Fillitagol 15 - Dewtere Laamɗo Fulfulde Burkina Faso

Yamiroore dow yaafagol nyamaale

¹ Ley duuɓi jeɗɗi fuu, sey njaafanoɗon joganiiɓe on nyamaande wakkati timmoode hitaande jeɗɗaɓerde ndeen.

² Inan no nyamaande ndeen yaafortee: Nde hitaande ndeen gooynaa wo yaafanteende nyamaale saabe Joomiraaɗo fu, tawanooɗo na rewa banndum nyamaande fu, yaafoo, taa ƴamta nyamaande ndeen katin.

³ Oɗon mbaawi doolɗude janano yoɓa on ammaa sakiike mon kaa, njaafanoɗon ɗum.

⁴ Si on ngaɗii noon fu, talkaajo tawataake hakkunde mooɗon sabo Joomiraaɗo, Laamɗo mooɗon barkinan on ley leydi ndi hokkata on laatoo jeyal mon ndiin.

⁵ Noon laatortoo si on tinnake e ɗowtanaade jamirooje makko, on ngaɗii ko o wi'i, ko njanginanmi on hannden ɗuum.

⁶ Joomiraaɗo, Laamɗo mooɗon barkinan on fodde no wi'iri on noon. Wo onon kokkata lenyi keewɗi nyamaale ammaa onon kaa, on nyamlataako. On ndawranan lenyi ɗuuɗɗi ammaa ɗi ndawrantaa on.

⁷ Si gooto ley sakiraaɓe mon talkiɗii nder galluuje mon ley leydi ndi Joomiraaɗo, Laamɗo mooɗon hokkata on ndiin fu, taa njoornon ɓerɗe mon de kunngoɗon nyamlaade ɗum buuɗi.

⁸ Kokkon mo nyamaande o humtira haajuuji makko fuu.

⁹ Kakkilon, taa miilooji bonɗi koomta on de mbi'on: «Hitaande jeɗɗaɓerde nde yaafagol nyamaale ndeen ɓadake.» Taa ndaardon sakiike mon talkaajo oon bonde de kunngoɗon hokkude ɗum faa'e, sabo o wullitoto to Joomiraaɗo saabe ko ngaɗuɗon o ɗuum de waddana on hakke.

¹⁰ Ndelle nyamloɗon o, wooɗi du, kokkiron o yardamuye. Si on ngaɗii noon fu, Joomiraaɗo, Laamɗo mooɗon barkinan golle mon e ko anniyiɗon waɗude fuu.

¹¹ Talkaaɓe tawetee ley leydi mon wakkati fuu. Wo saabe ɗuum de miɗo hokka on yamiroore ndee: moƴƴanon sakiraaɓe mon talkaaɓe e tampuɓe wonɓe ley leydi mon.

Yamiroore dow rimɗingol maccuɓe

¹² Si sakiike maaɗa Ibraninke gorko naa debbo sottirii ma hoore muuɗum fu, gollirane duuɓi jeegom. Ammaa hitaande jeɗɗaɓerde ndeen, accaa o hoota wuro makko o dimo.

¹³ Nyannde kokkataa o laawol ndeen, taa accaa o dilla to maaɗa juuɗe ɓole.

¹⁴ Njardoɗaa kokkaa o daabaaji pamari e alkama e inaboojam e huunde fuu ko Joomiraaɗo, Laamɗo maaɗa barkiniri ma.

¹⁵ Miccitoɗaa a laatakeno maccuɗo leydi Misira de Joomiraaɗo, Laamɗo maaɗa rimɗini ma. Wo saabe ɗuum de miɗo hokke yamiroore ndee hannden.

¹⁶ Si maccuɗo maaɗa wi'ii ma: «Mi yiɗaa dillude ɗo maaɗa», saabe imo yiɗi ma aan e yimɓe maaɗa, o tawii wondude e maaɗa na weli o fu,

¹⁷ sey takkaa o e gampuwal suudu mon de tufiraa nowru makko kural. Ndeen o heddoo o maccuɗo maaɗa faa abada. Wo noon njeyɗaa waɗude korɗo maaɗa du.

¹⁸ Taa mimsitee yoofude maccuɗo mooɗon hoota sabo o gollanii on duuɓi jeegom. O waɗii on keɓii ko golloowo joɓeteeɗo waɗanannoo on ɗuum kile ɗiɗi. Ndeen Joomiraaɗo, Laamɗo mooɗon barkinan on ley golleeji mon fuu.

Haala ko laatii awru fuu

¹⁹ Ko laatii awru daabaaji mon pamari e mawɗi fuu ceninanon ɗum Joomiraaɗo, Laamɗo mooɗon. Taa ndemnon awru nagge, taa keson awru mbaalu naa mbeewa.

²⁰ Hitaande fuu, nyaamon ɗi yeeso Joomiraaɗo, Laamɗo mooɗon onon e yimɓe mon ley nokkuure nde suɓoytoo ndeen.

²¹ Si tawii ndaaba ngaan na woodi malal hono mbumnga naa laƴoowa naa malal feere fu, taa cakkanon ɗum Joomiraaɗo, Laamɗo mooɗon.

²² Nyaamon ɗum ley galluuje mon. Laaɓuɗo e mo laaɓaa fuu na mbaawi nyaamude ɗum hono no nyaamroton kooba naa lewla ni.

²³ Ammaa taa nyaamon ƴiiƴam majji. Ndufon ɗam dow leydi hono ndiyam.