Fuɗɗoode 15 - Dewtere Laamɗo Fulfulde Burkina Faso

No Laamɗo waɗiri amaana hakkunde muuɗum e Abram

¹ Caggal ɗuum, konngol Joomiraaɗo wari e Abram, wi'i: — Taa hulu Abram! Miin woni wawaade maaɗa, mbarjaari maa mawnan sanne.

² Abram jaabii, wi'i: — Yaa Laamɗo Joomiraaɗo, ɗume kaajaɗaa hokkude kam? Inani kam, mi walaa ɓiɗɗo. Donoowo suudu am wo Eliyeser jeyaaɗo Damas.

³ Abram ɓeydi, wi'i: — A hokkaay kam ƴuwdi. A yi'i, janano bammbaaɗo e suudu am oon ronata kam.

⁴ Ndeen konngol Joomiraaɗo wari e makko, wi'i: — A'aa, wanaa oon ronete. Donoowo ma oon e maaɗa jaati yaltata.

⁵ Joomiraaɗo wurtini mo yaasin, wi'i: — Ndaar kammu, de limaa koode si aɗa waawi. O ɓeydi, o wi'i: — Noon ƴuwdi maaɗa ɗuuɗirta.

⁶ Abram goonɗini Joomiraaɗo, de saabe ɗuum Laamɗo ndaardi o wo o ponnditiiɗo.

⁷ Joomiraaɗo haaldi e makko, wi'i: — Miin woni Joomiraaɗo jaltinɗo ma wuro Uur, leydi Kaldiya faa hokke leydi ndii, ndonaa ndi.

⁸ Abram ƴami o, wi'i: — Laamɗo Joomiraaɗo, maande ndeye annditirammi mi ronan ndi?

⁹ Laamɗo jaabii, wi'i: — Waddanam wiige tatiiwe e mbeewa nga duuɓi tati e njawdiri tatiiri e nyaabal e wuugaandu.

¹⁰ Abram hooƴi daabaaji ɗiin fuu, seeli ɗi hakkunde. O huccunduri pecce ɗeen ammaa pooli ɗiin kaa, o feccaay ɗum'en.

¹¹ Jigaaje njippii dow kujje kirsaaɗe ɗeen ammaa Abram riiwi ɗe.

¹² Nde naange yanunoo fu, ɗoyngol teddungol nanngi Abram. Nimre mawnde suddi o, o huli kulol manngol.

¹³ Joomiraaɗo haaldi e Abram, wi'i: — Paamaa ƴuwdi maa ndiin laatoyto yananɓe ley leydi njananndi. Ɓe laatoyto maccuɓe ley leydi ndiin, ɓe torriree duuɓi 400.

¹⁴ Ammaa mi jukkoyto lenyol ngol ɓe laatanii maccuɓe ngool de caggal ɗuum, ɓe njaltida e jawdi ɗuundi.

¹⁵ Aan kaa caggal naywaaku maaɗa mbelngu, a mooɓete, njaha e jam to maamiraaɓe maaɗa.

¹⁶ Ley jamaanu nayaɓo, ƴuwdi maa ndiin wartan ɗo, sabo etorgal hakkeeji Amorinkooɓe hiɓɓaay tafon sakko mi jukkoo ɗum'en.

¹⁷ Wakkati naange yanunoo de nimre mawnde waɗi ndeen, duɗal cuurtoowal e doccal peƴƴiti hakkunde daabaaji ceelaaɗi ɗiin.

¹⁸ Nyannde ndeen, Joomiraaɗo waddi amaana e Abram, wi'i ɗum: — Wo ƴuwdi maaɗa kokkammi leydi ndii, gilla maayo Misira faa yottoo Efrat, maayo manngo ngoon.

¹⁹ Ɗum woni leydi Keniyankooɓe e Kenijiyankooɓe e Kadaminkooɓe

²⁰ e Hittiyankooɓe e Perisinkooɓe e Refayinkooɓe

²¹ e Amorinkooɓe e Kanaaninkooɓe e Girgasinkooɓe e Yebusinkooɓe.