaɓe maa fuu.

⁸ Abimelek dawi gilla hejjere, noddi yimɓe ɓaade muuɗum fuu, fillanii ɗum'en haalaaji ɗiin. Yimɓe ɓeen kuli sanne.

⁹ Abimelek noddi Ibrahiima, haaldi e muuɗum, wi'i: — Ɗume woni ko ngaɗuɗaa min ɗuum? Ɗume ngaɗumaami de ngaddanɗaa kam miin e leydi am hakke mawɗo o? A waɗii kam ko neɗɗo haanaa waɗeede.

¹⁰ Abimelek wi'i Ibrahiima katin: — Ɗume anniyiɗaa de ngaɗuɗaa min hono nii?

¹¹ Ibrahiima jaabii, wi'i: — Mi miilake yimɓe nokkuure nde kulataa Laamɗo fay seeɗa, mi miilake du ɓe mbaran kam saabe deekam oon.

¹² Ammaa si goonga, wo o sakiike am debbo du. Min kawtu baaba, ammaa min kawtaa inna. Wo noon waɗi keɓumi ɓaŋude o.

¹³ Nde Laamɗo yamirnoo kam mi dilla suudu baabam ndeen, mbiimi jom suudu am oon, nokku fuu ɗo min njottii o waɗana kam moƴƴere, o wi'a wo mi sakiike makko gorko.

¹⁴ Abimelek hooƴi be'i e baali e ga'i e maccuɓe e horɓe, hokki Ibrahiima. O hokkiti ɗum Saaratu jom suudu muuɗum oon du.

¹⁵ Abimelek wi'i: — Inan leydi am yeeso maa. Njooɗoɗaa ɗo muuyɗaa fuu.

¹⁶ O wi'i Saaratu: — Ndaar! Mi hokkan sakiike maa gorko oon buuɗi cardi ujunere (1.000) faa ɗum holla wo a laaɓuɗo yeeso wondiiɓe maa ley ko waɗi ɗuum fuu.

¹⁷ Ibrahiima nyaagii Laamɗo, de Laamɗo danni Abimelek e deekum e horɓe mum, de ɓe keɓi ɓeyngu.

¹⁸ Sabo Joomiraaɗo faddakeno ɓeyngu ley suudu Abimelek fuu. O waɗiino ɓe ɓe fuu rimarɓe saabe ko Abimelek adi Saaratu, jom suudu Ibrahiima ɗuum.