Fillitagol 27 - Dewtere Laamɗo Fulfulde Burkina Faso

Haala kuddi e barke Haala kaaƴe darneteeɗe dow waamnde Ebal

¹ Muusaa e mawɓe Israa'iila kokki jamaare Israa'iila yamiroore ndee mbi'i ɗum'en: — Ɗowtanoɗon yamiroore nde kokkammi on hannden ndeen.

² Nyannde peƴƴuɗon Urdun faa naaton nder leydi ndi Joomiraaɗo, Laamɗo mooɗon hokkata on ndiin fu, ndarnon kaaƴe mawɗe de mbujon ɗe ko rawni.

³ Mbinndon jamirooje ɗeen fuu dow kaaƴe ɗeen. Ngaɗon noon wakkati naatoyɗon leydi ndi Joomiraaɗo, Laamɗo maamiraaɓe mooɗon hokkata on, ndi kosam e njuumndi ilata e muuɗum ndiin, fodde no wiirunoo noon.

⁴ Nde peƴƴoyɗon Urdun fu ndarnon kaaƴe ɗeen dow waamnde Ebal fodde yamiroore nde kokkammi on hannden ndeen de mbujon ɗe ko rawni.

⁵ Ɗoon nyiɓanton Joomiraaɗo, Laamɗo mooɗon sakkirde kaaƴe. Taa cehiron kaaƴe ɗeen njamndi.

⁶ Nyiɓiron sakkirde ndeen kaaƴe ɗe cehaaka. Wo dow mayre cakkanton Joomiraaɗo, Laamɗo mooɗon sadakaaji buleteeɗi.

⁷ Cakkon du, sadakaaji dewral. Nyaamon de ceyoɗon yeeso Joomiraaɗo, Laamɗo mooɗon.

⁸ Mbinndon jamirooje ɗeen fuu dow kaaƴe ɗeen faa laaɓa.

⁹ Muusaa e almaami'en Lewinkooɓe kaaldi e jamaare Israa'iila mbi'i: — Israa'iila, hettinda faa nanaa. Hannden a laatake lenyol Joomiraaɗo, Laamɗo maaɗa.

¹⁰ Kettindanoɗon Joomiraaɗo, Laamɗo mooɗon oon, ngaɗon ko yamiri ɗuum fuu fodde no ekintinammi on hannden noon.

¹¹ Nyannde ndeen Muusaa hokki jamaare Israa'iila yamiroore ndee, wi'i: —

¹² Inan darotooɓe dow waamnde Garijim faa mbarkina yimɓe Israa'iila wakkati peƴƴoyɗon Urdun ndeen: yimɓe Simeyon e Lewi e Yahuuda e Isakar e Yuusufi e Benjamin.

¹³ Wakkati oon yimɓe Ruben e Gad e Aser e Jabulon e Dan e Naftali ndaroo dow waamnde Ebal faa kuɗa.

Haala kuddiiji sappo e ɗiɗi

¹⁴ Inan no Lewinkooɓe peekortoo mbi'a Israa'iila'en fuu: —

¹⁵ Kuddi woodana neɗɗo fuu cehuɗo leggal naa tafuɗo njamndi waɗi tooru, ko harmi yeeso Joomiraaɗo, ko juuɗe tagaaɗo cehi de resi ɗum ley nokkuure suuɗiinde. Ndeen yimɓe fuu njaaboo mbi'a: «Aamiina.» —

¹⁶ Kuddi woodana kuyfinɗo bammum e innam. Ndeen yimɓe fuu njaaboo mbi'a: «Aamiina.» —

¹⁷ Kuddi woodana cottinɗo keerol ngesa koddo muuɗum. Ndeen yimɓe fuu njaaboo mbi'a: «Aamiina.» —

¹⁸ Kuddi woodana jiiloowo bumɗo faa lallina ɗum. Ndeen yimɓe fuu njaaboo mbi'a: «Aamiina.» —

¹⁹ Kuddi woodana oonyuɗo sariya faa ɗala janano naa atiime naa debbo mo gorum maayi goonga. Ndeen yimɓe fuu njaaboo mbi'a: «Aamiina.» —

²⁰ Kuddi woodana pukkodiiɗo e dee bammum sabo semtinii bammum oon. Ndeen yimɓe fuu njaaboo mbi'a: «Aamiina.» —

²¹ Kuddi woodana pukkodiiɗo e ndaaba laatiinga fuu. Ndeen yimɓe fuu njaaboo mbi'a: «Aamiina.» —

²² Kuddi woodana pukkodiiɗo e inna gootoojo muuɗum naa baaba gootoojo muuɗum. Ndeen yimɓe fuu njaaboo mbi'a: «Aamiina.» —

²³ Kuddi woodana pukkodiiɗo e esum debbo. Ndeen yimɓe fuu njaaboo mbi'a: «Aamiina.» —

²⁴ Kuddi woodana barduɗo goɗɗo cuccukka. Ndeen yimɓe fuu njaaboo mbi'a: «Aamiina.» —

²⁵ Kuddi woodana jaɓuɗo njoɓdi faa itta yonki mo waɗaay faa'e. Ndeen yimɓe fuu njaaboo mbi'a: «Aamiina.» —

²⁶ Kuddi woodana mo ɗowtanaaki ko haalaaji Tawreeta ɗiin mbi'i, mo waɗaay ko yamiraa ɗuum. Ndeen yimɓe fuu njaaboo mbi'a: «Aamiina.»