Fuɗɗoode 11 - Dewtere Laamɗo Fulfulde Burkina Faso

Suudu Baabiila toowndu

¹ Wakkati oon, adunaaru fuu wo ɗemngal gootal haalannoo.

² Nde tagaaɓe eggirnoo faro lettugal ndeen, tawi njaayri ley leydi Sinar de koɗi toon.

³ Ɓe mbi'ondiri: — Ngaree piyen pereeje, nduppen ɗe faa ɗe cemmbiɗa, ɗe laatoo kaaƴe nyiɓirɗe. Ɓe ngaɗi pereeje, ɓe keɓi katin loofe ɗaatuɗe hono taari, ɓe ngaɗi loofal nyimreteengal.

⁴ Ɓe mbi'i: — Ngaree mahanen ko'e men huɓeere e suudu toowndu faa na hewta kammu. Ngaɗanen ko'e men innde taa caakoɗen ley adunaaru fuu.

⁵ Joomiraaɗo jippii faa ndaara huɓeere e suudu toowndu ndu ɓiɓɓe-Aadama ngonnoo na nyiɓa nduun.

⁶ Joomiraaɗo wi'i: — Ndaar, ɓe fuu wo ɓe lenyol gootol e ɗemngal gootal. Ɗuum wo fuɗɗoode golleeji maɓɓe tan. Joonin ko ɓe anniyii waɗude fuu, walaa ko waawi haɗude ɓe yottinde ɗum.

⁷ Ngaree njippoɗen, njiiɓen ɗemngal maɓɓe ngaal, taa ɓe keɓa ɓe paamra katin.

⁸ Noon Joomiraaɗo sankitiri ɓe ley adunaaru fuu. Ɓe celi nyiɓude huɓeere ndeen.

⁹ Ɗuum waɗi nde inndiraa Baabiila, sabo toon Joomiraaɗo jiiɓi ɗemngal tagaaɓe fuu, toon du o sankiti ɓe ley adunaaru ndu fuu.

Ƴuwdi Saam

¹⁰ Inan ƴuuruɓe e Saam: Nde Saam heɓunoo duuɓi 100 ndeen, rimi Arfasad. Ɗuum waɗii duuɓi ɗiɗi caggal ilam tuufaanu.

¹¹ Saam wuuri duuɓi 500 caggal rimeede Arfasad. O rimi katin ɓiɓɓe worɓe e rewɓe.

¹² Arfasad waɗi duuɓi capanɗe tati e joy de rimi Seela.

¹³ Caggal rimeede Seela, o wuuri duuɓi 403. O rimi ɓiɓɓe worɓe e rewɓe.

¹⁴ Seela waɗi duuɓi 30 de rimi Eber.

¹⁵ Caggal rimeede Eber, Seela wuuri duuɓi 403. O rimi ɓiɓɓe worɓe e rewɓe.

¹⁶ Eber waɗi duuɓi 34 de rimi Peleg.

¹⁷ Caggal rimeede Peleg, Eber wuuri duuɓi 430. O rimi ɓiɓɓe worɓe e rewɓe.

¹⁸ Peleg waɗi duuɓi 30 de rimi Rewu.

¹⁹ Caggal rimeede Rewu, Peleg wuuri duuɓi 209. O rimi ɓiɓɓe worɓe e rewɓe.

²⁰ Rewu waɗi duuɓi 32 de rimi Seruk.

²¹ Caggal rimeede Seruk, Rewu wuuri duuɓi 207. O rimi ɓiɓɓe worɓe e rewɓe.

²² Seruk waɗi duuɓi 30 de rimi Nahor.

²³ Caggal rimeede Nahor, Seruk wuuri duuɓi 200. O rimi ɓiɓɓe worɓe e rewɓe.

²⁴ Nahor waɗi duuɓi 29 de rimi Teera.

²⁵ Caggal rimeede Teera, Nahor wuuri duuɓi 119. O rimi ɓiɓɓe worɓe e rewɓe.

²⁶ Teera waɗi duuɓi 70 de rimi Abram e Nahor e Haran.

Ƴuwdi Teera

²⁷ Inan ɓiɓɓe Teera: Teera rimi Abram e Nahor e Haran. Haran rimi Luudu.

²⁸ Haran artii bammum Teera maayde. O maayi ley leydi ndi o rimaa e muuɗum ndiin, ley ngenndi Kaldiyankooɓe mbi'eteendi Uur.

²⁹ Abram e Nahor ɓaŋani ko'e muɓɓen rewɓe. Jom suudu Abram ina wi'ee Saaray. Jom suudu Nahor ina wi'ee Milka ɓii Haran. Haran woni baaba Milka e Yiska.

³⁰ Saaray wo debbo dimaro. O walaano ɓiɗɗo.

³¹ Teera yaadi e ɓiyum Abram e taanum Luudu ɓii Haran e dee ɓiyum Saaray, jom suudu Abram oon. Ɓe fuu, ɓe ƴuwi galluure Uur ɓe ponndii galluure Kanaana. Ɓe njehi faa ɓe njottii wuro Haran, ɓe koɗi toon.

³² Duuɓi Teera wo 205 de maayi ley Haran.