Fuɗɗoode 13 - Dewtere Laamɗo Fulfulde Burkina Faso

¹ Abram dilli Misira, hoɗowi horɗoore leydi Kanaana, kam e jom suudu muuɗum e ko jeyi fuu. Luudu ina wondi e makko.

No Abram e Luudu ceediri

² Abram na woodunoo jawdi sanne. Imo jogii daabaaji e cardi e kaŋŋe faa heewi.

³ O waɗi egga-hoɗa gilla leydi horɗoore faa Baytila, to hukum makko wonnoo arande toon. Ɗum woni hakkunde Baytila e Ayi

⁴ to o nyiɓunoo sakkirde arande toon de o du'orii innde Joomiraaɗo.

⁵ Luudu, jaadoowo e makko oon du, ina joginoo daabaaji mawɗi e pamari e hukumuuji.

⁶ No jawdi maɓɓe foti heewude de nokkuure ndeen wari heƴaay ko ɓe njooɗodoo.

⁷ Hamre waɗi hakkunde durooɓe Abram e durooɓe Luudu. Tawi wakkati oon Kanaaninkooɓe e Perisinkooɓe njooɗinoo ley leydi ndiin.

⁸ Abram haaldi e Luudu, wi'i ɗum: — Taa hamre waɗa hakkunde meeɗen, taa durooɓe maa e durooɓe am du kaɓa, sabo en sakiraaɓe.

⁹ Inan leydi ndi fuu yeeso maaɗa. En ceeda. Si a rewii faro nano, miin mi rewan faro nyaamo. Si a rewii faro nyaamo du, mi rewan faro nano.

¹⁰ Luudu ɓanti gite muuɗum ndaari njaayri Urdun yi'i no feewiri hono ngesa leɗɗe Joomiraaɗo, hono leydi Misira heedde Sowar fadde Joomiraaɗo e halkude gure Sodoma e Gomoora.

¹¹ Luudu suɓii njaayri Urdun ndiin fuu, faro lettugal toon. Nii ɓe ceediri.

¹² Abram heddii ley leydi Kanaana, de Luudu du hoɗowii ley gure mawɗe gonɗe e njaayri ndiin. O tonti hukumuuji makko faa hewti Sodoma.

¹³ Ammaa yimɓe Sodoma wo bonɓe, waɗooɓe hakkeeji bonɗi yeeso Joomiraaɗo.

¹⁴ Gaɗa ko Luudu seedi e Abram ɗuum, Joomiraaɗo haaldi e Abram, wi'i ɗum: — Ɓantu gite maa, ndaaraa gilla nokku ɗo ngonɗaa ɗoon faa yaade soɓɓirre e horɗoore e lettugal e gorgal.

¹⁵ Leydi ndi nji'ataa ndiin fuu, wo aan e ƴuwdi maaɗa kokkammi ndi faa abada.

¹⁶ Mi waɗan ƴuwdi maa ɗuuɗa faa fay gooto waawataa limude ndi. Si njaareendi na waawi limeede fu, ƴuwdi maa ndiin du waawete limeede.

¹⁷ Umma, njiiltoɗaa e leydi ndiin, ndaaraa njuuteefi mayri e njaajeefi mayri sabo wo aan kokkammi ndi.

¹⁸ Abram eggi, darnoyi hukum muuɗum ley leɗɗe mawɗe ɗe Mamre, ley Heberon. Toon o nyiɓani Joomiraaɗo sakkirde.